مەكتەپ تۇلەكتەرىنىڭ جىل سايىنعى ۋايىمى – ۇبت. ويتكەنى بار ءومىرى ۇبت-عا بايلانىپ قالماسا دا، سىناقتان كەيىنگى ناتيجە، ءسوزسىز، بولاشاعىنا اسەر ەتەدى. ەمتيحانعا قالاي دايىندالۋ كەرەك دەگەن سۇراق مەكتەپ تۇلەكتەرىنىڭ عانا ەمەس، مۇعالىمدەردىڭ دە باس اۋرۋىنا اينالعان. وسىعان وراي «UStudy» ايماقتىق تەستىلەۋ ورتالىعى قازاق مەكتەبىن بىتىرەتىن تۇلەكتەرگە ارناپ قازاق تىلىندەگى 2000 بەينەساباقتى YouTube ارناسىنا  جۇكتەمەك. بەينەساباقتار ەڭ ۇزدىك مەكتەپ مۇعالىمدەرىنىڭ قاتىسۋىمەن تەگىن كورسەتىلەدى، دەپ جازادى Qamshy.kz اقپارات اگەنتتىگى. 

UStudy ايماقتىق تەستىلەۋ ورتالىعى – مۇعالىمدەر مەن وقۋشىلارعا كومپيۋتەرلىك تەستىلەۋ وتكىزەتىن كومپانيا. قازاقستاننىڭ بىرنەشە ايماعىندا ءىرى فيليالدارى بار. سوڭعى 3 جىلدا كومپانيا 3 ملن-عا جۋىق ونلاين جانە وفلاين تەستىلەۋ وتكىزىپ، قاشىقتان وقىتۋ سالاسىنداعى «UTUTOR» حالىقارالىق جوباسىن ىسكە قوستى.

— بۇگىندە ءبىز ەركىن قول جەتكىزە الاتىن 500-دەن استام بەينەساباق جۇكتەدىك. الداعى ۋاقىتتا، ۇبت-نىڭ بارلىق پاندەرى بويىنشا 2000 بەينە ساباق جۇكتەۋدى جوسپارلاپ وتىرمىز، — دەيدى كومپانيا باسشىسى جانات راحماني.

ونىڭ ايتۋىنشا، بۇل جوبانى وزىنەن باسقا ەشكىم قارجىلاندىرمايدى. اتالعان ورتالىقتىڭ باستى ماقساتى – الىس ايماقتاعى تۇلەكتەرگە از ۋاقىت ىشىندە تەگىن ءارى ساپالى ءبىلىم ۇسىنۋ.

UStudy ورتالىعىنىڭ YouTube جەلىسىندە ارناسى بار. تاعى ءبىر ايتا كەتەرلىگى – تەگىن بەينەساباقتاردى جۇكتەگەننەن كەيىن پاراقشاعا جازىلۋشىلاردىڭ سانى ءبىر ايدا ءۇش ەسە وسكەن. وسىلايشا، ورتالىقتىڭ العاشقى قادامى ءساتتى باستالىپتى. بەينەساباقتار وسىدان بىرنەشە جىل بۇرىن تۇسىرىلگەندىكتەن، ساپاسى كەرەمەت دەپ ايتا المايمىز. الايدا ساپاسىنان بۇرىن ساباقتى 5-10 مينۋت ىشىندە كەڭىنەن تالداپ، تۇسىنىكتى تىلمەن وقۋشىعا ۇعىندىرا بىلگەنى ماڭىزدىراق. مىسالى، حيميا ءپانى وقۋشىعا قىزىقتى ءارى ەستە قالارلىقتاي بولۋى ءۇشىن ءمۇعالىم ءتۇرلى زەرتحانالىق جولمەن ءتۇرلى سىناق جاسايدى.

جانات راحماني قازىرگى ۋاقىتتا قازاق تىلىندە ءبىلىم الۋعا سۇرانىس كوپ دەپ سانايدى.

— الەۋمەتتىك جەلىلەر كەڭىستىگىندە مازمۇنى ۇقساس رەسۋرستار جوق. وسى تاقىلەتتەس بىرنەشە ارنا بار. الايدا ولار تەوريا مەن تەرەڭ ءبىلىمدى قامتاماسىز ەتە المايدى. كەيبىر بەينەساباقتاردىڭ سانى، قولدانۋ مەرزىمى شەكتەۋلى، — دەيدى جانات راحماني.

جانات راحمانيدىڭ جوسپارى كوپ. بولاشاقتا مەكتەپ تۇلەكتەرىنە تەك ءبىلىم بەرىپ قانا قويماي، ءومىر سۇرۋگە، ماقسات قويا بىلۋگە، شابىتتانۋعا پسيحولوگيالىق ترەنينگ ارقىلى كومەكتەسۋدى كوزدەيدى.

— مەنىڭ ويىمشا، 10-11 سىنىپ وقۋشىسىنا مەكتەپ ايتارلىقتاي قاجەت ەمەس. سەبەبى وقۋشى بۇل كەزدە ءومىر ءسۇرۋدى ۇيرەنۋى كەرەك. جوعارعى سىنىپ وقۋشىسى  الدىنا ماقسات قويىپ، قانداي قىزمەت اتقاراتىنىن، قانداي ماماندىققا تۇسەتىنىن انىقتاپ، ايقىنداپ الۋى ءتيىس. كەيىن جوو-عا بارعاندا جان-جاعىنا جالتاقتاماي، ءوز كاسىبىن اشىپ، تابىسقا جەتۋى كەرەك. جوو-داعى 1 كۋرستا ونىڭ ءومىرى جاڭا عانا باستالماي، تولىققاندى ءومىر سۇرگەنى ءجون. سول سەبەپتى جوعارعى سىنىپ وقۋشىلارىنا وسىنىڭ ءبارىن ۇيرەتكەن دۇرىس دەپ ەسەپتەيمىن، — دەيدى جانات راحماني.