ق ر پرەزيدەنتى نۇرسۇلتان نازاربايەۆ «نۇر وتان» پارتياسى ءتوراعاسىنىڭ ءبىرىنشى ورىنباسارى باۋىرجان بايبەكتى قابىلدادى، دەپ حابارلادى اقوردانىڭ باسپا ءسوز قىزمەتى.

كەزدەسۋ بارىسىندا ب.بايبەك مەملەكەت باسشىسى - پارتيا ءتوراعاسىنا پارتيا جۇمىستارىنىڭ ناتيجەسى تۋرالى باياندادى. سونىمەن قاتار، ەلباسى پارتيا ساياسي كەڭەسىنىڭ كەڭەيتىلگەن اۋقىمدى وتىرىسىندا « نۇرلى جول» باعدارلاماسى جايىندا ءسوز قوزعادى. باعدارلاما الەمدىك ەكونوميكالىق داعدارىسقا قارسى ءىس-قيمىل جاساۋعا باعىتتالعانىن اتاپ ءوتتى.

- بۇل باعدارلاما پارتيانىڭ قولداۋى اياسىندا جۇزەگە اسىرىلاتىن بولادى، ويتكەنى ونىڭ بەدەلى بار، بۇكىل ەلىمىز بويىنشا كوپتەگەن ادامدار پارتيا ساپىندا تۇر. «نۇرلى جولدى» قابىلداۋ - ەلدىڭ بولاشاق دامۋى مەن حالىقتىڭ يگىلىگى ءۇشىن زور ءمانى بار ماڭىزدى شارا. وسىعان بايلانىستى پارتيا باستاۋىش ۇيىمدارعا سۇيەنە وتىرىپ، حالىققا ءتۇسىندىرۋ جۇمىستارىنا دەن قويۋى ءتيىس، - دەدى مەملەكەت باسشىسى.

نۇرسۇلتان نازاربايەۆ ينفراقۇرىلىمدى ساپالى دامىتۋ، جاڭا جۇمىس ورىندارىن اشۋ، شاعىن جانە ورتا بيزنەسكە مەملەكەت تاراپىنان قولداۋ كورسەتۋ «نۇرلى جول» باعدارلاماسىنىڭ مىندەتتەرىنە كىرەتىنىن ايتتى.

- كاسىپكەرلەر نەسيەمەن قامتاماسىز ەتىلۋدە، بيزنەس اشۋعا جاعداي جاسالىپ، تەكسەرۋلەر سانى ازايۋدا. بارلىق كەدەرگىلەر جويىلۋدا. جالپى، كاسىپكەرلىك يندۋستريالىق-يننوۆاسيالىق دامۋ، «نۇرلى جول» باعدارلامالارى، جول جانە باسپانا قۇرىلىسى، تۇرعىن ۇي-كوممۋنالدىق شارۋاشىلىقتى جاڭعىرتۋلار ارقىلى ۇسىنىلاتىن مۇمكىندىكتەردى پايدالانۋى ءتيىس. ەگەر پارتيا ۇلتتىق كاسىپكەرلەر پالاتاسىمەن وسى باعىتتا تىعىز ىقپالداساتىن بولسا، قاجەتتى ناتيجەلەرگە قول جەتەدى. ەكونوميكانى دامىتۋ ارقىلى حالىقتىڭ ءال-اۋقاتىن جاقسارتۋ ءۇشىن جۇمىس ىستەۋ قاجەت، - دەدى قازاقستان پرەزيدەنتى.

ءتوراعانىڭ ءبىرىنشى ورىنباسارى پارتيانىڭ سايلاۋالدى تۇعىرناماسىنداعى مىندەتتەمەلەرىنىڭ ءىس جۇزىندە 70 پايىزعا جۋىعى ورىندالعانىنا توقتالدى. ول مەملەكەت باسشىسىنا قازىرگى تاڭداعى باستى ماسەلە «سىبايلاس جەمقورلىققا» قارسى ءىس-قيمىل باعدارلاماسىن جۇزەگە اسىرۋ جونىندەگى جول كارتاسىنىڭ بەكىتىلگەنىن دە ايتتى.

ب.بايبەك سونىمەن قاتار «نۇرلى جول» باعدارلاماسىن جۇزەگە اسىرۋ ىسىنە پارتيانىڭ قاتىسۋى تۋرالى باياندادى.

- ءسىزدىڭ تاپسىرماڭىزعا سايكەس، ماجىلىستەگى جانە ءماسليحاتتارداعى پارتيا فراكسيالارىندا «نۇرلى جول» باعدارلاماسىنىڭ ورىندالۋى مەن ۇلتتىق قور قارجىسىنىڭ پايدالانىلۋىن قاداعالايتىن 4 كوميسسيا قۇرىلدى، - دەپ حابارلادى پارتيا ءتوراعاسىنىڭ ءبىرىنشى ورىنباسارى .

كەزدەسۋ قورىتىندىسى بويىنشا مەملەكەت باسشىسى ءبىرقاتار ناقتى تاپسىرمالار بەردى.

دەرەككوز: قازاقپارات