تانىمال تەلەجۇرگىزۋشى جانە پروديۋسەر بايان ەسەنتايەۆا ءوزىن قازاق ءتىلىن بىلمەگەنى ءۇشىن سىناعاندارعا الەۋمەتتىك جەلىلەر ارقىلى جاۋاپ بەردى.
ونىڭ ايتۋىنشا تۋعان ءتىلىن بىلمەگەنى ءۇشىن ءجيى سىن ەستيدى ەكەن.
"ءيا، ءدال سولاي، مەن ورىس تىلىندە ويلايمىن، ورىس بالاباقشاسىنا باردىم، ورىس مەكتەبىن ءبىتىردىم، ول كەزدە قالادا تەك ءبىر عانا قازاق مەكتەبى بار بولاتىن، ءبىراق ول اقتالعانىم ەمەس، اقتالعىم كەلمەيدى دە! مەن وزىمە سىن ايتاتىنداردان، مەنەن قاي جەرىڭىز جاقسى، ءوز حالقىڭىز بەن ەلىڭىز ءۇشىن نە ىستەدىڭىزدەر؟ دەپ سۇراعىم كەلەدى. تەك قانا قازاقشا سويلەگەنىڭىز ءۇشىن وزدەرىڭىزدى ناعىز قازاق رەتىندە ساناۋعا كىم قۇقىق بەردى؟ مەن - قازاقپىن! جۇرەگىم قازاق! جانىم قازاق! ىستەگەن ىستەرىمنىڭ بارلىعى، بىرىنشىدەن، قازاق ءتىلىن، مادەنيەتىن جانە شىعارماشىلىعىن دامىتۋ ءۇشىن جاسالادى"، - دەپ جازدى ول ينستاگرامداعى پاراقشاسىندا.
ءوز سوزدەرىن راستاۋ ءۇشىن ول "قازاق ارۋى" بايقاۋىنىڭ وتكىزىلۋىن مىسالعا كەلتىردى.
"ءقازىر مەن ورىسشا سويلەسەم دە "قازاق ارۋى" بايقاۋىن دايىنداپ ءجۇرمىن. بۇل جوبا ەڭ بىرىنشىدەن، قازاق حالقىنىڭ ءتىلىن، ادەبيەتىن، تاريحىن، مادەنيەتىن، سالت-داستۇرلەرىن دامىتۋعا باعىتتالعان! مەن ەشتەڭەدەن ۇيالمايمىن! مەن قازاقستاندى، ءبىزدىڭ كوپۇلتتى ەلىمىزدە تۇراتىن ادامداردىڭ بارلىعىن جاقسى كورەمىن! بارلىعىڭىزعا جاقسىلىق تىلەيمىن!"، - دەپ تۇيىندەدى ول.
ەستەرىڭىزگە سالا كەتسەك، بايان ەسەنتايەۆا تانىمال "كەشYOU" جانە "لاشىن" توپتارىنىڭ، سونداي-اق جانار دۇعالوۆا، كامشات جولدىبايەۆا جانە انەل ارىنوۆانىڭ پروديۋسەرى بولىپ تابىلادى.
قازاقستاندىقتارعا ول تەلەحيكايالاردىڭ اكتريساسى مەن پروديۋسەرى رەتىندە دە تانىمال.
دەرەككوز: "قازينفورم"
