بۇگىن – بۇكىلالەمدىك حيدجاب كۇنى. وعان بايلانىستى قوعامدا كوپتەگەن پىكىر بار. بىرەۋلەر حيدجاب كيۋ جات اعىم وكىلدەرىنە ءتان دەسە، ەندى بىرەۋلەر ورامال تارتۋدىڭ پارىز ەكەنىن العا تارتادى. ءبىراق ءبىزدىڭ ايتپاعىمىز بۇل ەمەس. قازاقستاندا قۇداي قوسقان قوساعى حيدجاب كيەتىن جۇلدىزدار بار. Qamshy.kz اقپارات اگەنتتىگى سولاردىڭ ءتىزىمىن وقىرمان نازارىنا ۇسىنادى.
بەكبولات تىلەۋحان مەن ونىڭ ايەلى
بەلگىلى قوعام قايراتكەرى، جىرشى، ءانشى بەكبولات تىلەۋحاننىڭ ءتورت ايەلى بار. تورتەۋىنەن تاراعان 11 بالاسى بار. ول بىلتىر 50-دەن اسقان شاعىندا ۇلدى بولدى.
اقان ساتايەۆ پەن ءنازيرا باقايەۆا
تانىمال رەجيسسەر اقان ساتايەۆتىڭ جارى ءنازيرا باقايەۆا «العاشقى ماحاببات» فيلمىندە مىلقاۋ قىزدىڭ ءرولىن سومداعان. اقان ەكەۋى «اللاجار» ءفيلمىنىڭ ءتۇسىرىلىمى كەزىندە تانىسىپ، كوڭىل جاراستىرعان ەكەن. بۇگىندە ءنازيرا بەس بالا تاربيەلەپ وتىرعان اياۋلى جار اتانعان. ينستاگرام جەلىسىندە بەلسەندى. ونىڭ پاراقشاسىنا 14 مىڭنان استام ادام تىركەلگەن. كوپتەگەن وقىرمان ونىڭ كيىم ستيلىنە قىزىعىپ، كومەك سۇرايتىن كورىنەدى.
ماديار سەرىكبايەۆ پەن دانا تۇراربەك
حالىققا «ونەر قىراندارىنىڭ» باسشىسى رەتىندە بەلگىلى ماديار سەرىكبايەۆ پەن اكتريسا دانا تۇراربەك ونەردە دە، ومىردە دە بىرگە. ولاردىڭ وتاسقانىنا بيىل 11 جىل بولعان.
تالعات جورابايەۆ پەن اياۋلىم جورابايەۆا
تانىمال ءانشى، التىناي جورابايەۆانىڭ ءىنىسى تالعات جورابايەۆ ايەلى اياۋلىممەن الەۋمەتتىك جەلى ارقىلى تانىسقان. يسلام دىنىنە قارسى سۋرەتكە ءوز پىكىرىن بىلدىرگەن اياۋلىمدى جەلىدە وتىرعان تالعات تا قولداي جونەلەدى. كەيىن ەكەۋى جاقىنىراق تانىسىپ، تالعات اياۋلىمنىڭ ءنومىرىن سۇرايدى. العاشقىدا قارسىلىق تانىتقان اياۋلىم اقىرى ءوز ءنومىرىن بەرىپ، كوزقاراستارى ءبىر جەردەن شىققان سوڭ جاقىن ارالاسادى. ءبىر جارىم جىل تەلەفونمەن سويلەسكەن تالعات پەن اياۋلىم ەكى-اق رەت كەزدەسىپتى. ولاردىڭ ءۇشىنشى كەزدەسۋى ۇزاتۋعا ۇلاسقان.
رولان قازرەت پەن تاڭشولپان دارمەنوۆا
«مەلومەن» توبىنىڭ ءانشىسى رولان قازرەت 2013 جىلى ۇيلەنگەن. ول جارىمەن كەزدەيسوق تانىسقان، وتاۋ قۇرعانعا دەيىن قولىنان دا ۇستاماعان دەسەدى. رولان دا باسقا انشىلەر سەكىلدى ءوز ايەلى تۋرالى ءجيى ايتا بەرمەيدى.
دانيار ەلەۋسىنوۆ پەن الينا ءقۇربانالي قىزى
اتاقتى بوكسشى دانيار ەلەۋسىنوۆ 2014 جىلى الينا ەسىمدى ارۋعا ۇيلەنەدى. ولاردىڭ دانيەل ەسىمدى ۇلدارى بار. الايدا بىلتىر ريو وليمپياداسىنىڭ چەمپيونى ايەلىنەن بولەك تۇراتىنىن مالىمدەدى. ەرلى-زايىپتىلار اراداعى تۇسىنىسپەۋشىلىككە بايلانىستى ۋاقىتشا اجىراسۋعا شەشىم قابىلداپتى.
ەردوس قانايەۆ پەن ايدانا
«جىگىتتەر» كۆارتەتىنىڭ ءانشىسى ەردوس قانايەۆ پەن ايدانانىڭ حيكاياسى قىزىق. ولار العاشقى كەزدەسۋدەن سوڭ اراعا بىرنەشە جىل سالىپ تابىسقان. ەردوستىڭ ايتۋىنشا، ول ءبىر كورگەننەن-اق ايدانانى جار قىلىپ الاتىنىن سەزگەن. الايدا ءبىرىنشى كەزدەسۋدەن كەيىن ايدانانى جوعالتىپ، مۇلدەم حابارلاسا الماعان. كەيىن بولاشاق جۇبايىن ءوزىنىڭ قايىن اتاسى ارقىلى تاپقان.
«اللاعا شۇكىر، تاپقان سوڭ قايتىپ جوعالتىپ المايتىنداي بەكەم ۇستادىق. تاعى دا ىزدەپ جۇرەتىن بەس جىل ۋاقىت جوق دەپ ءسوز سالىپ، اتا-اناسىنىڭ رۇقساتىن الىپ، وتباسىلىق ءومىردى باستادىم»، – دەيدى ەردوس.
جانقوش تۇراروۆ پەن كلارا يسا
كاسىپقوي بوكسشى جانقوش تۇراروۆ 2016 جىلى كلارا يسامەن شاڭىراق كوتەردى. بىلتىر ول ءبىر قىزدىڭ اكەسى اتاندى. كلارا دا ينستاگرام پاراقشاسىندا كوپتىڭ كوز الدىندا ءجۇر. ءقازىر ونىڭ پاراقشاسىنا جازىلعاندار سانى 68 مىڭنان استى.
ديلەن مەن ونىڭ جارى
قازاقستاندا كەڭىنەن تانىمال «Mysterions» توبىنىڭ ءانشىسى ديلەن جەكە ءومىرىن جاسىرىن ۇستايدى. ۇيلەنگەنىن ءوزىنىڭ ينستاگرام پاراقشاسىنا عانا جاريالاعان. ول جۇبايىنىڭ سۋرەتتەرىن كوپ كورسەتە بەرمەيدى.
ءىلياس حاروۆ پەن ونىڭ جارى
«Mysterions» توبىنىڭ تاعى ءبىر ءانشىسى ءىلياس حاروۆ تا ءوز ايەلى تۋرالى اقپاراتتى جاريالامايدى. ونىڭ جۇبايىنىڭ تالدىقورعان تۋماسى ەكەنى عانا بەلگىلى. ءىلياس دۇركىرەتىپ توي جاساماعان، تەك ايەلىن تۋىسقاندارىمەن تانىستىرۋ ءۇشىن ەت جاقىندارىن قوناققا شاقىرعان. بىلتىر ءبىر ۇلى دۇنيەگە كەلدى.
پىكىر قالدىرۋ