"نۇر وتان" ءتوراعاسىنىڭ ءبىرىنشى ورىنباسارى ماۋلەن اشىمبايەۆ Facebook الەۋمەتتىك جەلىسىندە تىركەلدى دەپ حابارلايدى Qamshy.kz اقپارات اگەنتتىگى.
ماۋلەن اشىمبايەۆ جەكە اككاۋنتىن اشۋ بۇرىننان جوسپاردا بولعانىن ايتادى. "نۇر وتان" ءتوراعاسىنىڭ ءبىرىنشى ورىنباسارى Facebook-تە العاشقى جازباسىن جاريالادى.
—ۋاقىت وتكەن سايىن ينتەرنەت پەن الەۋمەتتىك جەلىلەر ءومىرىمىزدىڭ اجىراماس ءبىر بولىگىنە اينالىپ كەلەدى. تەحنولوگيالار دا ءبىر ورىندا تۇرمايدى. قوعامىمىز دا وزگەرۋدە. سوندىقتان ءبىز دە زامانعا ساي وزگەرىپ، جەتىلە تۇسۋگە ءتيىسپىز.
جەكە اككاۋنتىمدى اشۋ بۇرىننان ويىمدا جۇرگەن ءىس ەدى. الايدا، ءارتۇرلى سەبەپتەرمەن بۇل باستاما كەيىنگە شەگەرىلە بەردى.
ال بۇگىندە پارتيامىز جاڭعىرۋدىڭ جاڭا بيىگىنە بەت تۇزەپ، اۋقىمدى جۇمىستاردى قولعا العان شاقتا مەنىڭ دە Facebook-كە تىركەلۋىم زاڭدى قۇبىلىس ءارى دەر كەزىندە جاسالعان قادام دەپ ەسەپتەيمىن. سەبەبى، بۇل جەردە ءارتۇرلى يدەيالار كوپشىلىكتىڭ نازارىنا ۇسىنىلىپ، قىزۋ تالقىلاناتىنى بەلگىلى. ولاردىڭ اراسىندا ءبىزدىڭ ساياسي ۇيىم ءۇشىن دە پايدالى بولۋى مۇمكىن وزەكتى ويلار ايتىلىپ جاتادى.
سوندىقتان بىزگە دە Facebook ارقىلى ەڭ وزەكتى ماسەلەلەردى تالقىلاۋعا مۇمكىندىك تۋاتىنىنا سەنەمىن. ەگەر ءسىزدىڭ «نۇر وتاننىڭ» جۇمىسىنا قاتىستى سىندارلى پىكىرىڭىز، پارتيا قىزمەتىن جاڭعىرتۋ جونىندە ناقتى ۇسىنىستارىڭىز جانە باسقا دا ماسەلەلەرگە قاتىستى ويلارىڭىز بولسا ونى ءاردايىم جەكە حابارلاما ارقىلى نەمەسە m.ashimbayev@nurotan.kz ەلەكتروندى پوچتاما حات رەتىندە جولداي الاسىزدار.
وزدەرىڭىزدەن ۇتىمدى ويلار مەن پاراساتتى پىكىرلەر بولاتىنىنا سەنىم بىلدىرەمىن!، - دەپ جازدى ماۋلەن اشىمبايەۆ.
بۇعان دەيىن بىرنەشە شەنەۋنىك الەۋمەتتىك جەلىگە تىركەلگەن بولاتىن. ولاردىڭ اراسىندا ق ر اقپارات جانە كوممۋنيكاسيالار ءمينيسترى داۋرەن ابايەۆ، ق ر مادەنيەت جانە سپورت ءمينيسترى ارىستانبەك مۇحامەدي ۇلى، استانا قالاسىنىڭ اكىمى اسەت يسەكەشوۆ بار. اتى اتالعان شەنەۋنىكتەر پاراقشالارىندا قىزمەتىنە قاتىستى جاڭالىقتارمەن بولىسەدى.
قازاقستاندا حالىققا جاقىن بولۋ ماقساتىندا الەۋمەتتىك جەلىدە ءوز پاراقشاسىن اشقان شەنەۋنىكتەردىڭ قاتارى كوبەيىپ كەلەدى. حالىق ۆەدومستۆا باسشىسىنا كوكەيدەگى سۇراقتاردى جەلى ارقىلى قويىپ، وعان جاۋاپ الا الادى.
