ەلىمىزدەگى اق ماقتانى وسىرەتىن جالعىز ءوڭىر بولىپ تابىلاتىن وڭتۇستىك قازاقستان وبلىسىندا ماقتا ءدانىن سەبۋ جۇمىستارى باستالدى.  وتاندىق توقىما ونەركاسىبىنىڭ دامۋىنىڭ نەگىزىن قۇرايتىن وبلىستا بيىلعى جىلى مەجە بويىنشا ءشيتتى ماقتا 100 مىڭ گەكتاردان استام جەرگە سەبىلەدى دەپ كۇتىلۋدە. قازىرگى تاڭدا وڭتۇستىكقازاقستاندىق شارۋالار 24 مىڭ گەكتارعا ماقتا ءدانىن سەۋىپ ۇلگەرگەن. بۇگىندە ماقتا وسىرۋمەن وڭىردەگى ارىس پەن تۇركىستان قالالارى مەن ماقتاارال، شاردارا، ورداباسى اۋداندارى اينالىسادى.

ال ەلىمىزدەگى اق التىننىڭ وتانى سانالاتىن ماقتاارال اۋدانىندا مەجە بويىنشا ماقتا ءشيتى 75 مىڭ گەكتارعا ەگىلۋ كەرەك بولسا، شارۋالار بيىل ماقتا القابىن 95 مىڭ گەكتارعا جەتكىزۋدى جوسپارلاپ وتىر. سوڭعى كۇندەرى اۋا-رايىنىڭ قۇبىلىپ، جاۋىن-شاشىننىڭ جيىلەپ كەتۋىنىڭ سالدارىنان مىرزاشولدىك ديقاندار  ماقتا ءدانىن سەبۋ جۇمىستارىن  بىلتىرعىدان 10-15 كۇنگە كەش باستادى. سوعان قاراماستان بۇگىنگى تاڭدا ماقتارالدىق شارۋالار 22 مىڭ 844 گەكتارعا ماقتا ءدانىن ەككەن. سونداي-اق، اۋداندا 56 مىڭ گەكتار جەر چيزلدەنسە، 93 مىڭ گەكتاردان استام القاپ  تىرمالانىپ، تۇقىمدىق ءشيتتىڭ سەبىلۋىنە دايىندالۋدا.

بيىل وڭىردە تۇقىمدىق شيت تاپشىلىعى سەزىلگەن جوق. اق التىن ەگۋمەن اينالىساتىن ماقتاارال اۋدانىندا 3 مىڭ توننا شيت دايىندالعان بولاتىن. بۇدان بولەك، اۋدانعا جۇڭگو مەن تۇركيا ەلدەرىنەن دە تۇقىمدىق شيت تاسىمالدانۋدا. قازىرگى تاڭدا شارۋالار تۇقىمدىق ءشيتتىڭ كەلىسىن سورتىنا قاراي 250-300 تەڭگە ارالىعىندا ساتىپ الىپ جاتىر.  ال 1 گەكتار القاپقا 30 كەلى ماقتا ءدانى سەبىلەدى.

ايتا كەتەيىك، وبلىستا وتكەن جىلى 134،6 مىڭ گەكتار جەرگە ەگىلگەن ماقتا شيتىنەن  330 مىڭ توننا ءونىم الىنسا، ماقتارال اۋدانىنىڭ قىرمانىنا 219 مىڭ توننادان استام «اق التىن» جينالعان بولاتىن. ماقتا داقىلىنىڭ ورتاشا ونىمدىلىگى ءار گەكتاردان 23،1 سەنتنەردى قۇراعان.