اگرارلىق ءبىلىمنىڭ قارا شاڭىراعى قازاق ۇلتتىق اگرارلىق ۋنيۆەرسيتەتى ۇجىمى تاعى ءبىر تاماشا جيىننىڭ كۋاسى بولدى. ق ر پارلامەنت ءماجىلىسىنىڭ دەپۋتاتتارى ەلباسىنىڭ الەۋمەتتىك بەس باستاماسىن حالىققا ءتۇسىندىرۋ ماقساتىندا اگرارلىق ۋنيۆەرسيتەتكە اتباسىن بۇرىپ، ءبىلىم الىپ جاتقان ستۋدەنتتەردىڭ تىنىس-تىرشىلىگىمەن تانىسىپ، جاتاقحانالاردى ارالاپ كوردى.
ۋنيۆەرسيتەت جانىنداعى حالىقارالىق اگروتەحنولوگيالىق حاب قۇرامىنا كىرەتىن يننوۆاسيالىق ورتالىقتار مەن زەرتتەۋ-زەرتحانالارىن ارالاپ، «ن.نازاربايەۆ ءبىلىم جانە عىلىم ورتالىعىنىڭ» اشىلۋ سالتاناتىنا قاتىستى.
ۋنيۆەرسيتەت رەكتورى، ق ر ۇعا اكادەميگى تىلەكتەس ەسپولوۆ قوناقتارعا وقۋ ورنىنىڭ بۇگىنگى جەتىستىكتەرى مەن الداعى ماقساتتارى تۋرالى بايانداپ، «پرەزيدەنتتىڭ بەس الەۋمەتتىك باستاماسىن» ىسكە اسىرۋعا بايلانىستى ۋنيۆەرسيتەت بويىنشا ءازىرلەنگەن جۇمىس جوسپارى اياسىندا اتقارىلىپ جاتقان ناقتى ءىس-شارالار بارىسى تۋرالى اڭگىمەلەدى. وسىدان سوڭ ۋنيۆەرسيتەتكە ارنايى كەلگەن حالىق قالاۋلىلارى – ق ر پارلامەنتى ءماجىلىسى ءتوراعاسىنىڭ ورىنباسارى، «نۇر وتان» پارتياسىنىڭ ماجىلىستەگى فراكسياسىنىڭ جەتەكشىسى – گۇلميرا ەسىمبايەۆا، ق ر پارلامەنتى ءماجىءلىسى الەۋمەتتىك-مادەني دامۋ كوميتەتىنىڭ ءتورايىمى، «نۇر وتان» پارتياسىنىڭ ماجىلىستەگى فراكسياسىنىڭ مۇشەسى – گۇلنار ىقسانوۆا، ق ر پارلامەنتى ءماجىءلىسىنىڭ دەپۋتاتى، «نۇر وتان» پارتياسىنىڭ ماجىلىستەگى فراكسياسىنىڭ مۇشەسى زاۋرەش امانجولوۆا جۇمىس ساپارلارىن ۋنيۆەرسيتەت جانىنداعى ستۋدەنتتەر ءۇيىن ارالاۋدان باستاپ، بولمەلەرگە باس سۇعىپ، ولاردىڭ جاي-كۇيىمەن تانىستى.
ءماجىلىس دەپۋتاتتارىمەن بىرگە «نۇر وتان» پارتياسىنىڭ الماتى قالاسى فيليالى ءتوراعاسىنىڭ ءبىرىنشى ورىنباسارى جۇلدىز وماربەك، الماتى قالاسى ءماسليحاتىنىڭ دەپۋتاتى، «نۇر وتان» پارتياسىنىڭ الماتى قالاسى فيليالى ءتوراعاسىنىڭ ورىنباسارى ستانيسلاۆ كانكۋروۆ جانە باسقا دا لاۋازىمدى ازاماتتار بولدى.
قوناقتار ستۋدەنتتىك ۇيلەردەگى جاعدايمەن تانىسىپ شىققاننان كەيىن، ۋنيۆەرسيتەتتىڭ باس عيماراتىنداعى ءماجىلىس زالىندا ارنايى باسقوسۋ ءوتتى. جيىندى ۋنيۆەرسيتەت رەكتورى، اكادەميك تىلەكتەس ەسپولوۆ اشىپ، جۇرگىزىپ وتىردى:
– قازاق ۇلتتىق اگرارلىق ۋنيۆەرسيتەتىنىڭ ۇجىمى ەلباسى ۇندەۋىندەگى ماڭىزدى بەس باستامانى قولداپ، وندا ايتىلعان وزەكتى ماسەلەلەردى ەرەكشە ىقىلاسپەن قابىلدادى. ەلباسى ۇندەۋىندە مەملەكەتتىك-جەكەمەنشىك سەرىكتەستىكتىڭ قاتىسۋىمەن 75 مىڭ ورىنعا ارنالعان ستۋدەنتتىك جاتاقحانالاردى 2020 جىلعا دەيىن سالۋ جوسپارلاعانى تۋرالى ايتىلدى. بۇل، اسىرەسە، 98% اۋىل بالالارى ءبىلىم الاتىن ءبىزدىڭ ۋنيۆەرسيتەتىمىز ءۇشىن قۋانا قابىلدايتىن جاڭا باستاما بولىپ تۇر. بۇگىنگى تاڭدا ۋنيۆەرسيتەتىمىزدە ستۋدەنتتەردىڭ 40% عانا جاتىن ورىندارمەن قامتاماسىز ەتىلگەن. ءالى دە 2000-نان اسا ستۋدەنتىمىز جاتاقحاناعا مۇقتاج. وسىعان بايلانىستى ۋنيۆەرسيتەت تاراپىنان قۇزىرەتتى ورىندارعا ارنايى ۇسىنىس جاسالىپ، جاڭا ۇلگىدەگى زاماناۋي جاتاقحانا قۇرىلىسىنىڭ جوباسىن ازىرلەندى، – دەدى رەكتور.
