شىعىس قازاقستان وبلىسىندا دارىگەرلەر ىشىمدىككە ءۇيىر بالانى ەسەپكە قويىپ، جاعالارىن ۇستاپ وتىر. ءالى مەكتەپكە بارماعان، ءارىپ تانىمايتىن ول اتا-اناسىنىڭ وتىرىستارىنان كەيىن ستاقاننىڭ تۇبىندە قالعان اششى سۋدى ءىشىپ، ماس بولىپ جاتادى ەكەن. سونىمەن، التى جاسار ۇلدىڭ بۇل قىلىعىنا كىم جاۋاپتى، اتا-اناسىنا قانداي شارا قولدانىلادى؟
شىعىستاعى ەڭ كىشكەنتاي ماسكۇنەم اتانعان ءبۇلدىرشىننىڭ ناركوديسپانسەردەگى ەمدەۋ باعدارلاماسى دا بولەك. دارىگەرلەر التى جاسار بالانى ادبەن ايىقتىرىپ بولعان سوڭ، بىرنەشە اپتادان بەرى پسيحولوگيالىق كومەك كورسەتكەن.
– بۇل بالاعا ءارتۇرلى ەمدوم شارالارى جاسالدى. ونىڭ تاربيەسىنە، دامۋىنا كوڭىل ءبولىنىپ، قولدان كەلگەنشە ەمدەپ جاتىرمىز، - دەيدى پسيحونيەۆرولوگيالىق ديسپانسەردىڭ ءبولىم مەڭگەرۋشىسىنىڭ مىندەتىن اتقارۋشى ليۋدميلا كوشەلەس.
كىشكەنتاي ماسكۇنەم ەڭ الدىمەن جەدەل جاردەم قىزمەتكەرلەرى كورگەن. ۇنەمى اتا-اناسىنىڭ ىردۋ-دىردۋ وتىرىستارىنان كەيىن قاراۋسىز قالعان بالا ۇستەلدەگى قالدىق اراقتى ءىشىپ الادى ەكەن. سوڭعى رەت قاتتى ماس بولىپ، ويانباي قالعان ءسابي اۋرۋحاناعا ءتۇسىپتى.
شىعىس قازاقستانداعى ماماندار مۇنداي ماسكۇنەمدى ءبىرىنشى رەت ەمدەپ وتىرعان جوق. بىلتىر ريددەردە جانساقتاۋ بولىمىنە تۇسكەن 7 جاسار بالانىڭ قانىنان دا ىشىمدىك تابىلعان. ارتىنشا ءبۇلدىرشىننىڭ اتا-اناسىنىڭ كوزىنشە اراق ءىشىپ، وسىنداي كۇيگە تۇسكەنى ءمالىم بولدى. ال پسيحولوگتار بالانىڭ كوزىنشە ىشىمدىك ءىشۋدىڭ سالدارىن وسىعان اكەلەدى دەپ توپشىلايدى.
– وتباسىندا اكە-شەشەسى ماس بولىپ وتىر. بالانى شولمەك الىپ كەل دەپ جۇمسايدى. ۇرىپ سوعادى. بالا نە ىستەيدى؟ بالا جوعالتادى ءوزىن. ۇلگى الادى عوي اكە-شەشەسىنەن. تاربيە جوق، تاماعى جوق، - دەيدى پسيحولوگ سۆەتلانا قۇدياروۆا.
ازىرگە وسكەمەندەگى التى جاسار بالانىڭ تاربيەسى مەن تارتىبىنە بايلانىستى كىمگە قانداي شارا قولدانىلاتىنى بەلگىسىز. جالپى ەلىمىزدە كامەلەت جاسىنا تولماعانداردىڭ ىشىمدىك ءىشىپ، ەسىرتكى مەن پسيحوتروپتىق زاتتاردى قولدانعانى ءۇشىن اتا-انالارعا جارتى ميلليون تەڭگەگە دەيىن ايىپپۇل سالىنادى.
گۇلنۇر جاقسىلىقوۆا
پىكىر قالدىرۋ