بەلگىلى ءانشى نۇرلان البان "سۆوبودا سلوۆا" باسىلىمىنا بەرگەن سۇحباتىندا بولاشاقتا قاريالاردان تۇراتىن "ابىز اقساقالدار" توبىن قۇرعالى جاتقانىن ايتتى.

ءانشى وسى ۋاقىتقا دەيىن "ارۋانا" دەپ اتالاتىن اجەلەر توبىن قۇرعانىن، ال الداعى ۋاقىتتا تاعى ءبىر ۇلكەن جوبانى جۇزەگە اسىرماق ويى بار ەكەنىن جەتكىزدى.

"مەن قازاقتىڭ اجەلەرىن عانا ەمەس، سونىمەن بىرگە اتالارىمىزدى، قاريالارىمىزدى ساحناعا شىعارعىم كەلەدى. وسى ماقساتتا  ۇلكەن كاستينگ جاريالانادى. اتالاردان، قازاقتىڭ ابىز اقساقالدارىنان قۇرالعان توپ قۇرماق ويىم بار، ءقازىر وسى ماقساتتا 7 اتانى ىزدەۋ ۇستىندەمىن"، - دەدى نۇرلان البان.

ال اتالارعا قويىلار تالاپ قانداي دەگەن ساۋالعا ءانشى: "سونشالىقتى اۋىر تالاپ قويامىن دەمەيمىن. توپتى ءسوزى سالماقتى، ويى ورنىقتى، قازاقىلىعى مەن يمانى مول، ساقال-مۇرتى كەلىسكەن اقساقالداردان قۇرساق دەيمىن. تەك ودان كەيىن بارىپ مۋزىكالىق قابىلەتىن باعالايتىن بولامىز"، - دەپ جەتكىزدى ول.

سونىمەن قاتار ءانشى البان توپتىڭ قالاي اتالاتىنى ءالى انىقتالماعانىن ايتتى. ەگەر تالاپقا ساي كەلىپ، تەك قانا ساحنا تورىندە ەمەس، ومىردە دە اقىلشى بولاتىن اقساقالدارىمىز تابىلىپ جاتسا، جوبانىڭ جەمىستى بولارىنا سەنەتىنىن اتاپ ءوتتى.