وزبەكستاننىڭ ءبىرىنشى پرەزيدەنتى يسلام كارىموۆتىڭ نەمەرەسى كىشى يسلام كارىموۆ ۇلىبريتانيا بيلىگىنەن ساياسي باسپانا سۇرادى. بۇل تۋرالى ونىڭ لوندونداعى ادۆوكاتى مالىمدەدى.
بۇدان بۇرىن كارىموۆتىڭ نەمەرەسى شەتەلدىك باق-قا بەرگەن ءبىر سۇحباتىندا ءوزىنىڭ اناسى گۇلنار كارىموۆا جايلى حابار ەستىگەنىن ايتقان ەدى. ول «وسى حاباردان كەيىن ۇلىبريتانيا بيلىگى ساياسي باسپانا بەرۋ تۋرالى ويلانادى»، – دەپ ۇمىتتەنەدى.
«بارلىق قۇجات دايىن بولعاندا مەن ساياسي باسپانا سۇراپ، ءوتىنىش جازامىن. مەنىڭ انامنىڭ ومىرىندە وزگەرىستەر بولدى. قانداي وزگەرىس ەكەنى قۇپيا كۇيىندە قالسىن. الايدا مەن اناما قاتىستى بىرنەشە حابار الدىم. وعان وزگەلەر سەنۋ تۇگىلى، كوز الدارىنا دا ەلەستەتە المايدى»، – دەپ مالىمدەگەن بولاتىن كىشى يسلام كارىموۆ.
ەسكە سالايىق، وسىعان دەيىن وزبەكستان بيلىگى گۇلنار كارىموۆانى جەمقورلىققا قاتىسى بار دەپ ايىپتاعان ەدى.
كەيىن وزبەكستاندىق باق-تا يسلام كارىموۆتىڭ ۇلكەن قىزى سوتقا تارتىلادى دەگەن اقپارات تارادى. بۇل تۋرالى ەكس-پرەزيدەنتتىڭ نەمەرەسى: «مەنىڭ انىق بىلەتىنىم – انامنىڭ جەمقورلىققا قاتىسى بار دەيتىندەي ناقتى دالەل جوق، بارلىعى بۇرمالانعان»، – دەپ سۇحبات بەرگەن.
ول وزبەكستاننىڭ ۇلتتىق قاۋىپسىزدىك قىزمەتى قيناۋ مەن قورلاۋ ارقىلى قىلمىستىق ءىستى جۇرگىزىپ، وزدەرىنە قاجەتتى اقپاراتتى الىپ وتىرعانىن اشىق ايتتى.
«كۋاگەرلەردىڭ كوپشىلىگى ءۇش-تورت جىل ۇلتتىق قاۋىپسىزدىك قىزمەتىندە قاماۋدا بولعان. ولاردى كەز كەلگەن قاعازعا قول قويۋعا كوندىرۋگە بولادى. ۇقق تۇرمەسىندە ءتورت جىل وتىرعان ادام، ءتىپتى، ءوزىنىڭ قاتىسى بولماسا دا، كەز كەلگەن قىلمىستى مويىنداۋى مۇمكىن. بۇل – تۇسىنىكتى جايت»، – دەيدى ول.
كىشى كارىموۆتىڭ ايتۋىنشا، اتاسى قىزىنىڭ ساياساتقا ارالاسۋىنا قارسى بولعان. يسلام كارىموۆكە ونىڭ بەلسەندىلىگى ۇناماعان.
«مەنىڭ اتام ۇنەمى اناما: «مەنەن اسىپ كەتپەۋىڭ كەرەك»، – دەيتىن. انام حالىقتىڭ سەنىمى مەن سۇيىسپەنشىلىگىن يەلەنىپ، تاعىن تارتىپ الادى دەپ قورقاتىن. اتام ۇيدە تەلەديداردان انامدى ءجيى كورەتىن. ونىڭ اشۋلاناتىنى سونشالىق، ءبىز كوپتەگەن جوبانى ودان جاسىرۋعا تىرىستىق. انام تالاي جۇمىسىن قۇپيا ساقتادى. ءتىپتى، تەلەديداردان ونىڭ جوباسى كورسەتىلگەندە «مەنىڭ جوبام» دەپ ايتا المايتىن. ەگەر ونى بىلسە، اتام: «سەن مەنەن بيلىك تارتىپ العىڭ كەلەدى»، – دەپ كۇدىكتەنەر ەدى»، – دەيدى كارىموۆتىڭ نەمەرەسى.
يسلام كارىموۆ قايتىس بولاردىڭ الدىندا ونىڭ تۋعان قىزى ءۇيقاماقتا وتىردى. ءقازىر گۇلنار كارىموۆانىڭ ءتىرى ەكەنىنەن باسقا ناقتى اقپارات جوق.
