ناۋرىز تويلاپ قازيتۋ-دىڭ جالىندى بۇل جاستارى،
ءان-بي ارناپ كورەرمەنگە ىزگى جولدى باستادى.
كوتەرىڭكى كوڭىل سىيلاپ، قۇرمەتپەنەن بارشاعا
اشىق بولسىن دەپ تىلەيدى ەلىمىزدىڭ اسپانى!

بۇل جىر جولدارى بوستاندىق اۋدانىندا ورىن تەپكەن قازاقستان ينجەنەرلىك-تەحنولوگيالىق ۋنيۆەرسيتەتىندە وتكەن ناۋرىز مەرەكەسىندە جىر بولىپ شاشىلدى. بەرەكە - بىرلىكتى، ىنتىماقتى تىرلىكتى، جاقسىلىقتى، مەيىر - شاپاعاتتى، كەڭ پەيىلدى، باق-بەرەكەنى، كوكتەمنىڭ  جىلۋ شۋاعىن وزىمەن بىرگە الا كەلەتىن ناۋرىز قازيتۋ-دا تويلانىپ، بارشاعا قۋانىش پەن مەرەكە سىيلادى. كۇن مەن ءتۇن تەڭەلەتىن، حالىقتىڭ اۋىزى اققا تولاتىن، مالدىڭ اۋىزى كوككە كەنەلەتىن شاقتا تويلاناتىن مەرەكەنى قازيتۋ ۇجىمى سان-سالتاناتىمەن وتكىزدى.

ايتۋلى مەرەكە ۋنيۆەرسيتەت باسشىلىعى، وقىتۋشى-پروفەسسورلار قۇرامى، قىزمەتكەرلەر، جاستار ۇيىمدارى كوميتەتى مەن ستۋدەنتتەردىڭ ءبىر كىسىدەي ات سالىسۋىمەن جوعارى دەڭگەيدە ءوتتى.

مەرەكەگە ەڭبەك جانە سوعىس ارداگەرلەرى، اكادەمقالاشىقتا ورنالاسقان بارلىق عىلىمي-زەرتتەۋ ينستيتۋتتارىنىڭ عالىمدارى، الماتى قالاسى جاستار ساياساتى باسقارماسى، بوستاندىق اۋداندىق ىشكى ساياسات ءبولىمى، «رۋحاني جاڭعىرۋ» الماتى قالاسىنىڭ ءوفيسىنىڭ وكىلدەرى، الماتى قالاسىنىڭ جوو جاستارىنىڭ باسىن بىرىكتىرگەن  G-38 مۇشەلەرى،  «زەردە-قازيتۋ» وليمپياداسىنىڭ جۇلدەگەرلەرى، اتا-انالار، ت.ب. قوناقتار قاتىسۋىمەن ءوتتى.

مەرەكەنىڭ شىمىلدىعى ۋنيۆەرسيتەتىمىزىدىڭ ءبيشى قىزدارىنان قۇرالعان «شابىت» بي توبىنىڭ «شاشۋ» اسەم بيىمەن اشىلدى. 
ق ر پرەزيدەنتى ن. نازاربايەۆتىڭ «بولاشاققا باعدار: رۋحاني جاڭعىرۋ» باعدارلاماسىنداعى باعىتتاردى وزەك ەتىپ ۇلى دالا ءداستۇرىن، ۇلتتىق رۋحىمىزدى جانە استانامىزدىڭ 20 جىلدىعىن  جۇرتشىلىق نازارىنا پاش ەتۋدى ماقسات ەتكەن ونەرلى ستۋدەنتتەردىڭ تەاترلىق كلۋبىنىڭ دايىنداعان مۋزىكالىق ساحنالانعان قويىلىممەن مەرەكەمىز جالعاسىن تاپتى. ونەرلى ستۋدەنتتەر كۇن مەن ءتۇننىڭ تەڭەلىپ، جەر دۇنيەنىڭ جاڭارۋىن بەينەلەيتىن ساحنالىق كورىنىستى كورسەتىپ، ءبىرجان سال، قىز جىبەك، تولەگەن، شەگە سياقتى وبرازدارعا ەنىپ، جەر انا مەن قىدىر اتانىڭ ىستىق لەبىز، باتالارىن الىپ، تاۋەلسىز قازاقستاندا ەركىن ءوسىپ كەلە جاتقاندارىن جەتكىزىپ، كورەرمەننىڭ ىستىق ىقىلاسىنا بولەندى. كوللەدج  ستۋدەنتتىك پارلامەنتى 100 ستۋدەنتتىڭ باسىن بىرىكتىرىپ، ۇيىمداسا بيلەگەن قازاق ءبيى «قارا جورعا» كەلگەن جۇرتتىڭ دەلەبەسىن قوزدىرىپ، تاماشا كوڭىل كۇي سىيلادى.

