پروديۋسەر ءقىدىرالى بولمانوۆتىڭ ەسىمى اتالعاندا، قاي ءقىدىرالى دەپ ەشكىم ايتا قويماس. ول – بويىنداعى كۇش-جىگەرىن ۇلتتىق رۋحانياتىمىزدى وركەندەتۋگە اتسالىسىپ جۇرگەن قازاق مۋزىكانتى. ءقىدىرالى قۇرعان ULYTAU توبىنىڭ 2001 جىلى گولليۆۋدتا وتكەن حالىقارالىق بايقاۋدا التىن مەدال الۋى قازاق ونەرى ءۇشىن ۇلكەن مارتەبە بولعانى ءمالىم. بۇل روك-توپ قازاق مۋزىكا مادەنيەتىندە وزىندىك ورنەگى بار، تىڭ، بۇرىن بولماعان ءۇردىس قالىپتاستىرىپ، ياعني ۇلتتىق اسپابىمىز دومبىرانى روكقا قوسىپ، جاڭا دەڭگەيدە الەمگە ناسيحاتتاپ ءجۇر. بۇل ورايدا ەۋروپا كلاسسيكتەرى ي.س.باح، ۆ.ا.موسارت، ا.ۆيۆالدي، ن.پاگانينيدىڭ الەمگە تانىمال تۋىندىلارىمەن قاتار كاسىبي بىلىكتىلىكپەن وڭدەلىپ، قۇرامداعى سكريپكاشى، گيتاريست، دومبىراشى مۋزىكانتتار ورىنداپ جۇرگەن قۇرمانعازىنىڭ «اداي»، «سارىارقا»، ماحامبەتتىڭ «جۇمىر قىلىش»، قازانعاپتىڭ «كوكىل»، ن.تىلەندييەۆتىڭ «اتا تولعاۋى» كۇيلەرىن ايتامىز.

پروديۋسەرمەن استانادا­ كەزدەس­كەنىمىزدە، بۇگىنگى ەسترادا­ باعىتىنداعى ەڭ وزەكتى دەگەن ماسەلەلەر جونىندە، ەستراداعا بەيىم­دەلۋدەگى مۋزىكالىق جانرلار مەن كاسىبي ورىنداۋشىلار، پروديۋسەرلىك ورتالىقتار تۋرالى، سونىمەن بىرگە ءوزىنىڭ تاجىريبەسىنەن وتكەن كوپتەگەن ماڭىزدى جوبالار تۋرالى ويلارىن بۇكپەسىز ورتاعا سالدى. بۇگىنگى كۇنى ادامداردىڭ تۇسىنىگىندە «شوۋ-بيزنەس جۇرگەن جەردە شىعارماشىلىق توقتايدى» دەگەن قاعيدا باسىم بولىپ تۇر. ءبىزدىڭ ويى­مىزشا، ق.بولمانوۆتىڭ ەلىمىزدىڭ شوۋ-بيزنەسىندە ويىپ تۇرىپ الار ورنى بار.

ULYTAU اسپاپتىق توبىن بۇرىن-سوڭدى كەزدەسپەگەن، ياعني انالوگى جوق اۆتورلىق جۇمىس دەۋگە بولادى. وسى ۇجىم ساحناعا العاش شىققاننان بەرى تالعامى بيىك تىڭدارماندى دا، سوڭىنا ەرگەن جاستاردى دا وزىنە قاراتا ءبىلدى. ونى اسىرەسە، سوڭعى جىلداردا قۇرىلعان دۋەت، تريو، كۆارتەت، شاعىن انسامبلدەردىڭ قۇرامىندا مىندەتتى تۇردە ءبىر ۇلتتىق اسپاپتىڭ قاتىسۋىنان كورۋگە بولادى. كەيىنگىگە باعىت كورسەتە ءبىلىپ، قازاق ەستراداسىن جاڭا ارناعا بۇرا بىلگەن بۇل توپ الەم كلاسسيكالىق مۋزىكاسىمەن بىرگە كۇيلەردى روكپەن سينتەزدەدى. قازىرگىدەي اشىق اقپاراتتار الاڭىندا باتىستىق دىبىس تاسقىنىنا قارسى جاسوسپىرىمدەرگە ءان، كۇيلەرىمىزدى وسىنداي فورماتتا ۇسىنعان دا ۇتىمدى سەكىلدى. ارينە، بۇل ءتول تەمبريدەالىمىزدى مۇلدەم ۇمىتۋ ەمەس. ءبىراق كاسىبي نەگىزدى جاڭالىقتى جاتىرقاماي، كۇيلەردىڭ، اسىرەسە توكپە كۇيلەردىڭ سينتەزگە سۇرانىپ تۇرعان ەكپىن ىرعاعىن تاجىريبەدە قولدانۋ. ۋاقىت سونى تالاپ ەتىپ وتىر.

