استانا قالالىق ءىىد تەرگەۋ باسقارماسى IELTS حالىقارالىق سەرتيفيكاتىن قولدان جاساۋ فاكتىسى بويىنشا تەرگەۋ شارالارىن جالعاستىرۋدا، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.
اتالعان ۆەدومستۆونىڭ مالىمەتىنشە، «استانا» مەديسينالىق ۋنيۆەرسيتەتى ستۋدەنتتەرىنىڭ حالىقارالىق سەرتيفيكاتتى قولدان جاساۋ فاكتىسى بويىنشا 27 قىلمىستىق ىسكە سوت شەشىمى شىققان. «ق ر قىلمىستىق كودەكسىنىڭ 385 بابى بويىنشا 27 قىلمىستىق ءىس سوتقا جىبەرىلىپ، سوت شەشىمى شىقتى. قالعاندارى بويىنشا پروسەسسۋالدىق شەشىم قىسقا ۋاقىتتىڭ ىشىنە قابىلداناتىن بولادى. ءىىد باسشىلىعى تەرگەۋ بارىسىن باقىلاۋعا الدى»، — دەپ اتاپ وتەدى باسپا ءسوز قىزمەتى.
بۇدان بۇرىن حابارلانعانداي، «استانا مەديسينا ۋنيۆەرسيتەتى» اق-عا ءتۇسۋ ءۇشىن IELTS سەرتيفيكاتىن ساتىپ العان 100-دەن استام ستۋدەنت وقۋدان شىعارىلدى. 2017 جىلدىڭ كۇزىندە ەمتيحاندى ءوز كۇشىمەن تاپسىرعاندار جالعان سەرتيفيكات ۇسىنعانداردىڭ بارىنا شاعىمدانىپ، ارىز تۇسىرگەن بولاتىن. وعان سايكەس تەكسەرىس جۇرگىزىلىپ، ناتيجەسىندە اعىلشىن ءتىلىن ءبىلۋ دەڭگەيى بويىنشا تىركەلمەگەن 117 سەرتيفيكات انىقتالدى. كەيىن ق ر ءبىلىم جانە عىلىم ءمينيسترى ەرلان ساعادييەۆ بۇل ماسەلەگە قاتىستى پىكىر ءبىلدىرىپ، ءتيىستى كوميسسيا قۇرىلاتىندىعىن ءمالىم ەتتى.
«بىلتىر ءبىز اتالعان ۋنيۆەرسيتەتكە بارىپ، جۇمىستارىن تەكسەرىپ، ولارعا بالالاردى وقۋدان بوساتۋ بويىنشا نۇسقاما بەردىك. بۇل نۇسقاما ءىشىنارا ورىندالدى. ستۋدەنتتەردىڭ ءبىر بولىگى وزدەرىنىڭ قۇقىقتارىن قورعاۋ اياسىندا سوتقا جۇگىندى. دەگەنمەن دە، نۇسقاما ورىندالۋى ءتيىس. بۇل ۋنيۆەرسيتەت ستۋدەنتتەردى وقۋدان بوساتۋىن دۇرىس شەشىم دەپ سانايمىز. ەندى ءبىز دەنساۋلىق ساقتاۋ مينيسترلىگىمەن جانە ۋنيۆەرسيتەتپەن بىرگە ءتيىستى كوميسسيانى قۇرۋىمىز كەرەك. وسى ورايدا وقۋ ورنى مەن ستۋدەنتتەرگە قاتىستى قانداي قۇقىقتىق قادامدار قابىلداۋ كەرەكتىگىن تالقىلاۋ ماڭىزدى»، - دەدى ساعادييەۆ.
ال بۇگىن باسپا ءسوز ءماسليحاتى بارىسىندا استانا مەديسينا ۋنيۆەرسيتەتىنىڭ رەكتورى ءماجيت شايداروۆ جالعان سەرتيفيكاتپەن ماگيستراتۋرا، رەزيدەنتۋرا جانە دوكتورانتۋراعا تۇسكەندەردىڭ ءتىزىمى جاريالاناتىندىعىن ايتقان ەدى. سونىمەن قاتار اتالعان ءبىلىم ورداسىنىڭ جوعارى وقۋ ورنىنان كەيىنگى ءبىلىم فاكۋلتەتىنىڭ دەكانى ەرنار تۇرسىنبەت وقۋدان شىعارىلعان ءبىلىم الۋشىلارعا قانشا قارجى شىعىندالعاندىعىن جاريا ەتتى.
