مارات قاجى ەسەنبايەۆ 18 جاستاعى ارۋمەن نەكەسىن قيدى. بۇعان دەيىن "سىناق مەرزىمىندە" جۇرگەن گۇليار ەسىمدى ارۋ ەندى اتىشۋلى سارى اۋليەنىڭ زاڭدى ايەلى.

قازىرگى ۋاقىتتا ولار پەرزەنت كۇتىپ ءجۇر ەكەن.

مارات قاجى بۇعان دەيىن "ۇيدەگى بايبىشەلەر ءتورتىنشى ايەلدى "قاشان اكەلەسىڭ" دەپ اسىعا توسىپ ءجۇر. تاربيەمىز تازا مۇسىلمانشا بولعاندىقتان، بۇنداي جاعدايلار ءبىزدى قايتا قۋانتادى. ءوزىم بۇل قىزدى ءالى جاس، ەس توقتاتسىن، تاربيەمە باعىنار بولسا عانا ۇيلەنەمىن، ءالى جازعا دەيىن مەنىڭ سىناعىمنان وتەدى"، - دەگەن بولاتىن.

گۇليار مارات قاجىنىڭ سەنىمىن اقتاپ، دەگەنىنە كونسە كەرەك، قىس وتپەي جاتىپ ولار وتباسىن قۇرۋعا بەل بۋىپتى.

بۇل مارات قاجى مەن گۇلياردىڭ زاڭدى نەكەلەسۋ كەزىندەگى تۋىستارىمەن تۇسكەن سۋرەتى.

مارات قاجىنىڭ ءوزى "سوڭعى كەزدەرى باۋىرىم قاتتى مازامدى الىپ ءجۇر. وزىمە قاراۋعا  ا ۋاقىتىم جوق. تۇبىندە مەنى الاتىن دەرت قوي. جاقىندا وتا جاساتامىن دەپ وتىرمىن. دارىگەرلەر باۋىرىمنىڭ دەرتى اسقىنىپ كەتكەن دەپ جاتىر. ەندى بارلىعى دا ۋاقىت ەنشىسىندە"، - دەيدى دەنساۋلىعىنا قاتىستى.

بۇل كىسى مارات قاجىنىڭ وزىنەن التى جاس كىشى ەنەسى. ياعني جارى گۇلياردىڭ - اناسى.

مارات قاجى ءوز سوزىندە  "ەكى تاراپتىڭ تۋىستارى دا باس قوسقانىمىزعا ءدان ريزا. جەكجاتتىق قارىم-قاتىناس باستالىپ تا كەتتى"، - دەيدى.

مارات قاجى ەل اراسىندا "سارى اۋليە" اتىمەن 90-شى جىلدارى كەڭىنەن تانىلعان ەدى. ول قازاقستاننىڭ ءار ايماعىنا، ەمدىك سەانسىن وتكىزۋگە كەلگەن كەزدە ۇلكەن ستاديونداردىڭ وزىنە حالىق سىيماي قالاتىن.

جاقىندا عانا بەرگەن سۇحباتتارىنىڭ بىرىندە مارات قاجى، ءوزىن ارنايى شەت ەلدەرگە شاقىراتىندار كوپ ەكەنىن ايتقان ەدى. ەمىنىڭ باعاسى 4000 اقش دوللارىنان 80 000 اقش دوللارىنىڭ ارالىعىندا ەكەن. ەستەرىڭىزدە بولسا، بىرنەشە جىل بۇرىن مارات قاجىنىڭ ۇلكەن ەكى قىزى "پاتەرىمىزدى تارتىپ الدى" دەپ اكەلەرىن ايىپتاعان ەدى.

مارات قاجىنىڭ ءوزى  ۇلكەن قىزىنىڭ ەرسى قىلىقتارىن ايتىپ ودان باس تارتاتىنىن مالىمدەدى.

سۋرەتتەر مارات ەسەنبايەۆتىڭ الەۋمەتتىك جەلىدەگى پاراقشاسىنان الىندى.

"Nur.kz"