ءقىدىرالى جيىرما جىلداي اۋىلدا وسسە، ءومىرىنىڭ كەيىنگى جيىرما جىلداي ۋاقىتىن الماتىدا وتكىزدى. ول اۋىلدىڭ دا، استانانىڭ دا ءومىر ىرعاعىن ءتۇسىنىپ، بەيىمدەلە بىلگەن. سوندىقتان دا قوعام ءۇشىن دەر كەزىندەگى قاجەتتى فورماتتالۋدى ءدوپ باسا الدى. سۋرەتشىلىككە دە وقىدى، ءوزى ساحنادا گيتارامەن ءجۇرىپ ءان سالىپ، مۋزىكانت رەتىندە شىڭدالدى. فورماتتاۋدى – ارانجيروۆكا جاساۋ دەپ ەمەس، اناعۇرلىم كۇردەلى دۇنيە دەپ تۇسىندىرەدى. ويلاپ تاپقان دۇنيەسىن، ياعني جاڭا ءۇردىستىڭ جۇزەگە اسىرىلۋىنىڭ وزىنە ەكى جارىم جىل ىزدەندى. ويتكەنى دومبىرا روكقا جىمداسا قويمادى، ەكەۋى ەكى بولەك الەم. «ولاردى سينتەزدەمەسەك ءداستۇرلى مۋزىكانى مەنىڭ مۋزىكام دەمەيتىن جاعدايعا جەتتىك»، – دەيدى مۋزىكانت. ءداستۇرلى مۋزىكا كەشتەرىنە بەلگىلى سۋبمادەنيەت وكىلدەرى عانا، نەگىزىنەن اعا بۋىن عانا باراتىنىن العا تارتقان پروديۋسەر: «سوڭعى ون بەس جىلدا ءداستۇرلى مۋزىكا كونسەرتىنە بارعان جاستاردى مەن كورگەن ەمەسپىن. ال ەندى تاعى ون بەس جىلدا نە بولادى؟»، – دەپ قىنجىلىس ءبىلدىردى. «قازاقستانعا سىرتتان كەلەتىن وتاندىق ونىمنەن ون ەسە كوپ اقپارات كوزدەرى باتىستىق باعىتتا قىزمەت ەتەدى. «Rammstein» سەكىلدى توپتاردى نەمەسە «Gangnam Style» سەكىلدى اندەردى جاستاردىڭ ميىنا قۇيىپ، ساناسىن ۋلاپ جاتىر. مىسالى، ءقازىر جيىرماداعى جاستاردىڭ ساناسى جاڭا ويلاۋ جۇيەسىندە، باسقا سوزبەن ايتقاندا «ميى زاماناۋي فورماتتالعان» باسقا بالا. ونىڭ دۇنيەتانىمى، ارمانى، ماقساتى باسقا. ەڭ باستىسى، تىڭدايتىن مۋزىكاسى باسقا. ءوزىمنىڭ تۇسىنگەنىم، وسىنداي جاستارعا قۇرمانعازى ەجەلگى ءبىر دىبىس بولىپ ەلەستەيدى. ەندى ءبىز ULYTAU ارقىلى حالىق مۋزىكاسىن سول كۇيىندە ۇسىنۋدان باسقا دا جولدار بار ەكەندىگىن، جاڭا باعىتتا ناسيحاتتاۋعا بولاتىنىن ۇعىپ وتىرمىز»، – دەگەن پىكىرى ويلاندىرادى.

