قۇزىرلى ورگاندار ونەر يەلەرىنە سالىناتىن تابىس سالىعىنا ءجىتى ءمان بەرمەك. الايدا، بۇل قادام انشىلەر قاۋىمى نارازىلىعىن تۋدىرىپ وتىر دەپ حابارلايدى "الماتى" ارناسى.

شوۋ-بيزنەستە قوماقتى قارجى تاۋىپ جۇرگەن ءانشىنىڭ ءبىرى ايقىن تولەپبەرگەن، فوربس باسىلىمىنىڭ ەسەبىنشە جىلىنا 700 مىڭ، ال ءوزىنىڭ ايتۋىنشا 350 مىڭ دوللار كولەمىندە تابىس تابادى. سالىق تولەۋشى رەتىندە تىركەلگەنىنە ءۇش جىل بولعان. ءبىراق وسى ارالىقتا مەملەكەتكە تولەگەن سالىعى 100 مىڭ تەڭگە عانا. تولەنگەن سالىق تابىس كولەمىنە مۇلدەم سايكەسپەيدى ەكەن.

"مەن ءۇش جىلداي بولدى سالىق تولەپ تىركەلگەنىمە. جەكە كاسىپكەرلىگىم بار. ەگەر وسى جەكە كاسىپكەرلىكتەن اقشا وتەتىن بولسا وندا مىندەتتى تۇردە تولەيمىن"، - دەدى ءانشى ايقىن تولەپبەرگەن.

انشىلەردىڭ بارلىعى جەكە كاسىپكەر رەتىندە تىركەلۋى ءتيىس دەگەن زاڭ بۇرىننان بار. ءبىراق ونى جۇزەگە اسىرۋ بيىلدان باستاپ قاتاڭ تۇردە باقىلانباق.

زاڭعا قۇلاق اسپاعاندارعا قولدانىلاتىن شارانىڭ سالماعىدا اۋىر. ونداي جاعدايدا انشىلەردىڭ ەسەپ شوتى جابىلىپ، مۇلىگى شەكتەلمەك.

ونەر ادامدارى بۇل زاڭدى "مادەنيەتتى وركەندەتۋگە بالتا شابۋ" دەپ سانايدى.

"ءقازىر ەندى توي-تومالاقتا ولەڭ ايتىپ جۇرگەننەن كەيىن ولاردان ءبىر نارسە الۋدىڭ ءوزى ۇيات. بەت-الدى كەلىپ ەش كومەكتەسپەستەن اقشا بەر دەپ قيناۋدىڭ ءوزى ەسسىز تىرلىك دەپ ويلايمىن"، - دەيدى ءانشى نۇرلان ەسپانوۆ.

ەلدەگى انشىلەردىڭ كوبى قوماقتى تابىس تاپقانمەن، ونىڭ نەگىزگى بولىگى تويدان تۇسەدى. ءارى الىس-بەرىستىڭ 90 پايىزى ەسەپ-شوت ارقىلى ەمەس، قولما-قول ارقىلى جۇزەگە اسىرىلادى. سوندىقتان قانشا جەردەن ءانشى، ارتىستەردىڭ تابىسى قاتاڭ باقىلانادى دەگەنمەن، شىندىعىندا ول ءىستى جۇزەگە اسىرۋ سالىقشىلار ءۇشىن قيىن بولماق.

"انشىلەرىمىزدىڭ تابىسى ءبىر جىلدا 250 مىڭنان استاتىن بولسا، وندا جەكە كاسىپكەر نەمەسە زاڭدى تۇلعا رەتىندە تىركەلۋى مىندەتتى. سوندىقتان اكىمشىلىك حاتتاما تولتىرىلماسىن دەسە وسى مىندەتتەمەنى ورىنداعاندارى دۇرىس"، - دەدى الماتى قالالىق سالىق دەپارتامەنتi ءتۇسiندiرمە باسقارماسىنىڭ باسشىسى داۋرەن نۇرعوجايەۆ.

دەرەككوز: "الماتى" ارناسى