پارلامەنت سەناتى جوعارعى سوت ءتوراعاسى لاۋازىمىنا ۇسىنىلعان اسانوۆ جاقىپ قاجمان ۇلىنىڭ كانديداتۋراسىن قولدادى. بۇل تۋرالى اقوردانىڭ تۆيتتەردەگى پاراقشاسىندا حابارلاندى.

اسانوۆ جاقىپ قاجمان ۇلى 1963 جىلى 17 تامىزدا قىزىلوردا قالاسىندا تۋعان. 1980 جىلى قىزىلوردا وبلىسى سىرداريا اۋدانى تەرەڭوزەك كەنتىندەگى ا. جدانوۆ اتىنداعى №36 ورتا مەكتەپتى ءتامامداپ، وسى جىلى كيروۆ اتىنداعى قازاق مەملەكەتتىك ۋنيۆەرسيتەتىنە «قۇقىقتانۋ» ماماندىعى بويىنشا وقۋعا تۇسەدى.

1985 جىلى ۋنيۆەرسيتەتتى اياقتاعاننان كەيىن قىزىلوردا وبلىستىق ادۆوكاتتار كوللەگياسىنا ماشىقتانۋشى (ستاجەر) بولىپ قابىلدانادى. جارتى جىلدان كەيىن قىزىلوردا قالاسى پروكۋرورىنىڭ كومەكشىسى بولىپ تاعايىندالادى.

1986 جانە 1993 جىلدار ارالىعىندا قىزىلوردا وبلىسىنىڭ پروكۋراتۋرا ورگاندارىندا پروكۋروردىڭ كومەكشىسى، اعا كومەكشىسى جانە وبلىستىق پروكۋراتۋرانىڭ ءبولىم باستىعى قىزمەتتەرىن اتقارادى. 

1993 جىلى قازاقستان رەسپۋبليكاسى باس پروكۋراتۋراسىنىڭ ورتالىق اپپاراتىنا جالپى قاداعالاۋ باسقارماسىنىڭ اعا پروكۋرورى قىزمەتىنە اۋىسادى، ال 4 ايدان كەيىن قازاقستان رەسپۋبليكاسى باس پروكۋراتۋراسىنىڭ جالپى قاداعالاۋ باسقارماسىنىڭ بانكتەر، قارجى-نەسيە سالاسىنداعى جانە تەكسەرۋ ورگاندارىنداعى زاڭنامانىڭ ساقتالۋىن قاداعالاۋ ءبولىمىنىڭ باستىعى قىزمەتىنە تاعايىندالادى.

1995 جىلدىڭ قاراشا ايىندا قازاقستان رەسپۋبليكاسى پرەزيدەنتى اكىمشىلىگىنىڭ زاڭدىلىق، قۇقىقتىق ءتارتىپ جانە سوت رەفورماسىن قامتاماسىز ەتۋ ءبولىمىنىڭ كەڭەسشىسى قىزمەتىنە اۋىسادى. ءبىر جىلدان كەيىن وسى ءبولىمنىڭ سەكتور مەڭگەرۋشىسى بولىپ تاعايىندالادى.

1996- 1997 جىلدار ارالىعىندا وڭتۇستىك قازاقستان وبلىسىنىڭ سالىق پوليسياسى باسقارماسى باستىعىنىڭ ءبىرىنشى ورىنباسارى بولىپ قىزمەت اتقارادى. كەيىننەن، 1997 جىلدىڭ ءساۋىر ايىندا قازاقستان رەسپۋبليكاسى باس پروكۋراتۋراسىنىڭ ورتالىق اپپاراتىنا باس پروكۋروردىڭ اعا كومەكشىسى - الەۋمەتتىك-ەكونوميكالىق سالاداعى زاڭدىلىقتى قاداعالاۋ باسقارماسى باستىعىنىڭ ورىنباسارى بولىپ قايتا ورالادى. ءبىر جىلدان كەيىن باسقارما باستىعى، ودان كەيىن باس پروكۋراتۋرانىڭ مەملەكەتتىك ورگاندار قىزمەتىندەگى زاڭدىلىقتى قاداعالاۋ دەپارتامەنتىنىڭ باسشىسى قىزمەتىنە تاعايىندالادى.

2001 جىلدان 2002 جىلعا دەيىن الماتى قالاسى پروكۋرورىنىڭ ءبىرىنشى ورىنباسارى قىزمەتىنە كىرىسەدى، ال 2002 جىلدىڭ اقپان ايىنان 2003 جىلدىڭ ماۋسىم ايىنا دەيىن – پاۆلودار وبلىسىنىڭ پروكۋرورى، ودان سوڭ ەكى جىل قازاقستان رەسپۋبليكاسىنىڭ ادىلەت ۆيسە-مينيسترى قىزمەتىن اتقارادى.

سوڭعى ەكى جىلدا ج. اسانوۆ مەملەكەتتىك قىزمەتتەن تىس بولدى. اتاپ ايتقاندا، قازاقستان جۇمىس بەرۋشىلەرى مەن كاسىپكەرلەرىنىڭ «اتامەكەن» جالپىۇلتتىق وداعىنىڭ اتقارۋشى ديرەكتورىنىڭ ورىنباسارى، ال 2006 جىلدىڭ ناۋرىز ايىنان 2007 جىلدىڭ 1 قىركۇيەگىنە دەيىن – «ورداباسى» كورپوراسياسى» اق-نىڭ پرەزيدەنتى جانە ديرەكتورلار كەڭەسىنىڭ مۇشەسى قىزمەتتەرىن اتقاردى.

«قازاقستان رەسپۋبليكاسى تاۋەلسىزدىگىنە 10 جىل» مەرەكەلىك مەدالىمەن ماراپاتتالعان جانە «قازاقستان رەسپۋبليكاسى پروكۋراتۋراسىنىڭ قۇرمەتتى قىزمەتكەرى» اتاعىنىڭ يەگەرى.