ق ر پارلامەنتى ءماجىلىسىنىڭ دەپۋتاتتارى ءبىلىمنىڭ قارا شاڭىراعى اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە بولىپ، ۇجىممەن، ستۋدەنتتەر قاۋىمىمەن كەزدەستى.
الدىمەن حالىق قالاۋلىلارى سەرىك سەيدۋمانوۆ پەن ەرجان قۇدايبەرگەن وقۋ ورداسىنىڭ 90 جىلدىق مەرەيتويىمەن قۇتتىقتاپ، ۋنيۆەرسيتەت رەكتورى تاكير بالىقبايەۆقا شىعارماشىلىق تابىس تىلەدى. وسىدان سوڭ ەل ومىرىنە وڭ وزگەرىس، جاڭا سەرپىن الا كەلگەن «ەلباسىنىڭ بەس الەۋمەتتىك باستاماسىنا قاتىستى ءتۇسىندىرۋ جۇمىستارىن باستادى. بۇل بەس باستامانىڭ قاي-قايسىسىن الساڭىز دا، حالىقتىڭ جانىنا جاقىن ءارى بۇگىنگى ەڭ وزەكتى ماسەلەلەردەن شىعۋدىڭ توتە جولى ىسپەتتى. سوندىقتان ءسوز كەزەگىن العان سەرىك سەيدۋمانوۆ «بۇگىنگى كۇنى ەلىمىزدە باسپاناعا مۇقتاج ازاماتتاردىڭ سانى 14 پايىزدى قۇراپ وتىرعانىن، الەۋمەتتىك باستاما وسى ازاماتتاردىڭ بارلىعىن تۇرعىن ۇيمەن قامتاماسىز ەتۋدى كوزدەيتىنىن ايتا كەلىپ: «بۇل باعدارلاما ۇزاق مەرزىمگە ارنالعان. حالىقتى تولعاندىرعان ماسەلە تولىق شەشىلمەيىنشە جۇمىس ىستەيتىن بولامىز. دەگەنمەن، 2023 جىلعا قاراي باعدارلامانىڭ نەگىزگى پارامەترلەرى ورىندالا باستايتىنىنا كۇمان جوق»، – دەدى. ول سونداي-اق، باسپانالاردىڭ ءبىر قولعا ءوتىپ كەتپەۋىن قاداعالاۋ ماقساتىندا ءتيىستى شەكتەۋلەر قويىلىپ وتىرعانىن دا تىلگە تيەك ەتتى.
سونىمەن قاتار، تۇرعىن ءۇي سالۋ جۇمىستارىنا، نەگىزىنەن، مەملەكەتتىك جانە جەكەمەنشىك سەرىكتەستىكتى دامىتۋ ارقىلى قول جەتكىزۋ كوزدەلىپ وتىرعانى بەلگىلى. وسى ماسەلەگە توقتالعان دەپۋتات ەرجان قۇدايبەرگەن باعدارلامانى اۋىلدىق جەرگە دە يكەمدەۋ كەرەكتىگىن ءسوز ەتتى. «اۋىلدىق جەردە كوپ قاباتتى تۇرعىن ءۇي سالا المايتىنىمىز بەلگىلى. سوندىقتان ول جاقتا جەكە باسپانا سالۋ، جاس ماماندارعا جاعداي جاساۋ جونىندە «ءتۇرعىن-ۇي قۇرىلىس جيناق بانكىنىڭ» باسشىلارىمەن كەلىسسوز جۇرگىزىپ، تاپسىرما بەردىك. سىزدەر ماماندىق الىپ، اۋىلعا بارعاندا، ماسەلەلەرىڭىز شەشىلەدى دەپ ويلايمىن»، – دەدى ستۋدەنتتەرگە.
باستاماداعى باستى ماسەلە – ەلباسى ايتقان ستۋدەنتتەرگە جاتاقحانا سالۋ جايى. قازىرگى تاڭدا ەلىمىز بويىنشا ستۋدەنتتەرگە 707 مىڭ ورىن جەتىسپەيدى، ونىڭ 21،5 مىڭى الماتىنىڭ ۇلەسىنە تيەدى ەكەن. جاڭا باستاما بويىنشا 2022 جىلعا دەيىن ءارقايسىسى شامامەن 500 ورىنعا ارنالعان 150 جاتاقحانا سالۋ كوزدەلۋدە. ۋنيۆەرسيتەت رەكتورى پرەزيدەنتتىڭ بۇل باستاماسىن قولدايتىنىن جانە جاتاقحانا سالۋعا دايىندىق جۇمىستارىنىڭ جۇرگىزىلىپ جاتقانىن جەتكىزدى.
