شەتەلدىك باق-تىڭ وكىلى دجافار ابدۋل كاريم اممانا تۇرعىندارىنىڭ اراسىندا ايەلدەردىڭ جۇمىس جاساۋىنا قاتىستى ساۋالناما جۇرگىزدى، — دەپ حابارلايدى Qamshy.kz اقپارات اگەنتتىگى. اممانا يسلام مەملەكەتتەرىنىڭ ءبىرى يوردانيا ەلىنىڭ استاناسى. دجافار ابدۋل كاريم جەرگىلىكتى تۇرعىنداردان «ايەلىڭىزدىڭ نەمەسە قارىنداسىڭىزدىڭ جۇمىس جاساۋىنا قالاي قارايسىز؟»، — دەپ سۇراق قويدى.
ساۋالناماعا قاتىسۋشىلاردىڭ بارلىعى دەرلىك ءوز قارسىلىعىن ءبىلدىردى. تەك ءبىر ساۋالناماعا قاتىسۋشى ازامات قانا ايەلىنىڭ جۇمىس جاساۋىنا قارسى بولمايتىنىن ايتتى. ول «تەك جۇمىس ورنى ءقاۋىپسىز بولۋى كەرەك»، — دەدى.
«بۇل مۇمكىن ەمەس جاعداي. ايەل ادام ۇيدەن اكەسىنىڭ نەمەسە كۇيەۋىنىڭ رۇقساتىنسىز شىقپاۋى كەرەك»، دەيدى ساۋالناماعا قاتىسۋشى يوردانيالىق.
«ايەلىم، قارىنداسىم، اپكەم جۇمىس جاسايتىن بولسا مەنىڭ ەركەكتىگىمنەن نە قالادى؟ ايەلىم، اپكەم مەن قارىنداسىم — مەنىڭ نامىسىم. سوندىقتان بۇل وتە ماڭىزدى. ەگەر مەن ايەلىمە جۇمىس جاساۋعا رۇقسات ەتەتىن بولسام، ول اقشا ءۇشىن بوتەن جەردە قىزمەت ەتەتىن بولسا مەن نامىسىمنان، ەركەكتىگىمنەن ايىرىلامىن»، — دەپ جاۋاپ بەردى ساۋالناماعا قاتىسۋشى.
دجافار ابدۋل كاريم ەر ازاماتتاردىڭ بىرىنەن «ەگەر ايەلىڭىز سىزگە قارسىلىق تانىتسا نە ىستەيسىز؟»، —دەپ سۇراق قويدى. ساۋالناما قاتىسۋشىلاردىڭ ءبىرى ايەلىن ويلانباستان ولتىرەتىنىن ايتتى.
«بۇعان تىيىم سالىنعان. بۇل – اردىڭ ءىسى. ەركەگى بار ءۇيدىڭ اسىراۋشىسى دا ەركەك. ەگەر ماعان قارسى شىقسا مەن ونى اتىپ تاستايمىن. مەن ونى ولتىرەمىن. مەن شىندىعىمدى ايتتىم. بۇل جەردە ەشقانداي ابەستىك جوق. بۇل — ءبىزدىڭ نامىسىمىز»، — دەپ كۇلىپ جاۋاپ بەردى ول.
