تين پين پو، شين پين پو؟ تۇسىنبەدىڭىز بە؟ سىزدەر اكىم دەسە «ءااا، سولار ما؟» دەپ، بىزدەر ءۇشىن ۋايىم «جەپ»، اسپانعا ۇشساق، اياعىمىزدان، جەرگە كىرىپ بارا جاتساق، شاشىمىزدان تارتىپ الاسىزدار، ءسويتىپ، وزدەرىڭىزگە كوپ جۇكتى «ارتىپ» الاسىزدار. اكىم بىتكەننىڭ ءبارى بىلامىق ەمەس قوي؟ مىسالى، مەن دە قالا ىشىندەگى ءبىر اۋداننىڭ اكىمىمىن. قازاق ءتىلى دەگەندە جۇرەگىمدى جۇلىپ الىپ: «ءما، ءما!» دەپ بەرە سالاتىنداردىڭ ءبىرىمىن.
وتكەندە ەسەپ بەرۋ جينالىسىندا باياندامامدى تازا حالال، قازاق تىلىمدە جاساعان ەدىم، ءبىر قالا تۇرعىنى: «تۇسىنە الماي تۇرمىن، ورىس تىلىندە نەگە جاسامايسىز؟» دەگەن سۇراق قويدى، ال قالا اكىمى ونىڭ قۇلاعىن بۇراپ قويدى: «ۆوت دۇرىس ايتادى! ەلباسىنىڭ ءوزى ەكى تىلدە سويلەيدى. قۇرمەتتى اۋدان اكىمى، ءسىز كونستيتۋسيانىڭ ءبىر بابىن بۇزدىڭىز. ەلباسىدان نەگە پريمەر المايسىز؟ ۆوت ۆى پوسلانيە جولداۋدى ەسىتتىڭىز عوي؟ بايانداما جاساعاندا تاعى دا ىشىندە يلي دوپولنەنيە وبيازاتەلنو نەتىپ نەعىلىڭدار!» تۇسىنسەم بۇيىرماسىن! جەتى ءجۇز جىنىم جەتىپ كەلدى، قاسىنا ىشقىنعان ىزامدى ەرتىپ كەلدى. ءوزى مىنا تۇرىمەن ەكى تىلدە بايانداما جاساي قالسا، قازاقشاسىنان قاقالىپ قالارمىز؟ ءوزى نەگە ەلباسىدان ۇلگى المايدى؟ ەكى تىلدە سۋداي اعىپ؟
ءبىراق ۇندەمەدىم، جاقىندا كەلگەن اكىم عوي دەپ كۇندەمەدىم. تاعى ءبىر كۇنى جينالىس بولىپ، بايانداما جاسايتىن بولدىم. مىنبەردە تۇرىپ:
–تين پين پو، شين پين پو... –دەدىم ويىما كەلگەن سوزبەن قويىپ قالىپ. جينالعاندار جاپىرىلا قارادى. ءبىرى ءتىلىن جالادى، ەكىنشىسى ساۋساقتارىن سانادى... اكىم ماعان بۇرىلىپ:
–قاي تىلدە سويلەپ تۇرسىز؟ –دەپ سۇرادى.
–قازاق ءتىلىن مەنسىنبەيسىز. سوسىن افريكاداعى بەلگىسىز ءبىر تايپا تىلىندە...
–ءسىز نە، مەنى مازاق ەتەيىن دەدىڭىز بە؟
–و، نە دەگەنىڭىز اكىم مىرزا، جۇرتتىڭ ءبارى ءسىزدىڭ «كازاكچاڭىزگا» ىرزا...
–بايانداماڭىزدى تىڭدايىق!
–اپي پو موپيپو، كاپي تو، ءشاپي تو، بىدي بي، سىدي بي، نە عوي، ابي بو، نەتىپ نەعىلعاندا، نيبووو، وبيبووو. اۋدان بويىنشا ايو ءجو، قۇداي قالاسا تيپي پو.
–ءاي، نەمەنە تيپي پو؟ –دەپ سۇرادى قالا اكىمى. كوزدەرى شوق بولدى، ورىسشا ايتقاندا «شوك» بولدى.
–كەشىرىڭىز، اۋداندا تيپي پو، تۇرعىن ۇيلەردىڭ كوبى قىستا مۇزداي پو ماپي تو، ءسىز نەگە ماعان اپي پو؟
–ا؟
–نەگە ءسىز اپي پو، توپي تو؟ ءوز ءتىلىم وگەي پو؟
ءبىلىپ تۇرمىن، قىزمەتتەن كەتەتىنىمدى سەزىپ، ءوزىمدى ءبىر بايتەرەككە ءىلىپ تۇرمىن... راس ەكەن، سول كۇنى «قىزمەتتەن كەت!» دەگەن ءوزىنىڭ بۇيرىعىن بەردى، ءتىپتى «اشتان قاتىپ قالماڭىز!» دەپ، كەتەرىمدە قويدىڭ قۇيرىعىن بەردى. انا ءتىلىم تۇرعاندا اش بولمايمىن، مىنە باسىم، كەسىپ الساڭدار دا، ءوز تىلىمە قاس بولمايمىن!
مۇحتار شەرىم
پىكىر قالدىرۋ