ۇجىم تۋرالى كومپوزيتور، كۇيشى سەكەن تۇرىسبەكوۆ بىلاي دەگەن ەدى: «و باستا قازاق ەستراداسىن باسقا مەملەكەتتەرگە «دوسمۇقاسان» تانىس­تىرسا، سودان كەيىن بيىككە كوتەرگەن ءقىدىرالىنىڭ ەڭبەگى، وسى ULYTAU. ەسترادالىق دۇنيەنىڭ ءبارىن ەسسىز دۇنيە دەۋگە بولمايدى، ءقىدىرالى ەستى دۇنيە جاساپ ءجۇر. وسىنداي توپتىڭ بولعانىنا قۋانۋىمىز كەرەك. توپ ءالى دە ىزدەنىستەردى تالاپ ەتەدى، دومبىراعا ءالى دە باسىمدىق بەرىلسە دەگەن ويىم بار. بولاشاعى الدا». ق.بولمانوۆتىڭ جاڭا ءۇردىس تاۋىپ، وسى باعىتتا سىڭىرگەن ەڭبەگى وراسان. ءبىر عانا ماحامبەتتىڭ «جۇمىر قىلىش» كۇيىنىڭ بەينەكليپىن الىپ قارايىق. ULYTAU-دىڭ ءوز جولى، ۇستانىمى، الاتىن اسۋى بار. سوندىقتان پروديۋسەر الدىمەن جوبا جۇزەگە اسپاي تۇرىپ الەمدىك دەڭگەيگە تالپىنىس جاسادى. ءتۇسىرىلىم كامەراسى سوڭعى تەحنولوگيامەن جاسالعان ەڭبەك، ياعني كينوفورماتتاعى كليپ ويلاعان جەردەن شىعىپ، ءازىربايجاندا، تۇركيادا، اقش-تا تەلەارنالاردان كورسەتىلىپ، سونىمەن قاتار ماسكەۋدىڭ ەكى تەلەارناسىنان تەگىن جىبەرىلدى. مۇندا ماسكەۋلىك مامانداردى كىرىستىرگەن ق.بولمانوۆ، رەجيسسەر رەتىندە ءقازىر اقش-تا جۇمىس جاساپ جاتقان ءباھادۇر يۋلداشيەۆتى تاڭدادى. «بەينەبايانداعى قاسقىرلار (ماسكەۋدەن الدىرىپ) سيۋجەتىن تۇركىتىلدەستەردىڭ توتەمى بولعاندىقتان قوسىپ، ءتۇسىرىلىم بارىسىندا قاۋىپسىزدىك جاعىن دا ويلاستىردى. مۇنداي ساپالى ەڭبەكسىز شوۋ-بيزنەستى جاۋلاپ الۋ ءقازىر مۇمكىن ەمەس»، – دەيدى پروديۋسەر.

– ULYTAU توبى الدىنا قويعان ماقساتىنا جەتە ءبىلدى مە؟ 

– الەمدە روك بار بولعانمەن، قۇرمانعازى جوق قوي. ماسەلەن، «قوڭىر» توبىمەن اۆستريادا ءبىر ساحنادا كونسەرت قويعاندا مارحابات (مىقتىبەكوۆ – رەد.) ايتقان ەدى: «ULYTAU-دى كورىپ، ۇلتتىق مۋزىكانى سينتەزدەۋ كەرەك ەكەنىن ۇقتىم»، – دەپ. ەڭ باستى ماقساتىم – قازاقتىڭ ءداستۇرلى مۋزىكاسىن جاڭا فورماتتا جاستارعا ۇسىنۋ جانە الەمگە تانىتۋ، ۇلتتىق مۋزىكاعا جاڭاشا دەم بەرۋ.

كونسەرۆاتوريا جىلىنا قانشاما كۇيشى مامان دايىندايدى. ءبىراق جاس مامانداردىڭ، تۇلەكتەردىڭ جۇمىسپەن قامتاماسىز ەتىلۋ جاعى قاراستىرىلماعان. كامەرالىق جانردى ورىنداۋشىلار تويعا دا، وركەسترگە دە شاقىرىلمايدى. سوندا ولار قايدا بارادى؟ وسىلايشا دومبىراشى ماماندىعىن تاڭداۋشىلاردىڭ سانى ازايا بەرمەك. كۇيشى دەگەندە ەڭ مىقتى دەگەن ازداعان توپتى عانا بىلەمىز. ال حالىقتىڭ مادەنيەتىنە قوسار ۇلەسى ءۇشىن دومبىراشىلارمەن ەشكىم اينالىسپايدى. ناقتى ماقساتتارى جوق. وسىنى پايىمداي وتىرىپ، جاڭا ءۇردىس قالىپتاستىرىپ، دومبىرانىڭ پارقىن كوتەرۋدىڭ ۋاقىتى دا كەلگەن ەدى.

– قازاقستانداعى شوۋ-بيزنەسكە توقتالىپ وتسەڭىز... 

