استانا مەديسينالىق ۋنيۆەرسيتەتىنىڭ رەكتورى ءماجيت شايداروۆ IELTS سەرتيفيكاتتارىنا بايلانىستى تۋعان داۋعا قاتىستى تۇسىنىكتەمە بەردى.

«جوعارعى وقۋ ورنىنان كەيىنگى ءبىلىم بەرۋ دەكانىمەن كەلىسىمشارتىمىز دەرەۋ توقتاتىلادى. ال بۇل ىسكە قاتىسى دەكان ورىنباسارى مەن باس مامان ءوز ەركىلەرىمەن شىقتى»، - دەدى شايداروۆ.

سونىمەن قاتار رەكتوردىڭ ايتۋىنشا، وقۋدان شىعارىلعان ستۋدەنتتەر ۋنيۆەرسيتەتكە قايتا تاپسىرا الادى، الايدا اقىلى بولىمگە.

قازاقستان رەسپۋبليكاسى دەنساۋلىق ساقتاۋ مينيسترلىگىنىڭ عىلىم جانە ادام رەسۋرستارى دەپارتامەنتىنىڭ ديرەكتورى ايگۇل قاپتاعايەۆا اتالمىش وقيعانى تەك ۋنيۆەرسيتەت ءۇشىن عانا ەمەس، بارلىق وقۋ ورنىنا ساباق بولعانىن ەسكەرتتى.

«2017 جىلى تامىز بەن قىركۇيەكتە تەكسەرىس بولدى. بۇل فاكتىلەر انىقتالعاندا ءبىز ءوزىمىزدىڭ ۆەدومستۆولىق ۇيىمدارىمىزعا حابار بەرگەنبىز. بارلىق سەرتيفيكاتتار تەكسەرىلدى. ال جالعان سەرتيفيكاتتار فاكتى استاناداعى مەديسينالىق ۋنيۆەرسيتەتتە عانا انىقتالدى. مەنىڭشە، ديپلومداردى تەكسەرۋ شارالارى بولمايدى. وكىنىشكە قاراي، بۇل ۇلكەن ماتەريالدىق، مورالدىق شىعىن اكەلەدى، ونىڭ ۇستىنە تەك ۋنيۆەرسيتەت ەمەس، بۇكىل سالانىڭ بەدەلىنە نۇقسان كەلتىرەدى. بۇل وقيعانىڭ سالقىنى جالپى سالاعا ءتيىپ كەتۋى ابدەن مۇمكىن. مۇنداي جاعدايلار قايتالانباس ءۇشىن ءتۇرلى شارالار قولدانىلاتىن بولادى»، - دەدى ايگۇل قاپتاعايەۆا،

ەستەرىڭىزگە سالا كەتەيىك، بىلتىر كۇزدە ەمتيحاندى ءوز كۇشىمەن تاپسىرعاندار ارىزدانىپ، بۇل ءىس بويىنشا تەكسەرىس جۇرگىزىلگەن ەدى. سونىڭ ناتيجەسىندە اعىلشىن ءتىلى ەمتيحانى بويىنشا 117 تىركەلمەگەن سەرتيفيكات انىقتالدى. ماگيستراتۋرا نەمەسە دوكتورانتۋراعا تۇسەمىن دەگەندەرگە IELTS سەرتيفيكاتى ەمتيحان كەزىندە باسىمدىق بەرەدى. سول سەبەپتى بولار، بىلتىر كوپ ادام بۇل قۇجاتتى ساتىپ الىپ، جاراسىن جەڭىلدەتكىسى كەلدى. الايدا بارلىق سىناقتان ءوز كۇشىمەن وتكەندەر قالىپتاسقان جاعدايمەن كەلىسپەدى. ستۋدەنتتەر بۇل ماسەلەگە قوعام نازارىن بارىنشا اۋدارۋعا تىرىستى. ناتيجەسىندە ءبىلىم جانە عىلىم مينيسترلىگى تەكسەرىس جۇرگىزىپ، بازادا تىركەلمەگەن 117 سەرتيفيكات بار ەكەندىگىن انىقتادى.