الماتى پوليسياسى 1 ايلىق ءسابيىن 180 مىڭ تەڭگەگە ساتپاق بولعان ايەلدى ۇستادى. بۇل تۋرالى قازاقستان جاڭالىقتارى اگەنتتىگى قالالىق ءىىد باسپا ءسوز قىزمەتىنە سىلتەمە جاساپ حابارلايدى.

الماتى وبلىسى، ىلە اۋدانىنىڭ 27 جاسار تۇرعىنى 19 جەلتوقساندا الماتى پەرزەنتحانالارىنىڭ بىرىندە بوسانعان.

"اتالعان ازاماتشا نارەستەنى ساۋدالاۋدى بۇرىننان ويلاستىرىپ جۇرگەن ەكەن. اياعى اۋىر كەزدەن ءوزىنىڭ بالاسىن ساتىپ الاتىن ادامداردى ىزدەگەن. انا باقىتىن اڭساپ جۇرگەن جالعىزباستى ايەل بىردەن تابىلدى. 1 ايلىق قىز بالا 180 مىڭ تەڭگەگە باعالاندى. ەكى مامىلەگەر كەشكى 7 شاماسىندا بوستاندىق اۋدانىندا كەزدەسىپ ساۋدالاسىپ جاتقان جەرىنەن ۇستالدى"، - دەدى قالالىق ءىىد ۇيىمداسقان قىلمىسپەن كۇرەس باسقارماسىنىڭ باسشىسى تاڭات نازانوۆ.

پوليسيا قىزمەتكەرلەرى ءتىنتۋ كەزىندە بوسانعان ايەلدەن 180 مىڭ تەڭگەنى تاركىلەدى. كەلىنشەك ءوزىنىڭ جىمىسقى جوسپارى بارىن بىردەن مويىندادى.

سۇراق-جاۋاپ الۋ بارىسىندا ول وسىعان دەيىن دە ەكى بالا تۋىپ، پەرزەنتحانالارعا قالدىرىپ كەتكەنىن ايتقان.

ءقازىر وعان قاتىستى قىلمىستىق كودەكستىڭ 135 بابىنا سايكەس (كامەلەتكە تولماعان بالالاردى ساتۋ، ساۋدالاۋ) قىلمىستىق ءىس قوزعالدى. "Nur.kz"