– شوۋ-بيزنەستى ەكىگە بولەمىن. ءبىرى – جاي عانا شوۋ قوسىلعان بيزنەس. بۇكىل الەمدەگى بيزنەستىڭ بۇل ءتۇرى ءبىرىن-بىرى قايتالاپ، كوشىرۋمەن اينالىسادى دەۋگە بولادى. مىسالى، انگليادا «Spice Girls» توبى بار. ولار قۇرىلعاننان باس­تاپ تانىمالدىق الدى، دۇنيە جۇزىنە البومدارى تاراپ كەتتى. ال ءبىر جىلدان كەيىن موسكۆادا «بلەستياششيە» قىزدار توبى، اراعا بىر-ەكى جىل سالىپ بىزدە «راحات لۋكۋم»، ت.ب. بىرىككەن قىزدار شىعا كەلدى. ياعني، بۇل ءتۇر – كوشىرمە جانە وسى كوممەرسيالىق جوبالاردى ساتۋ. سول سەكىلدى «Backstreet Boys» توبىندا بەس ادام بولسا، وسىنداي بىرىككەن جىگىتتەر رەسەيدە دە بار، سوسىن بىزدەگى «وردا». الەم ساحناسىنا R&B نەمەسە رەگگي ىرعاعىنداعى ستيلدەر شىقتى، سولاردىڭ وتاندىق تۇرلەرى پايدا بولدى. ولاردىڭ ءبارىنىڭ فورماتى ءبىر، تەك ءارقايسىسى ءوز تىلدەرىندە ءان سالادى.

– اعىلشىن پاتشايىمىنىڭ «كوروليەۆا ۆيكتوريا اتىنداعى» التىن مەدالىنە يە بولدىڭىز. الەۋمەتتىك ىزگى باعاسى مەن ەڭبەكتەگى قادىر-قاسيەتى، قاجىرلىلىعى ءۇشىن بەرىلەتىن حالىقارالىق سىيلىققا ULYTAU جوباڭىز ءۇشىن يە بولدىڭىز با؟ 

– ماراپات «جىلدىڭ ۇزدىك ونەرتاپقىشى» دەگەن ماعىنادا ۇسىنىلدى. وسى تۇستا عالىم اقسەلەۋ (سەيدىمبەك) اعانىڭ ULYTAU-دى تىڭداعاندا ايتقان ءسوزى ويىما ورالادى: «اينالايىن، سەن تەندەنسيا (ءۇردىس) جاسادىڭ. تەندەنسيانى ۇلى تۇلعالار عانا جاساي الادى. ءبىراق سەن ۇلىمىن دەپ ويلاپ قالما»، – دەپ، سوندا: «ءتۇسىندىم، اعا، قايداعى ۇلىلىق؟ مەن وسى ەلدىڭ ءبىر بالاسىمىن، ەلىمە قىزمەتىم تيسە قۋانىشتىمىن» دەگەن ەدىم. ءقازىر ءبىزدىڭ مادەني كەڭىستىگىمىزدى باتىستىق اعىمدار جاۋلاپ العىسى كەلەدى. وسىنداي جاھاندانۋ تاسقىنىنا سول ۇردىسىممەن قولىمنان كەلگەنشە بوگەت جاساي بىلسەك، ۇلتتىق دۇنيەلەردى وزىمىزگە سىڭىرە الىپ، «شەت» اعىمدارعا قارسى يممۋنيتەتىمىزدى كۇشەيتۋگە اتسالىسا السام – باقىتتىمىن. قۇدايعا شۇكىر، وسىنداي توپتار ءقازىر كوبەيىپ كەلەدى. بىرەۋىندە قوبىز، ەكىنشىسى سازسىرناي مەن شاڭقوبىز، ۇشىنشىسىندە جەتىگەن دەگەندەي، ايتەۋىر ۇلتتىق مۋزىكا اسپابى مىندەتتى تۇردە قاتىسادى.

