قىتايداعى قانداستارىمىز ۇلتتى قۇتقارۋدىڭ ءبىر تەتىگى جوعارى تەحنولوگيالى وقۋ قۇرالدارىن جاساپ شىعارۋ ءىسىن مىقتاپ قولعا العان سىڭايلى. جاقىندا شىڭجاڭ ولكەسىنىڭ سانجى قالاسىندا «مەڭتاي» ەلەكتورندى ج ش س بالالارعا ارنالعان جاڭا ەلەكتروندى وقۋ قۇرالى «اقىلدى قوياندى» بازارعا شىعاردى.

قىتايدا تۇراتىن قانداسىمىز قاناتقان ءابىلعالي ۇلىنىڭ باسقارۋىنداعى «مەڭتاي» جشس-نىڭ وندىرگەن 3-12 جاس ارالىعىنداعى وسپىرىمدەرگە ارنالعان «اقىلدى قويان» دەپ اتالاتىن ەلەكتروندى وقۋ قۇرالى مىنا مازمۇنداردى قامتيدى:

تاقپاق: كولەمى 800 شۋماقتان تۇراتىن 88 ءتۇرلى «تىلگە جەڭىل، جۇرەككە جىلى تيەر» تاقپاق بار.

ەرتەگى: قازاق حالىق ەرتەگىلەرى مەن شەتەل حالىقتارىنىڭ ەرتەگىلەرىن قامتىعان 130 ەرتەگى بار.

بىلگەنگە مارجان: قازاق حالقىنىڭ ادەت-عۇرىپ، ءسالت-داستۇر، مادەنيەت، تۇرمىس-تىرشىلىگى مەن ۇلتتىق ونىمدەر، تاعام مادەنيەتىنە قاتىستى 1500-گە جۋىق اتاۋعا تۇسىنىك بەرىلگەن. سونىمەن قاتار ماقال-ماتەل، جاڭىلتپاش، ىرىمدار مەن تىيىمدار، اباي ولەڭدەرىن قامتىعان 500-گە جۋىق مازمۇن بار.

اعىلشىنشا ءان ۇيرەنەيىك: 200-دەن استام تاعى اعىلشىنشا، قىتايشا اندەر قامتىلعان.

ەستەرىڭىزگە سالا كەتەيىك، «مەڭتاي» ج ش س بۇعان دەيىن «دانا» قالامى ارقىلى وقىتىلاتىن «دىبىستى الىپپە»، «نەگىزدىك اعىلشىن ءتىلى»، «باستاۋىش مەكتەپ وقۋلىقتارىن وقىتۋ قۇرالى» سىندى ونىمدەر شىعارعان بولاتىن.

باي مازمۇنىنا جاراسا، قۇرىلعى دا بالالاردىڭ ەستەتيكالىق تالعامىنا شاقتالىپ جاسالعان. «اقىلدى قوياننىڭ» ءتۇستى شىراقتارىنان شىققان قۇبىلمالى نۇر تۇنگى اسپاندى ەلەستەتىپ، بالالاردى قيال كوكجيەگىنە باستاسا، بۇكتەلىپ ۇستاۋعا يكەمدى قۇلاقتارى بالالاردىڭ نازارىن وزىنە اۋدارىپ، بىردەن باۋراپ اكەتەردەي اسەم جوبالانعان.

جوبا اۆتورى – ۇزاق جىلدارى اعارتۋ سالاسىندا تەر توككەن پەداگوگ، بەلگىلى اقىن قاناتقان ءابىلعالي ۇلى.

اعارتۋ ءىسىنىڭ قىر-سىرىن قانىق بىلگەن جوبا اۆتورى تالمىش قۇرىلعىنىڭ ىشكى ساپاسى دا جان-جاقتى ويلاستىرىپ، بىلىكتى مامانداردىڭ «سۇزگىسىنەن» وتكىزىپتى.

دىبىس بەرگەندەر دە داۋىسى تىڭدارمانداردىڭ قۇلاق قۇرىشىن قاندىرعان بەلگى ديكتورلار، اكتورلار مەن ءانشى تۇلعالار. ماسەلەن؛ جانار سايلانبەك قىزى (قازاق راديوسىنىڭ بەلدى جۇرگىزۋشىسى)، قاينيكامال جولىمبەت قىزى(شىڭجاڭداعى قازاق راديوسىنىڭ «كۇمىس كومەي» ديكتورلارى)، سەرعازى تولەۋحان ۇلى مەن جاينا عينايات قىزى(شىنجاڭ تەلەارناسىنىڭ بەلدى دىبىس اكتورلارى)، عيزات ساكەن ۇلى(شىنجاڭ قازاعىنا تانىمال كومپوزيتور، ءانشى).

رەداكتورلارى بەلگىلى جاس اقىن، جۋرناليست ورازبەك ساپارحان، اقىن قابىكەن زەينۇرالين.

دىبىس ساپاسىنا دا اسا جوعارى تەحنولوگيالىق الەۋەتپەن جازىلعان. باسىم كوپ بولىگى قازاق راديوسىندا دىبىسقا جازىلسا، قالعاندارى عيزات ساكەن ۇلى جەكە ستۋدياسى جانە قالىسبەك بابان ۇلىنىڭ جەكە ستۋدياسى سىندى وزىق تەحنولوگياسى بار ستۋديالاردا دىبىستالعان.

جوعارى ساپادا، بالالارعا زالالسىز، باعاسى قولجەتىمدى. جوبا اۆتورى ق.ءابىلعاليۇلىنا ارنايى قابارلاسقانىمىزدا جاس ۇرپاقتىڭ بويىنا قازاقى دۇنيەتانىم قالىپتاستىرىپ، بويلارىنا قازاقى «قان جۇگىرتۋدى» كوزدەگەن بىرەگەي ءونىمىمىزدى قازاق ەلىنە شىعارۋدىڭ مۇمكىندىگى قاراستىرىلىپ جاتقانىن جەتكىزدى.

ناجاتبەك نۇرساپا