ماقتارال اۋدانىن قالاي دامىتۋعا بولادى؟ ءوڭىردىڭ الەۋمەتتىك-ەكونوميكالىق احۋالىن جاقسارتۋدىڭ قانداي جولدارى بار؟  ءمىرزاشول وڭىرىندەگى ماقتا داقىلىنىڭ بولاشاعى قانداي؟ ەل اراسىنداعى ىنتىماق، بىرلىكتى قالاي نىعايتا الامىز؟  وسى جانە وزگە دە وزەكتى ساۋالدار ماقتارال اۋدانىنىڭ اكىمى جامانتاي بەيسەنبايەۆتىڭ  اۋدان اقساقالدارىمەن كەزدەسۋىندە تالقىلاندى.

سوڭعى جىلدارى ءمىرزاشول ءوڭىرىنىڭ ەكونوميكالىق دامۋى كورسەتكىشتەرى كوڭىل كونشىتپەي وتىرعانى جاسىرىن ەمەس. ايماقتا ءىرى كاسىپورىندار اشۋ، يندۋستريالدى-يننوۆاسيالىق جوبالاردى جۇزەگە اسىرۋ جولىندا ءبىرقاتار قيىندىقتار بار. ينۆەستور تارتۋ، شەتەلدەن قوماقتى قارجى اكەلۋ سەكىلدى جاۋاپتى ىستەردە اۋداننىڭ وبلىس ورتالىعىنان شەتقارى ورنالاسقاندىعى، كولىكتىك-لوگيستيكالىق بايلانىستىڭ ءوز دەڭگەيىندە دامىماۋى، تەمىر جول، اۋە قاتىناسى  بايلانىستارىنىڭ جوقتىعى ەداۋىر كەدەرگى كەلتىرىپ  وتىرعانى راس.

دەسەك تە،  اۋداندا اۋىل شارۋاشىلىعى سالاسىندا العا ىلگەرىلەۋشىلىك بايقالادى. ماقتا ەگىپ، باقشا ونىمدەرىن وسىرۋدە وبلىستا تەڭدەسى جوق اۋدان ديحاندارى جىل سايىن جاڭا ىزدەنىستەرگە بەت بۇرىپ كەلەدى. اعىن سۋ تاپشىلىعى، سۋارمالى جەرلەردىڭ سورلانۋى، زيانكەستەردىڭ كوبەيۋى  سەكىلدى تۇيتكىلدەرمەن كۇرەسۋدە اۋدان ەڭبەككەرلەرىنىڭ ەڭبەگى وراسان. وسى جايتتاردى تىلگە تيەك ەتكەن اۋدان اكىمى جامانتاي قاناي ۇلى ومىرلىك تاجىريبەسى باي، اگرو سالانىڭ ناعىز ماماندارى بولعان اقساقالداردى اڭگىمەگە تارتتى.

ءوز كەزەگىندە ءسوز العان اقساقالدار جاڭادان تاعايىندالعان اۋدان اكىمىنىڭ جۇمىسىنا ساتتىلىك تىلەپ، ەلدىڭ ىنتىماعى مەن بىرلىگىن ساقتاۋدا جان اياماي قىزمەت ەتۋگە شاقىردى. وسى رەتتە ولار ءبىر اۋىزدان اۋدان باسشىسىنا قولداۋ بىلدىرەتىندىكتەرىن جەتكىزدى.

سونداي-اق اقساقالدار الداعى جىلدارى اۋدانداعى ەگىستىك جەرلەردى ءارتاراپتاندىرۋ ماسەلەلەرىنە ءمان بەرۋ كەرەكتىگىنە توقتالدى. سوڭعى جىلدارى اۋداندا ماقتا ەگىستىگىنىڭ كولەمى قىسقارىپ كەلە جاتقانى بايقالادى. سەبەبى،  اق التىن ەگىپ، ءوسىرۋدىڭ، كۇتىپ-باپتاۋدىڭ جىل سايىن قيىنداي تۇسكەنى جاسىرىن ەمەس. ءتىپتى شارۋالار شىعىنىن وتەي الماي، قينالعان كەزەڭدەردىڭ تۋىنداعانىن دا ەسكە الدى.  ماسەلەنىڭ ءمان جايىن باعامداعان اۋدان اكىمى الداعى ۋاقىتتا وڭىردەن جۇگەرى، جاڭعاق، قارقىندى باۋ ەگۋ جۇمىستارى قارقىن الاتىنىن ايتتى. بيىلدىڭ وزىندە شارۋالارعا اۋداندا 10 مىڭ گەكتار اۋماققا جۇگەرى ەگۋ ۇسىنىلىپ وتىر. ونى قايتا وڭدەۋ ءىسى دە جاندانا تۇسەتىن بولادى.

بۇدان بولەك، جىلىجايلار كولەمى ارتىپ، تامشىلاتىپ سۋارۋ ءادىسىن كەڭىنەن قولدانۋ جوسپارلانۋدا. سونىمەن قاتار اۋداننان ءىرى تاۋىق فەرماسىن سالۋ، قۇس شارۋاشىلىعىمەن اينالىساتىن كووپەراتيۆ قۇرۋ جۇمىستارى دا قولعا الىناتىن بولادى.

جيىندى قورىتقان اۋدان باسشى الداعى جوسپارلاردى بىرلەسىپ ىسكە اسىرۋدا ءوڭىر حالقىنىڭ اۋىزبىرشىلىگى، ىمىرالى ىنتىماعى ماڭىزدى ءرول اتقاراتىنىن ەسكەرىپ، اقساقالداردى ەل ءىشىن ىنتىماققا ۇندەپ جۇرۋگە شاقىردى.