ۇلى جەڭىستىڭ 70 جىلدىعىن مەرەكەلەۋ قارساڭىندا «نۇر وتان» پارتياسى Kaharman.KZ سايتىن ىسكە قوسادى. بۇل تۋرالى بۇگىن، 29 قاڭتاردا ۇلى وتان سوعىسى جەڭىسىنىڭ 70 جىلدىعىن مەرەكەلەۋ ماسەلەسى بويىنشا وتكەن سەلەكتورلىق كەڭەستە «نۇر وتان» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك مالىمدەدى. Kaharman.KZ سايتىن ىسكە قوسۋ ارقىلى «نۇر وتان» پارتياسى اتا-بابالارىمىزدىڭ ۇلى ەرلىگىن دارىپتەپ، جاستاردى پاتريوتتىق تاربيەگە باۋلىپ، قوعامداعى بەيبىتشىلىكتى، تۇراقتىلىق پەن كەلىسىمدى ودان ءارى نىعايتۋدى كوزدەپ وتىر. «بۇگىنگى كۇنى رەسەيدە وسىنداي 36 سايت جۇمىس ىستەيدى. ءبىز دە بىرەگەي مۇراعاتتىق قۇجاتتاردىڭ كوشىرمەلەرى، قازاقستاندىق باتىرلار تۋرالى اقپاراتتار، سوعىس جىلدارىنىڭ جىلناماسى، فوتوگالەرەيا، ارداگەرلەر تۋرالى ماقالالار جاريالانىپ تۇراتىن رەسۋرس اشقاندى ءجون كوردىك»، دەدى باۋىرجان بايبەك. سونىمەن بىرگە Kaharman.KZ سايتىندا «مايدان داۋىسى» ايدارىن اشىپ، وندا سوعىس جىلدارىنداعى اندەردى، راديوحابارلاردى ورنالاستىرۋ جوسپارلانۋدا. ءبىرقاتار مينيسترلىكتەر مەن مەكەمەلەردىڭ وكىلدەرى، ۇكىمەتتىك ەمەس ۇيىمدار، ق ر پارلامەنتىنىڭ دەپۋتاتتارى، سونداي-اق، وڭىرلەردەگى پارتيا فيليالدارىنىڭ باسشىلارىنىڭ قاتىسۋىمەن وتكەن كەڭەستە «نۇر وتان» پارتياسىنىڭ مەرەيتويلىق جىل اياسىندا جوسپارلانعان ءىس-شارالارى حابارلاندى.

قامبار احمەتوۆ