ق ر پارلامەنتىنىڭ ءماجىلىسىڭ اپپاراتى 2015 جىلدىڭ 6 قاڭتار كۇنى ق ر ۇكىمەتىنىڭ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى-قونى جانە جۇمىسپەن قامتىلۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جوباسى تۋرالى قاۋلىنى قابىلداپ العان ەدى. بۇل تۋرالى حابار الىنعاننان باستاپ كوپتەن كۇتكەن تىلەگىمىز ورىندالعانداي بولىپ، بار اعايىن ءبىر قۋانىپ قالعانبىز.

الايدا، قازاقستان رەسپۋبليكاسى ىشكى ىستەر مينسترلىگى كوشى-قون پوليسياسى دەپارتامەنتى باستىعى ە.سايىنوۆتىڭ جۋرناليست بەيسەن احمەتۇلىنا بەرگەن جاۋابى كوڭىل كونشىتپەدى( http://qamshy.kz/؟p=17996).  قازاق تىلىندە جازسادا ادام تۇسىنبەستەي جازىلعان حاتتان ءبىر بىلگەنىمىز -قانداستارىمىز تاعىدا ازاماتتىق الۋ ءۇشىن بىتپەيتىن ەكى قاعازعا كەلىپ تىرەلەتىنىن بايقاۋعا بولادى. ازاماتتىق الاتىن قازاقتارعا كەتۋ پاراعى مەن ازاماتتىقتان شىعۋ جونىندەگى انىقتاما جۇڭگو حالىق رەسپۋبليكاسىنان كەلگەن قانداستار ءۇشىن ازاماتتىققا وتپەي-اق قويىڭدار دەگەن سوزبەن بىردەي. سەبەبى ول ەلدە باسقا ەلدىڭ ازاماتتىعىن الماي تۇرىپ ءوز ازاماتتىعىنان شىعارمايتىن زاڭ بار. بۇل تۋرالى بەلگىلى قوعام بەلسەندىلەرى تالاي مارتە ۇكىمەت پەن پارلامەنتكە ءتۇسىندىرىپ حات جازعان بولاتىن، ودان حابارلارىڭىز بارى انىق.

قازاقستان رەسپۋبليكاسى پارلامەنت ءماجىلىسىنىڭ دەپۋتاتتارىنا ايتارىمىز – ءدال وسىنداي ەڭ ماڭىزدى ماسەلەلەر شەشىم تاپپاعان زاڭ جوباسى كوشى-قونعا ەشقانداي وزگەرىس اكەلمەيدى. اتالعان زاڭدا 6 ايدا ازاماتتىق الۋعا بولادى دەلىنگەنمەن، وندا 6 جىلدا جيناپ بولا المايتىن جوعارىدا اتاعانىمىزداي قيتۇرقى قۇجاتتار بار.  ياعني اتى بار، زاتى جوق زاڭدى ۇكىمەت جازىپ، پارلامەنت قابىلداعاننان نە قايىر؟ سوندىقتان الىدە كەش ەمەس. تالداپ، تارازىلاپ، شەتەلدەگى 5 ميلليون قازاققا اتاجۇرتىنا كەلەتىن داڭعىل جولدى كورسەتىڭىزدەر. كەلەتىنى كەلەر، كەلمەيتىنى قالار. ءبىز قولىمىزدان كەلگەنىمىزدى جاسايىق. جات ەل ادىمدارىن اشتىرماسادا، ءبىز ۇلت الدىندا، ۇرپاق الدىندا وسىناۋ «ۇلى كوشتىڭ» اياعىنان شالۋعا قاقىمىز جوق.

تۇردىبەك قۇرمەتحان