21 قاڭتاردا پاۆلودار كوشەلەرىنىڭ بىرىندە قارا ءتۇستى « سۋبارۋ فورەستەر» ماركالى كولىك جاياۋ جۇرگىنشىلەرگە ارنالعان ارنايى جولىمەن بەسىك ارباسىمەن ءوتىپ بارا جاتقان ايەلدى قاعىپ وتكەن بولاتىن.

جول تالعامايتىن جەڭىل كولىك جولدىڭ ايرىعىنا جارتىلاي شىعىپ قالعان دا كورىنەدى. بۇدان كەيىن جۇرگىزۋشى توقتاماي، ءىز سۋىتادى. جول وقيعاسى سالدارىنان 29 جاستاعى زارينا جانشۇكوۆا ەسىمدى ازاماتشا ونىڭ ميراس ەسىمدى نارەستەسى ءتۇرلى جاراقاتپەن اۋرۋحاناعا تۇسەدى. زارداپ شەككەن ازاماتشانىڭ جۇبايى ازامات جانشۇكوۆتىڭ ايتۋىنشا، كىنالى تۇنگى ساعات 23:00 شاماسىندا كەشىرىم سۇراپ الدارىنا كەلەدى.

«قاتتى قوبالجىدىم، بولعان ءجايتقا سەنگىم كەلمەدى،سول سەبەپتى دە وقيعا ورنىنان دەرەۋ كەتۋدى ءجون كوردىم،»-دەپ كەشىرىم ءوتىندى دەدى جۇبايى. ازامات جانشۇكوۆ ( جاپا شەگۋشىنىڭ جۇبايى): مەنى قىنجىلتاتىنى باسقا نارسە،نە سەبەپتى جول پوليسيا قىزمەتكەرلەرى 7 ساعات بويى كىنالىنى تابا المادى،تىپتەن بۇل وقيعا بەينەتاسپاعا ءتۇسىپ تە قالعان ەدى .

ازامات جانشۇكوۆ ( جاپا شەگۋشىنىڭ جۇبايى): العاشىندا جول پوليسيا قىزمەتكەرلەرى بىزگە كولىك تىزگىنىن ۇستاعان ەر ادام دەگەن بولاتىن، ەندى مىنە ايەل ادام بولىپ شىقتى. بىلۋىمشە،بۇل ازاماتشا ۇقك-نىڭ نەمەسە ءىىد-ى قىزمەتكەرىنىڭ جۇبايى كورىنەدى.

الايدا ..

بۇل مالىمەتتەردى پوليسيا قىزمەتكەرلەرى جوققا شىعارىپ وتىر. قالاي دەسەك تە،باستىسى،ءسابي مەن انا جاعدايى تۇراقتالىپ كەلەدى. زارينا جانشۇكوۆا ءقازىر اۋرۋحانادا، دارىگەرلەر ونىڭ جاراقاتى ورتاشا دەڭگەيدە دەپ وتىر. باس سۇيەگىنە زاقىم كەلگەن، ومىرتقاسى سىنعان. ال 6 ايلىق ميراس ءقازىر ۇيىندە،امان-ەسەن..

ەندى مىنە،وسى جان تۇرشىگەرلىك جاعدايعا بايلانىستى  42 جاستاعى ايىپتالۋشىنىڭ ۇستىنەن قىلمىستىق كودەكستىڭ 14 تاراۋ 345 - بابى بويىنشا قىلمىستىق ءىس قوزعالدى. پوليسيا قىزمەتكەرلەرىنىڭ پايىمداۋىنشا،ەگەر دە دارىگەرلەر جاپا شەگۋشىنىڭ جاعدايى ورتاشا دەڭگەي دەپ باعالاسا، ايىپتالۋشىنىڭ جازاسى جەڭىل. نە 600 مىڭ تەڭگە كولەمىندە ايىپپۇل، نە 75 تاۋلىك بويى قاماۋدا بولادى.

نازەركە توعجانوۆا «قامشى» سىلتەيدى