سوڭعى كۇندەرى جيىلەپ كەتكەن قاۋەسەتتەر جانە الەۋمەتتىك جەلىلەردەگى اقپاراتقا بايلانىستى ق ر ەنەرگەتيكا مينيسترلىگى مالىمدەمە جاسادى، دەپ حابارلايدى Qamshy.kz اقپارات اگەنتتىگى.

مينيسترلىكتىڭ دەرەگىنە سۇيەنسەك، ەلىمىزدە حالىقتى كومىرمەن قامتاماسىز ەتۋدە جاعداي تۇراقتى. قازاقستاننىڭ ءبىر دە ءبىر وڭىرىندە قاتتى وتىننىڭ تاپشىلىعىنا قاتىستى دۇرلىكپە بايقالمايدى.  ۇزىن سونار كەزەكتە تۇرعان ادامدار مەن جۇك كولىكتەرىنىڭ قاقتىعىستارى جونىندەگى ۆيدەولار جالعان.

سونىمەن قاتار، ق ر ەنەرگەتيكا مينيسترلىگى وبلىس اكىمدىكتەرىمەن جانە «قازاقستان تەمىر جولى» ۇك اق-مەن بىرلەسىپ وڭىرلەرگە كومىردى جەتكىزۋگە تاۋلىك سايىن مونيتورينگ جۇرگىزەدى، ءارى بۇل ماسەلە تۇراقتى باقىلانىپ وتىر.

2017 جىلى ەلىمىزدە 106،7 ملن توننا كومىر ءوندىرىلدى، بۇل 2016 جىلعى كورسەتكىشتەن 8،2 ملن تونناعا ارتىق. 29،3 ملن توننا كومىر ەكسپورتتالدى، ال قالعان كومىر ىشكى قاجەتتىلىككە جۇمسالدى.

وسى ورايدا قازاقستاننىڭ ەنەرگيا ءوندىرۋشى ۇيىمدارىنا 56،3 ملن توننا، ياعني 2016 جىلمەن سالىستىرعاندا 7،1 ملن تونناعا ارتىق كومىر بەرىلدى.

جەدەل دەرەكتەرگە سايكەس، 30 قاڭتارعا دەيىنگى مەرزىمدە وندىرىلگەن كومىر كولەمى 8،6 ملن توننانى قۇرادى.

تۇتىنۋشىلارعا كوممۋنالدىق-تۇرمىستىق قاجەتتىلىككە 763،8 مىڭ توننا كومىر جىبەرىلدى.

«قازاقستان تەمىر جولى» اق مالىمەتىنە سايكەس، 2018 جىلدىڭ 30 قاڭتارىنا دەيىنگى مەرزىمدە تەمىر جول كولىگىمەن كوممۋنالدىق-تۇرمىستىق قاجەتتىلىككە جانە حالىققا 457،2 مىڭ توننا كومىر جونەلتىلدى. اۆتوكولىكپەن 300 مىڭ توننا كومىر ءتۇسىرىلدى.

2018 جىلعى 30 قاڭتارداعى جاعداي بويىنشا كومىردىڭ قورى مەن وبلىستارعا جەتكىزىلۋى تومەندەگىدەي:

اقمولا وبلىسى – 85،9 مىڭ توننا؛ استانا قالاسى – 17،2 مىڭ توننا؛ اقتوبە وبلىسى – 2،1 مىڭ توننا؛ الماتى وبلىسى – 77،4 مىڭ توننا؛ الماتى قالاسى – 6،8 مىڭ توننا؛ شىعىس قازاقستان وبلىسى – 114،7 مىڭ توننا؛ جامبىل وبلىسى – 8،9 مىڭ توننا؛ قاراعاندى وبلىسى – 53،0 مىڭ توننا؛ قوستاناي وبلىسى – 24،3 مىڭ توننا؛ پاۆلودار وبلىسى – 9،8 مىڭ توننا.