ق ر ەنەرگەتيكا ۆيسە-مينيسترى عاني سادىبەكوۆ قاراعاندى وبلىسىندا وتكەن جۇمىس ساپارى شەڭبەرىندە «شۇباركول كومىر» اق كومىر رازرەزىندە بولدى، دەپ جازادى Qamshy.kz اقپارات اگەنتتىگى.

سادىبەكوۆ كومىر باسسەينىنىڭ جاعدايىمەن جانە دامۋ پەرسپەكتيۆالارىمەن تانىسىپ ءوتتى. ونىڭ ىشىندە تاۋ-كەن جۇمىستارىنىڭ جۇمىس بارىسىن، سۇرىپتايتىن كەشەندى جانە كومىردى جونەلتۋ پروسەدۋراسىن قاراپ ءوتتى.

2017 جىلى كاسىپورىن 10،45 ملن. توننا ءوندىرىپ، رەكورد ورناتتى، ونىڭ ىشىندە حالىقتىڭ كوممۋنالدىق-تۇرمىستىق قاجەتتىلىگىنە ارنالعان كومىر كولەمى 3،3 ملن. توننانى قۇرادى، بۇل 2016 جىلمەن سالىستىرعاندا 100 مىڭ.تونناعا ارتىق.

««شۇباركول» اق الەۋمەتتىك كومىر شىعاراتىن نەگىزگى جەتكىزۋشى بولىپ تابىلادى. ەلدەگى حالىقتىڭ كوممۋنالدىق-تۇرمىستىق قاجەتتىلىگىنە كومىردىڭ ۇشتەن ءبىر بولىگى ءدال وسى جەردە وندىرىلەدى»، - دەدى ۆيسە-مينيستر ب ا ق وكىلدەرىنە بەرگەن سۇحباتىندا.

2018 جىلى كاسىپورىن 12 ملن. توننا كومىر ءوندىرۋدى، ونىڭ ىشىندە كوممۋنالدىق-تۇرمىستىق قاجەتتىلىككە 300 مىڭ.توننا وسىممەن 3،6 ملن.توننا وتىن ءوندىرۋدى جوسپارلاپ وتىر.

«شۇباركول» اق ورتاشا ەسەپپەن 170-180 ۆاگون كومىر تيەلەدى. كومىر ەلىمىزدىڭ بارلىق وڭىرلەرىنە جونەلتىلەدى.

«2018 جىلدىڭ قاڭتار ايىندا عانا الماتى وبلىسىنا قاتتى سۋىققا بايلانىستى 1055 ۆاگون كومىر، وڭتۇستىك-قازاقستان وبلىسىنا 500 ۆاگون كومىر ءتۇسىرىلدى»، - دەدى سادىبەكوۆ.

«شۇباركول» اق كومىرىنىڭ تەحنيكالىق سيپاتتاماسى: كومىر ماركاسى – د (ۇزىنجالىندى)، كۇل كولەمى – 5-13%، حالىققا ارنالعان كومىر ىشىندەگى بىردەن ءبىر ساپالى وتىن بولىپ تابىلادى. كومىردىڭ ىلعالدىلىعى – 14،5%. جانۋ جىلۋى – 5100-5600 ككال/كگ.