قازاقتىڭ بۇگىنگى اۋرۋى ءۇش عاسىرعا جۋىق ورىس يمپەرياسىنىڭ وتارىندا بولۋدىڭ ناتيجەسىندە پايدا بولدى. وسى كەزەڭ ىشىندە قازاق حالقى ءوزىنىڭ ەركىن ويلى، كەمەڭگەر، ەلدىڭ ەرتەڭىن ويلايتىن اسىلدارىنان ايىرىلدى. ورىستاردىڭ قولىمەن ىستەلىنگەن وتارشىلدىق قيتۇرقى ساياسات ءوز دەگەنىنە جەتتى. ءسويتىپ، ول قازاق حالقىنىڭ ءبىراز بولىگىنىڭ ويلاۋ جۇيەسىنە قۇلدىق پسيحولوگيا «ۆيرۋسىن» ەگىپ كەتتى.

قازاقتىڭ بۇگىنگى نەگىزگى اۋرۋى، ونىڭ قانىنا، سۇيەگىنە سىڭگەن قۇلدىق پسيحولوگيا قازاقتاردىڭ بويىنان قانداي سيپاتپەن بەلگى بەرەدى؟ — قۇلدىڭ ارمانى — قارنىن تويعىزۋ؛ — قۇلدىڭ باقىتى — قارنى تويعاننان كەيىن كۇندىز-تۇنى ۇيىقتاۋ؛ — قۇلدار ءبىرىن-بىرى مەنسىنبەي، بىر-بىرىنە سەنبەيدى؛ — قۇل ماقتاۋدى جاقسى كورەدى؛ وتىرىك ماقتاندى شىن كورىپ، سوعان مارقايادى. — قۇل ءوزىن باسقالاردان اقىلدى سانايدى. — قۇلدار داراقى كەلەدى. ولار ءوزىنىڭ ويىن، ءسوزىن، كوزقاراسىن، ميميكاسىن، دەنە قيمىلىن، ىس-ارەكەتىن ۇنەمى باقىلاپ، قاداعالاۋدا ۇستاي المايدى؛ — قۇلدار ءبىرىن-بىرى قولدامايدى، باستارى ەشقاشان بىرىكپەيدى. — قۇل وزىنە جۇمىس، تاماق بەرگەن ادامدى قوجايىن سانايدى جانە ودان ولگەنشە قورقادى؛ — قۇل قوجايىنى بۇيرىق بەرسە، كەز كەلگەن ادامعا جالا جابۋعا، باسقا دا وزبىرلىقتارعا، ءتىپتى، ولتىرۋگە دەيىن بارادى؛ — قۇل قوجايىندارىنىڭ قاس-قاباعىن باعىپ، ولاردىڭ ويىن ايتقىزباي ورىنداۋعا ۇمتىلادى؛ — قۇلدار قوجايىندارىنا ءتىلىن ۇيرەنىپ، ءتىپتى، ولار جوق بولسا دا، ءوزارا سول تىلدە سويلەسەدى؛ ونى ولار زور مارتەبە، ماقتانىش كورەدى. — قوجايىن ءۇشىن ەڭ جاقسى قۇل، ول — ءوز ءتىلىن، ءدىنىن، ءدىلىن ۇمىتقان قۇل؛ — قۇل قانشا كۇشتى، دەنساۋلىعى زور بولعانىنا قاراماستان، جالتاق، قورقاق بولادى، سەبەبى ولاردا رۋح، نامىس، جۇرەك جوق؛ — قۇلدار قوجايىندارى اۋىزدارىنا «شايناپ» سالىپ بەرگەن پروبلەمالارعا قۇمار كەلەدى؛ ولاردى قۇلاق قاقپاي ورىنداۋعا پەيىل بولادى. — قۇلدا ۇيات، ۇلتتىق سەزىم جوق، قوجايىندارى ءوزىن، ەلىن قالاي اتاسا دا، سوعان كونەدى. (مىسالى «باران»، «مامبەت»، «كيرگيز-كايساك»، «كازاح» ت.س.س.)؛ — قۇل وكپەشىل كەلەدى، جوق نارسەگە وكپەلەيدى، ءبىراق ولاردىڭ ءبارىن تەز ۇمىتىپ كەتەدى. — قۇلداردى بىر-بىرىنە ايداپ سالۋ وڭاي: ونى قوجايىندارى جاقسى قولدانا بىلەدى، جوق جەردەن پروبلەما تۋدىرىپ، ونى ەكى جاقتى ءوربىتىپ، قوزدىرىپ، ابدەن «شايناپ» ەكى توپ قۇلدىڭ اۋزىنا سالىپ بەرىپ، ولاردى بىر-بىرىنە ايداپ سالادى.

بەلگىسىز اۆتوردان كەلگەن حات

دەرەككوز: kazakhstanzaman.kz