سيريادان شىعارىلعان دايش-تىقتار اۋعانستاننىڭ سولتۇستىگىندە، وزبەكستان مەن تۇركمەنستان اراسىندا جاڭا جاتتىعۋ لاگەرلەرىن قۇردى دەپ جازادى Qamshy.kz اقپارات اگەنتتىگى فرانس پرەسس-كە سىلتەمە جاساپ.

ورتا ازيا ەلدەرىندەگى ۋشىققان جاعداي تۋراسىندا وتانداسىمىز ساياساتتانۋشى ماكسيم كازناچەيەۆ ءازىربايجاندىق Haqqin.az پورتالىنا سۇحبات بەردى.

- دايش سودىرلارىنىڭ وزبەكستان مەن تۇركمەنستانعا باسىپ كىرۋ ءقاۋپى جوعارىلاي ءتۇستى. سودىرلار وتكەن جىلى-اق اۋعانستاننىڭ سولتۇستىگىنە جينالا باستاعان. وندا ەتنيكالىق وزبەكتەر مەن تۇركمەندەر تۇرادى. سوندىقتان سودىرلاردىڭ ورتاعا ءسىڭىسىپ، جالعان بەت-پەردە جاساۋعا مۇمكىندىكتەرى زور. سيرياداعى جەڭىلىستەن كەيىن دايش ورتالىق ازيانى جايلاۋعا تىرىساتىنى بۇعان دەيىن دە تالاي مارتە ايتىلدى.

ساراپشىلاردىڭ ويىنشا، تۇركمەنستانعا ءقاۋىپ ءتونىپ تۇر. اۋعانستانمەن شەكتەسەتىن وزبەكستان شەكاراسىندا تۇركمەنستانمەن سالىستىرعاندا باقىلاۋ كۇشتى. سەبەبى شەكارا امۋداريا وزەنىمەن جالعاسىپ جاتىر. ال تۇركمەنستان مەن اۋعانستاننىڭ ورتاسى ءشول دالامەن بولىنگەن.

تۇركمەنستان جانە وزبەكستاننىڭ قورعانىس كۇشى اۋعانستانداعى جاعدايدى ءجىتى نازارىنا العان. سولتۇستىك اۋعانستان مەن كابۋلداعى بيلىك باقىلامايتىن اۋدانداردى سودىرلاردىڭ باسىپ الۋ ءقاۋپى جوعارى.

- سولتۇستىك اۋعانستان دايش ءۇشىن اشىق الاڭعا اينالدى. سوندىقتان تاشكەنت پەن اشحاباد انتەرروريستىك قىزمەتىن كۇشەيتتى. باستاپقى كەزدە-اق دايش قاتارىندا ورتا ازيا تۋمالارى كوپ ەكەنى بەلگىلى بولعان. قازاقستاننىڭ ۇلتتىق قاۋىپسىزدىك كوميتەتىنىڭ مالىمەتىنشە، سيريادا 300-گە جۋىق قازاقستاندىق سوعىسقان. دايش-تىقتار قازاقستاننىڭ كەيبىر جەرلەرىن باسىپ الۋعا قاۋقارى جەتپەيدى دەسەك تە، تەراكتى جاساۋى مۇمكىن، - دەيدى ساراپشى.  

ساياساتتانۋشى سوڭعى ەكى جىلدا قازاقستاننىڭ كەيبىر وبلىستارىندا قۇقىق قورعاۋ ورگاندارى قىزمەتكەرلەرىنە شابۋىل جاسالعانىن دا اتاپ ءوتتى. ۇكىمەت تەرروريستىك توپتاردىڭ جولىن كەسۋ ءۇشىن بارىن سالۋدا جانە جاقىن شىعىستان كەلگەن سودىرلاردى ءجىتى باقىلاۋدا ۇستايدى. استانا وڭتۇستىكتەگى كورشىمىزدەگى جاعدايدى قاداعالاپ وتىر. ولار سوققىنى العاشقىلاردىڭ ءبىرى بولىپ قابىلداۋى مۇمكىن. قازاقستان ولارعا كومەكتەسەدى. تەرروريستەردى توقتاتۋ ءۇشىن كۇشتەردى بىرىكتىرۋ قاجەت.