انكارادا تۇركيا جانە رەسەي پرەزيدەنتتەرىنىڭ كەزدەسۋى ءوتتى، دەپ جازادى Qamshy.kz اقپارات اگەنتتىگى.

باسشىلار ەكى ەلدىڭ ىنتىماقتاستىعى جونىندە ءسوز قوزعاي كەلە، ساۋدا بايلانىسى مەن سيريا ماسەلەلەرىن تالقىلادى.

ەردوعان رەسەي مەن تۇركيا اراسىنداعى ساۋدا اينالىمىنىڭ ۇستىمىزدەگى جىلدىڭ العاشقى 10 ايىندا 30 پايىزعا ارتقانىن تىلگە تيەك ەتتى.

قورعانىس اياسىنداعى ارەكەتتەردى ايتا كەلىپ، تۇرىك باسشىسى اپتا ىشىندە ەكى ەلدىڭ وكىلدەرى س-400 زەنيتتى-زىمىراندىق كەشەندى ساتىپ الۋ ماسەلەسى جونىندە كەلىسسوزدەر جۇرگىزەتىنىن مالىمدەدى.

سونداي-اق، ەردوعان مەن پۋتين سيرياداعى احۋالدى تالقىعا سالدى. وسى باعىتتاعى كەلەسى قادام سوچيدە وتەتىنى ايتىلدى.

بۇدان بولەك تۇركيا پرەزيدەنتى تاياۋ شىعىستاعى جاعدايدى دا نازاردان تىس قالدىرمادى.

ەردوعاننىڭ سوزىنە سۇيەنسەك، يەرۋساليمگە قاتىستى ماسەلەدە تۇركيا مەن رەسەي باسشىلىعىنىڭ ۇستانىمدارى ۇقساس كەلەدى. ەردوعان اتالمىش ماسەلەگە قاتىستى بايلانىستى جالعاستىرۋ تۋرالى شەشىم قابىلداعانىن ايتتى.

ونىڭ ايتۋىنشا، يزرايل اقش-تىڭ شەشىمىن پالەستينالىقتارعا جاسالعان قىسىم دەپ ءتۇسىندى. ورىن العان قىلمىستىق ارەكەتتەرگە جول بەرمەۋ كەرەكتىگىن ەسكەرتتى.

ءوز كەزەگىندە رەسەي پرەزيدەنتى تۇرىك باسشىسىمەن ءبىرىنشى كەزەكتە تاياۋ شىعىس پەن سيرياداعى جانجالعا قاتىستى ماسەلەلەردى تالقىعا سالعانىن ايتتى.

پۋتين اقش-تىڭ يەرۋساليمدى ءيزرايلدىڭ استاناسى رەتىندە مويىنداۋ تۋرالى شەشىمىن تۇراقسىزداندىرۋ دەپ سانايدى. سونداي-اق پالەستينانىڭ  مارتەبەسى اياسىندا يزرايل مەن پالەستينانىڭ اراسىندا تىكەلەي بايلانىستار قاجەت ەكەنىن اتاپ ءوتتى.