– قايتادان انگلياداعى مارا­پاتقا ورالساق. بىلۋىمىزشە بۇل جيىندا دۇنيە تۇكپىرىنەن جينالعان عالىمدار اراسىندا مادەنيەت سالاسىنان ءسىز عانا بولىپسىز؟

– وسى ماراپاتتى ۇيىمداستىرۋشىعا ەكى سۇراعىم بار ەدى دەپ كەزدەسۋگە سۇراندىم. العاشقىسى، مەنى قالاي تاپتىڭىز، ەكىنشىسى، نە ءۇشىن الىپ جاتىرمىن، قانداي كريتەرييلەر بويىنشا ۇسىندىڭىزدار؟ ULYTAU جوباسىن تا­ۋىپ، سالىستىرىپ، تاڭداپ ۇسىنعان ەۋروپا بيزنەس اسسامبلەياسى (ەۆا) ەكەن. ول ىسكەرلىك كووپەراسياسىنىڭ ينتەراكتيۆتى پلاتفورماسى. قاي ۇلتتان بولماسىن، تۇلعالاردىڭ جالپى ادامزاتقا كەلتىرگەن پايداسىن بەلگىلەيدى. «ەتنومۋزىكانى وڭدەپ، الەمدىك شوۋ-بيزنەستىڭ تەحنولوگياسىنا ەنگىزگەنىڭىز ءۇشىن بەرىلەدى. ءسىز تۇتاس تەحنولوگيا ىستەدىڭىز، تەك قانا فورمات ەمەس، ونى ەۋرازيا كەڭىستىگىنە ەنگىزدىڭىز، تاراتتىڭىز»، – دەدى. مەن ۇجىمدى قالاي اتاسام دەپ ويلانىپ جۇرەتىنمىن، «فورمات» دەپ اتاۋ ءدوپ ءتۇستى. ءيا، ناشار كوشىرمە جاساعاننان گورى ناشار ءتۇپنۇسقا ارتىق پا دەيمىن. ويتپەسەك، ءوزىمىزدىڭ بيلان، مايكل دجەكسوندارىمىز قاپتاپ كەتەر ەدى.

– ءقىدىرالى، ءسىز ءوز سالاڭىزداعى ءبىرىنشى كاسىبي پروديۋسەر دەپ باعالاناسىز. بۇرىنعى ابك تريو­سى، تەرمەنىڭ ەسترادالاندىرۋىنا جاساعان قادامىڭىز بەن تۇڭعىش بەينەكليپ، قازىرگى قاراقاتتىڭ مەكتەپ-ستۋدياسى، وتباسىلىق دۋەت، ULYTAU، «بال-بالا» ءوندىرىسى جانە ت.ب. جوبالارىڭىز بار. پروديۋسەر بولۋ ءۇشىن ەڭ باستىسى نە قاجەت؟ 

– ءوز ىسىڭە دەگەن قۇلشىنىس قاجەت. جاڭالىقتى جاريالاۋعا سەزىم، تايسالمايتىن رۋح، مىنەز كەرەك قوي. جالپى مەن ويلاپ تاپقان تۇتاس مەحانيزم ءبىزدىڭ مادەنيەتىمىزدىڭ وركەندەۋىنە جۇمىس ىستەۋدە. اقسەلەۋ اعانىڭ ءسوزى ىلعي جادىمدا: «تىقىل-تىقىل دەگەن مۋزىكانىڭ ءبارى كەلەدى، سوسىن كەتىپ قالادى». Cوڭعى ون جىلدا تالاي توپتار كەلدى، ءىز-تۇزسىز جوعالدى. ماعان شوۋ-بيزنەستە باسقا دا قاراپايىم جولمەن اقشا جاساۋعا مۇمكىندىكتەر بار. ءبىراق العا قويعان ۇستانىمىم تەك اقشا تابۋ ەمەس. ماسەلەن، قاراقات تەك ەسترادامەن شەكتەلمەي، رەپەرتۋارىن دومبىرا، جەتىگەنمەن تولىقتىرىپ، ىزدەنىستە ءجۇر. ول ەشكىممەن شاتاستىرۋعا بولمايتىن ءوز ورنى بار ءانشى. بۇندا پروديۋسەرلىك ۇسىنىم بار. ونىڭ تالانتتىلىعىنان مەنىڭ دە جولىم بولدى. قاراقات سۇلۋ، اقىلدى، كاسىبي ءبىلىمدى جانە تەز شەشىم قابىلداعىش ادام. تەك قانا ءبىلىمدى بولۋ بۇل سالاعا ازداۋ ەكەن، ءار نارسەدەن حابارىڭ بولۋى كەرەك، سەزىمتالدىق قاجەت.

