ءماجىلىس ءتوراعاسى نۇرلان ءنىعماتۋليننىڭ توراعالىعىمەن ءوتىپ جاتقان پالاتانىڭ كەزەكتى جالپى وتىرىسىندا كوممەرسيالىق ەمەس ۇيىمداردىڭ قىزمەتى ماسەلەلەرىن تۇزەتۋگە ارنالعان زاڭ جوباسى تالقىلاندى، دەپ حابارلايدى Qamshy.kz اقپارات اگەنتتىگى.
تالقىلاۋ بارىسىندا ءماجىلىس سپيكەرى مەملەكەتتىك الەۋمەتتىك تاپسىرىس ستاندارتتارىنا ايرىقشا نازار اۋداردى.
اۋىلداعى ۇكىمەتتىك ەمەس ۇيىمدار مەن قالالارداعى ۇيىمدار دەڭگەيىنىڭ ايىرماشىلىعى بار ەكەنىنە كوڭىل بولە وتىرىپ، نىعماتۋلين ارنايى بايقاۋلاردا اۋىلداعى ۇكىمەتتىك ەمەس ۇيىمداردىڭ گرانتتى دا، مەملەكەتتىك الەۋمەتتىك تاپسىرىستى دا جەڭىپ الۋى قيىن ەكەنىن العا تارتتى:
– شىنىندا الەۋمەتتىك ستاندارتتار دايىندالعان كەزدە مىندەتتى تۇردە اۋىلدىڭ جاعدايىن ەسكەرۋ كەرەك. اۋىل مەن قالانىڭ وزىنە ءتان ەرەكشەلىكتەرى بار. سول سەبەپتى ستاندارتتاردى ەنگىزگەندە وسى ەرەكشەلىكتەرگە قاراي ءتيىستى جاعداي جاساۋ قاجەت، – دەدى.
بۇل زاڭ جوباسىنىڭ ماقساتى مەملەكەتتىك الەۋمەتتىك تاپسىرىستى ىسكە اسىرۋدىڭ تيىمدىلىگى مەن اشىقتىعىن ارتتىرۋ ارقىلى سول سالاداعى ءتيىستى زاڭنامانى جەتىلدىرۋ بولىپ تابىلادى.
پىكىر قالدىرۋ