فيليپپين پرەزيدەنتى رودريگو دۋتەرتە پرەزيدەنتتىك لاۋازىمدا ۇزاق قالاتىن بولسا، اسكەريلەردەن مەملەكەت كونستيتۋسياسىن قورعاپ قالۋدى سۇرادى. قازىرگى ۋاقىتتا ەلدە دەپۋتاتتار مەن شەنەۋنىكتەردىڭ وكىلەتتىلىگىن ۇزارتۋ تۋرالى كونستيتۋسيالىق رەفورما تالقىعا سالىندى.

فيليپپين پرەزيدەنتى اسكەري بازاعا ساپارى اياسىندا ءوز وكىلەتتىلىگى بىتكەن سوڭ ەلدى باسقارۋدى جالعاستىرسا، اسكەري قىزمەتكەرلەردەن ءوزىن اتىپ تاستاۋدى سۇرادى. سونداي-اق اسكەري قىزمەتكەرلەر مەن قۇقىق قورعاۋ ورگاندارىنىڭ مىندەتى – «كونستيتۋسيا مەن حالىقتى قورعاۋ» ەكەنىن ەسكەرتتى.

جەرگىلىكتى اگەنتتىكتىڭ مالىمەتىنشە، وتكەن اپتادا دۋتارتەنىڭ جاقتاۋشىلارى كونگرەسس ۇكىمەتىنىڭ پالاتاسىندا مەملەكەتتىڭ فەدەرالدىق قۇرىلىمعا ءوتۋى ءۇشىن كونستيتۋسيالىق جينالىسقا شاقىرۋدى داۋىسقا سالعان. جاڭا كونستيتۋسيا 2019 جىلعى پارلامەنتتىك سايلاۋدى كەيىنگە قالدىرۋعا جانە دەپۋتاتتار مەن شەنەۋنىكتەردىڭ وكىلەتتىلىكتەرىن ۇزارتۋعا مۇمكىندىك بەرەدى.

فيليپپيندىك Inquirer باسىلىمىنىڭ حابارلاۋىنشا، قوعام پىكىرى ەكىگە بولىنگەن. جوعارعى سوتتىڭ بۇرىنعى سوت ءتوراعاسى كىشى حيلاريو داۆيدە وتكەن جىلدىڭ اقپانىندا «قولدانىستاعى كونستيتۋسيا بيلىكتى اسىرا پايدالانۋشىلىقتان قورعايدى جانە ەلدى باسقارۋ ۇدەرىسىنە حالىقتىڭ بەلسەندى قاتىسۋىن قامتاماسىز ەتەدى» دەپ مالىمدەگەن. وسى جىلدىڭ 17 قاڭتارىندا ول «1987 جىلى قابىلدانعان كونستيتۋسيا مەملەكەتىمىز ءۇشىن، بولاشاعىمىز ءۇشىن ەڭ ءتيىمدىسى بولماق»، - دەپ ءوز پوزيسياسىن تاعى راستادى.

الايدا مەملەكەت فەدەرالدىق قۇرىلىمعا وتكەن جاعدايدا ءار اۋداننىڭ ساياسي پوزيسياسى كۇشەيىپ، وزىندىك باسقارۋ ديناستياسى قۇرىلۋى مۇمكىن دەگەن ءقاۋىپ ەلدە ءورشىپ تۇر. وسىعان وراي «حالىق بيلىگى» دەموكراتيالىق پارتياسى نەگىزگى زاڭنىڭ ماتىنىندە ءبىر وتباسىنىڭ وكىلدەرىنىڭ وكىلەتتىكتەرىن شوعىرلاندىرۋعا جانە ولاردىڭ مۇراعا بەرىلۋىنە تىيىم سالۋدى ۇسىندى.

ال دۋتارتەنىڭ باسپا ءسوز حاتشىسى گارري روۋگ پرەزيدەنتتىڭ ءوز ورنىندا مەرزىمىنەن ۇزاق وتىرمايتىنىن، ءتىپتى ودان بۇرىن كەتۋى مۇمكىن ەكەنىن مالىمدەدى.

قولدانىستاعى زاڭناماعا سايكەس فيليپپين پرەزيدەنتى التى جىل مەرزىمگە سايلانادى. سونىمەن قاتار، ءتورت جىل جوعارى لاۋازىمدا بولعان ءار ازامات ونى قايتادان الۋ قۇقىعىنان ايىرىلادى. دۋتارتە 2016 جىلى پرەزيدەنت بولىپ سايلانعان.