جەزقازعاندا سۋرەتشىلىك مامان­دىعىن الدىم. سوسىن «جىگەر» فەس­تيۆالىنە (1988) كەلىپ، سول جەردەن مەنى ت.جۇرگەنوۆ اتىنداعى ۋنيۆەرسيتەتتىڭ ءۇشىنشى كۋرسىنا قابىلدادى. سۋرەتشى رەتىندە مەنىڭ تالعامىم، پايىمدىلىعىم قالىپتاسسا، تەاتر ينستيتۋتىندا مۋزىكالىق ءبىلىم الدىم. بۇلاردىڭ ءبارى ونەر جولىمدا پايداعا اسىپ وتىر

– بۇگىنگى ۋاقىتتا ءسىزدى نە قىزىقتىرادى؟ 

– ماعان ءبارى قىزىق. الدىمەن ماركەتينگ، سوسىن بيزنەس قىزىق. ودان كەيىن ۇلتتىق يدەيانى ساۋاتتى ناسيحاتتاۋ قىزىق. كوممەرسياسىز ەشبىر يدەيا دامي المايدى. ەگەر ULYTAU مۋزىكاسىن ساتا الماساق، ول ون بەس جىل بويى ساحنادا قالا الماس ەدى. بۇگىنگە دەيىنگى ULYTAU اينالىمىن ايتار بولساق، تەك جالاقىسىنا سالىنعان قاراجاتتىڭ ءوزى كوپ. ولاردىڭ ءار ايلىق جالاقىسى جەتى مىڭ جارىم دوللار. ال ولاردىڭ دامۋىنا، اپپاراتۋراسىنا، كامەراسىنا، بەينەكليپتەرىنە، اينالىمى شە؟ كيىمى مەن شەتەل ساپارلارىن دا ۇمىتپاڭىز. ول قاراجاتتى مەن قايدان الدىم؟ مۋزىكانى ساتىپ، تۇسكەن قاراجاتتى قايتا سالىپ وتىردىم. قارىز الىپ، قايتا سالعان كەزدەر دە بولدى، ادال ەڭبەك ەتىپ كەلەمىز.

– ءقىدىرالى نۇرتاي ۇلى، قازاق ەستراداسىن ۇلتتىق رۋحانياتىمىزعا قاراي بۇرۋ جولىندا زور ۇلەسىڭىز بار. جاستارعا تاربيەنىڭ ەڭ جاقسىسى – ۇلگى كورسەتۋ، ونەگە بولا ءبىلۋ. ونەر جولىڭىزدا تالاي باستامانىڭ باسىندا تۇرسىز، جاساپ، كورسەتىپ كەلەسىز. قولىڭىزدا مۇمكىندىك بولسا قازاق ەستراداسى ءۇشىن تاعى نە جاسار ەدىڭىز؟

– ءوسىپ كەلە جاتقان ۇرپاققا ساپالى، زاماناۋي، ۇلتتىق تامىردان الشاقتاماعان دۇنيە كورسەتسەڭ، وزدەرى-اق بۇرىلادى. سوندا قاداعالاۋ دا، ءبۇيت، ءسويت دەگەن ۇكىمدى سوزدەر دە كەرەك بولماي قالادى. دەسەك تە، قولىمدا بيلىك بولسا، ەڭ الدىمەن وتە زور ىقپال جاساي الاتىن تەلەارنالار بولعاندىقتان، بىرنەشە تەلەارنالار فورماتىن وزگەرتەر ەدىم. ۇلتتىق يدەولوگياعا قىزمەت ەتەتىن جۇمىستاردى جۇمىلدىرىپ، ارنانى 180 گرادۋسقا بۇرار ەدىم.

ءبىز، جۇماگەلدى ناجىمەدەنوۆتىڭ ايتۋىنشا، «قازاقتىڭ يممۋنيتەتى – دومبىرانى» ناسيحاتتاپ جۇرگەن ULYTAU روك-توبىنا تەك قانا ساتتىلىك، اق جول تىلەيمىز. ارينە، «گرەمميگە» قول جەتكىزۋىنە تىلەكتەسپىز. باسقا مەملەكەتتەر ەلدىڭ اتىن شىعارىپ، ابىرويىن اسقاقتاتاتىن توپتارعا دەمەۋشىلىك تانىتىپ جاتىر. كەڭ اۋقىمداعى بايگەگە وزدەرىنىڭ ماقتانىشتارىن قوسىپ جاتقاندا وزىمىزدە بار دۇنيەنى نەگە قولداماسقا دەپ ويلاناسىڭ ءبىر ءسات.

 باقىت تۇرماعامبەتوۆا،

ونەرتانۋشى

"تۇركىستان"