ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ وسى كۇندەرى ابۋ-دابيدە ءوتىپ جاتقان مۇسىلمان قوعامىندا بەيبىتشىلىكتى نىعايتۋ بويىنشا «الەمدىك بەيبىتشىلىك جانە يسلاموفوبيا» تاقىرىبىنداعى IV حالىقارالىق فورۋمعا قاتىستى دەپ حابارلايدى Qamshy.kz اقپارات اگەنتتىگى.
فورۋمنىڭ ماقساتى – يسلاموفوبيانىڭ مازمۇنى مەن سەبەپتەرىن جانە ءدىن سالاسىندا بولىپ جاتقان پروسەسستەردى وي ەلەگىنەن وتكىزۋ، يسلام ءدىنىنىڭ بۇرمالانۋىن بولدىرماۋ، سونداي-اق تولەرانتتىلىق، بەيبىتشىلىك پەن ادىلەتتىلىك مادەنيەتىن ناسيحاتتاۋ بولىپ سانالادى.
«ءبىز مۇسىلماندار، يسلاموفوبياعا قارسىمىز، ءبىراق ءبىز بۇل ءۇشىن جاۋاپكەرشىلىكتىڭ ءبىر بولىگى وزىمىزدە جاتقاندىعىن مويىنداۋىمىز كەرەك. بۇل جەردە ءدىني فاناتيكتەر مەن پروۆاكاتورلارعا جوعارى رۋحاني قۇندىلىقتاردى تاربيەلەۋدىڭ ورنىنا، وزدەرىنىڭ راديكالدى كوزقاراستارى مەن تاسىلدەرىن تاراتۋعا مۇمكىندىك بەرىپ قويعاندىعىمىز تۋرالى ايتىپ وتىرمىن»، - دەدى ن. ەرمەكبايەۆ فورۋم اياسىندا سويلەگەن سوزىندە.
سونداي-اق، مينيستر قازاقستاننىڭ مادەنيەتتەر مەن دىندەردى جاقىنداستىرۋ جانە حالىقتاردىڭ تۇراقتىلىعى مەن ءوزارا تۇسىنىستىگىن قامتاماسىز ەتۋ ماقساتىندا شىعىس پەن باتىس اراسىنداعى ديالوگتى دامىتۋداعى قازاقستان باسشىسىنىڭ باستامالارى تۋرالى ايتتى.
«قازاقستان پرەزيدەنتىنىڭ جاھاندىق باستامالارى قاتارىندا 2003 جىلدان بەرى ءبىزدىڭ ەلوردامىز – استانا قالاسىندا ءۇش جىلدا ءبىر رەت وتەتىن الەمدىك جانە ءداستۇرلى دىندەر كوشباسشىلارىنىڭ سەزدەرىن وتكىزۋ ەرەكشە ورىن الادى. بۇل حالىقارالىق فورۋمنىڭ ماقساتى - جاھاندىق جانە وڭىرلىك قاۋىپسىزدىكتى قامتاماسىز ەتۋ تەتىكتەرىنىڭ ءبىرى رەتىندە مادەنيەتتەر مەن وركەنيەتتەر ديالوگىن دامىتۋ. وسى جىلدار ىشىندە قازاق جەرىندە ءداستۇرلى دىندەردىڭ 5 رەت سەزى وتكىزىلدى، جانە ونىڭ اياسىندا اسا ماڭىزدى قۇجاتتار قابىلداندى»، - دەپ اتاپ ءوتتى نۇرلان ەرمەكبايەۆ.
ايتا كەتەيىك، فورۋم جۇمىسىنا بۇكىل الەمنىڭ 500-دەن استام بەدەلدى ءدىني قايراتكەرلەرى، تانىمال تەولوگتار، ساياساتكەرلەر مەن قوعام قايراتكەرلەرى قاتىسۋدا. فورۋم دەلەگاتتارىن ءابۋ-دابيدىڭ مۇراگەر حانزاداسى شەيح مۇحاممەد بەن زايد ءال ناحايان قابىلدادى.
