«رۋح» حالىقارالىق ادەبي بايقاۋى ءوز مارەسىنە جەتىپ، 12 جەلتوقساندا جەڭىمپازدارى ماراپاتتالدى، دەپ جازادى Qamshy.kz اقپارات اگەنتتىگى.

قاراشانىڭ 17-سىنەن 5-ىنە دەيىن جالعاسقان ادەبي دوداعا ەل ىشىنەن بولەك شەتەلدىك قالامگەرلەر دە قاتىسۋعا نيەت بىلدىرگەن. ادەبي سىندا باعىمدى سىنايمىن دەگەندەردىڭ جاسىنا، ماماندىعىنا ەشقانداي شەكتەۋ قويىلمادى.

دودانىڭ ءبىر ەرەكشەلىگى – شىعارمالار قازاق، ورىس، اعىلشىن تىلدەرىندە قابىلدانعان. ناتيجەسىندە قازىلار القاسىنىڭ الدىنا 8 اتالىم بويىنشا مىڭنان اسا ەڭبەك تۇسكەن. ونىڭ 899-ى بايقاۋ تالاپتارىنا ساي كەلىپ، «ادەبيەت» پورتالىنا جاريالانعان. رومان، پوۆەست، پوەزيا، پوەما، دراما سىندى ءتۇرلى اتالىمدار بويىنشا توپ ىشىنەن وزىق شىققاندار سالتاناتتى تۇردە ماراپاتتالدى. ءبىرىنشى ورىن يەگەرلەرى ارنايى ديپلوم مەن ءبىر ميلليون تەڭگە كولەمىندە اقشالاي سىياقىنى ەنشىلەسە، گران-پري جۇلدەگەرلەرى ەكى ميلليون تەڭگەنى يەلەندى.

بايقاۋدىڭ «پروزا: رومان، پوۆەست» نوميناسياسى بويىنشا 1 ورىن ديپلومىن، ارنايى كادەسىي جانە 1 ميلليون تەڭگە سىياقىنى «جىلقى اتىلعان جاز» رومانى ءۇشىن ىرىسبەك دابەي يەلەنسە، باس جۇلدە مەن 2 ميلليون تەڭگە اقشالاي قاراجات «رۋحتار جەردەن كەتەدى» رومانى ءۇشىن تىنىمباي نۇرماعامبەتوۆكە بەرىلدى

«پروزا: اڭگىمە، ەسسە» نوميناسياسىنداعى 1 ورىندى «داياعاششى» ەسسەسى ءۇشىن ۇلاربەك نۇرعالىم، باس جۇلدەنى - «تاعدىر» اڭگىمەسىنىڭ اۆتورى نەسىپبەك ءداۋتاي ۇلى جەڭىپ الدى.

 «پوەزيا: پوەما» نوميناسياسىنداعى 1 ورىن «جاڭعىرۋ جىرى» پوەماسى ءۇشىن نەسىپبەك ايتۇلىنا، گران-پري - «رۋح جىرى» تۋىندىسى ءۇشىن باقىت بەدەلحانۇلىنا تابىس ەتىلدى.

«پوەزيا: توپتاما ولەڭدەر» ساناتىندا 1 ورىنعا «رۋباي» ولەڭدەر توپتاماسى ءۇشىن تاتارستاندىق راۋزا حۋزاحمەتوۆا لايىق دەپ تانىلدى. باس جۇلدە - «قۇدايعا قارايتىنداي قاسقايىپ...» اتتى ولەڭدەر توپتاماسى ءۇشىن ىقىلاس وجايۇلىنا بەرىلدى.

«ۇزدىك دراماتۋرگيا» نوميناسياسىندا 1 ورىندى «مەن، مەن ەشكىم دە ەمەسپىن» پەساسى ءۇشىن ارداق نۇرعازى جەڭىپ الدى. باس جۇلدە - «قازاقشا اشىلىپ سايراۋ» پەساسى ءۇشىن سەرىك اسىلبەكوۆكە تابىستالدى.

«ۇزدىك ادەبي سىن» 1 ورىن ديپلومىمەن «ماركەستىڭ قارا قولعابى» ماقالاسى ءۇشىن جاس سىنشى بەكزات سماديار ماراپاتتالدى. ال باس جۇلدە مەن 2 ميلليون تەڭگە سىياقى «تۇراقسىز الەمنىڭ سۋرەتكەرى» ءۇشىن امانگەلدى كەڭشىلىكۇلىنا بۇيىردى.

«پوەزيا (بالالارعا ارنالعان ولەڭدەر)» بويىنشا 1 ورىندى «بالاپانىم، اۋزىڭدى اش» ولەڭدەر توپتاماسى ءۇشىن قۇل-كەرىم ەلەمەس يەلەنسە، «قاسيەتتى قازاقستان» توپتاماسىنىڭ اۆتورى سەرىكبول حاسان باس جۇلدەنى جەڭىپ الدى.

«پروزا (بالالارعا ارنالعان پروزالىق شىعارمالار)» ساناتى بويىنشا 1 ورىن مەن 1 ميلليون تەڭگە «زوۆ سولنسا» شىعارماسى ءۇشىن الماتىلىق ليليا كالاۋسقا، باس جۇلدە مەن 2 ميلليون تەڭگە سىياقى - «قۇربى قىزدار قۇپياسى» رومان-فەنتەزيى ءۇشىن ايسۇلۋ الماشقا بەرىلدى.

قازىلار القاسىنىڭ ءتوراعاسى بولعان جازۋشى تولەن ابدىك شىعارمالاردىڭ كۇن-تۇن دەمەي وقىلعانىن ايتتى.

«ءبارىن سالىستىردىق. ودان كەيىن داۋىس بەرۋ دەگەن ماسەلە بار. داۋىس بەرۋ ارقىلى شەشتىك. وسىنىڭ ءبارى ءبىزدىڭ ادەبيەتىمىزدىڭ دامۋىنا يەگى ىقپال ەتەدى دەپ ەسەپتەيمىن»، - دەدى جازۋشى.

«رۋحاني جاڭعىرۋ» باعدارلاماسىنىڭ اياسىندا العاش رەت وتكىزىلگەن حالىقارالىق ادەبي بايقاۋدى ەندى ءداستۇرلى تۇردە ۇيىمداستىرىپ تۇرۋ جوسپارلانىپ وتىر.