كەزدەسۋ بارىسىندا ق ر پارلامەنتى ءماجىلىسى ءتوراعاسىنىڭ ورىنباسارى، گۇلميرا ەسىمبايەۆا مەملەكەت باسشىسىنىڭ ەگەمەن ەلىمىزدىڭ كەمەل كەلەشەگىن قامتاماسىز ەتۋ جولىنداعى ەرەن ەڭبەگىن ەرەكشە اتاپ ءوتىپ، ەلباسى ۇسىنعان الەۋمەتتىك بەس باستامانىڭ ماڭىزىنا توقتالىپ، ستۋدەنتتەرمەن پىكىرلەستى:
– وتاندىق اۋىل شارۋاشىلىق ءبىلىمى مەن عىلىمىنىڭ كوشباسشىسى، توقسان جىلدىق تاريحى بار – قازاق ۇلتتىق اگرارلىق ۋنيۆەرسيتەتىندە اتقارىلىپ جاتقان اۋقىمدى جۇمىستارمەن تانىسا وتىرىپ، كوز جەتكىزگەنىمىز – بۇل وقۋ ورداسىندا جاستارىمىزدىڭ وزىق ءبىلىم الىپ، زاماناۋي عىلىممەن اينالىسۋىنا بارلىق جاعداي قاراستىرىلعان ەكەن. جاتاقحانالاردى ارالاپ، ستۋدەنتتەردىڭ جاعدايلارىن ءوز كوزىمىزبەن كورىپ، ءوتىنىش، تىلەكتەرىن تىڭدادىق. عىلىمي ورتالىقتاردى، زەرتحانالاردى ارالاپ، جاس عالىمداردىڭ عىلىمي جوبالاردى ورىنداۋ پروسەستەرىنە كۋا بولدىق. العىر دا ءبىلىمدى جاستارىمىز جانىپ تۇر! ەلباسىمىزدىڭ بەس باستاماسىن ءبىز ولارعا ەمەس، ولار بىزگە ءتۇسىندىرىپ بەردى دەسەك تە بولادى، – دەدى حالىق قالاۋلىسى گۇلميرا ەستايبەك قىزى.
جيىندا قازۇاۋ-دىڭ ستراتەگيالىق دامۋ باسقارماسىنىڭ باسشىسى، ەكونوميكا عىلىمىنىڭ دوكتورى، پروفەسسور ۇكىلاي كەريموۆا، دامۋ جوبالارىن باسقارۋ باسقارماسىنىڭ باسشىسى، ەكونوميكا عىلىمىنىڭ كانديداتى، پروفەسسور گۇلميرا نۇرمانبەكوۆا سىندى عالىمدار مەن بەلسەندى ستۋدەنتتەر ءسوز سويلەپ، ەلباسىنىڭ بەس باستاماسىنا قاتىستى وي-پىكىرلەرىمەن ءبولىستى.
ءدال وسى كۇنى، قوناقتار ۋنيۆەرسيتەت جانىنداعى «ن.نازاربايەۆ ءبىلىم جانە عىلىم ورتالىعىنىڭ» اشىلۋ سالتاناتىنا قاتىسىپ، ورتالىقتىڭ جاستاردى تاربيەلەۋگە زور ىقپال جاسايتىنىن اتاپ ءوتتى. ورتالىقتا زامانعا ساي جابدىقتالعان ەلباسى كىتاپحاناسى، ەلباسى مۇراجايى، «دوستىق» ستۋدەنتتىك اسسامبلەياسى زالدارى ورنالاسقان.
ۋنيۆەرسيتەتتەگى تاربيە جۇمىسىنىڭ باستى باعىتى – ەلباسى بەلگىلەپ بەرگەن «ماڭگىلىك ەل» جالپىۇلتتىق يدەياسىن جۇزەگە اسىرۋ اياسىندا بولاشاق مامانداردى جان-جاقتى دامىتۋعا ارنالعان و.ءسۇلەيمەنوۆ اتىنداعى الەۋمەتتىك-گۋمانيتارلىق ءبىلىم بەرۋ جانە تاربيە ينستيتۋتى، «رۋحاني جاڭعىرۋ» گۋمانيتارلىق زەرتتەۋلەر ينستيتۋتى، تاربيە جانە قوعامدىق جۇمىستار جونىندەگى دەپارتامەنتى، «قازاقستان جولى» تاربيە-بىلىم ورتالىعى، «زيالى قازاق» دەبات ورتالىعى جانە باسقا دا ستۋدەنتتىك جاستار ۇيىمدارى اۋقىمدى جۇمىستار جۇرگىزىپ كەلەدى.
كەزدەسۋدەن كەيىن قوناقتار ستۋدەنتتەر تاراپىنان تۇسكەن ۇسىنىس-پىكىرلەردى ءتيىستى ورىندارعا جولدايتىندىقتارىن جەتكىزدى.
الماتى اقشامى