قازاقستان ينجەنەرلىك-تەحنولوگيالىق  ۋنيۆەرسيتەتىنىڭ رەكتورى، فيزيكا-ماتەماتيكا عىلىمدارىنىڭ دوكتورى، پروفەسسور تەميربەكوۆ نۇرلان مۇقان ۇلى جانە مەرەكەنىڭ ءقادىرلى قوناعى ەكى مارتە كەڭەستەر وداعىنىڭ باتىرى، ۇشقىش، اۆياسيا گەنەرالى، قازاقتىڭ تەكتى قىرانى تالعات بيگەلدينوۆتىڭ ۇيىندەگى اپامىز ورىندىبيكە اپاي بارشا جينالعان جۇرتشىلىقتى ناۋرىز مەرەكەسىمەن قۇتتىقتاپ، جىلى لەبىزدەرىن ءبىلدىردى.

ناۋرىز مەرەكەسى رەسپۋبليكامىزدىڭ 11 اۋماعىن قامتىپ، 2300-دەن استام وقۋشىلاردىڭ باسىن قوسقان  «زەردە-قازيتۋ – 2018» پاندىك وليمپياداسىنىڭ جەڭىمپازدارىن  سالتاناتتى تۇردە مارپاتتاۋ راسىمىمەن جالعاسىن تاپتى.

قازاقستاننىڭ ءار وبلىسىنان كەلگەن جەڭىمپاز مەكتەپ تۇلەكتەرى ماراپاتتالدى.  ناۋرىز مەرەكەسىندە  وقۋشىلار جوعارى ءبىلىم الۋعا زور مۇمكىندىك تۋعىزىپ وتىرعان ەلىمەن ماقتاناتىندىقتارىن جەتكىزىپ، زور قۋانىشقا بولەندى.
ناۋرىز تويىنا قوناق رەتىندە اننەن شاشۋىن ارقالاي كەلگەن قازاقستان ەستارداسىنىڭ جۇلدىزى، ءانشى جىگەر اۋىپبايەۆ  جانە قازيتۋ ونەرلى جاستارى جۇرتشىلىق كوڭىلىن اسەم سازدى انگە، بيگە بولەدى. ەسكى وقۋ عيماراتىنىڭ الاڭىندا ۇلتتىق ناقىشتا كيىز ۇيلەر تىگىلىپ حالقىمىزدىڭ ۇلتتىق بۇيىمدارى جانە كيىمدەرىمەن بەزەندىرىلدى.

قوناقتار مەن وقىتۋشىلارعا، ستۋدەنتتەرگە ارنايى جايىلعان اق داستارحان باسىندا ناۋرىز كوجە ءىشىلىپ، ۇلتتىق اندەر شىرقالدى. التىباقان تەۋىپ، شاتتىقتان جۇزەرى جايناعان جاستاردىڭ كوڭىل –كۇيى ەرەكشە.

سونداي اق «ارقان تارتىس»، «قول كۇرەس»، «باتپان كوتەرۋ» سياقتى قازاقتىڭ ۇلتتىق ويىندارىنان جارىستار ۇيىمداستىرىلىپ، جەڭىسكە جەتكەن ستۋدەنتتەر ماقتاۋ قاعازىمەن، سىيلىقتارمەن ماراپاتتالدى.