قازاقستاندا ازاماتتىق حال اكتىلەرى تۋرالى انىقتامالار مەن كۋالىكتەردى (تۋۋ تۋرالى، قايتىس بولعانى تۋرالى، نەكەنى تىركەۋ نەمەسە اجىراسۋ تۋرالى، سونداي-اق ءاتى-جونىن اۋىستىرۋ تۋرالى كۋالىكتەر) قايتا الۋ مەرزىمى 50-دەن 15 جۇمىس كۇنىنە دەيىن قىسقارتىلماق، دەپ حابارلايدى قازاقپارات.

«بۇرىن تۋۋ تۋرالى كۋالىكتى قايتا الۋ ءۇشىن ءوزىڭىز دۇنيەگە كەلگەن قالانىڭ حقو-سىنا ءوتىنىش بەرسەڭىز، 5 جۇمىس كۇنى قاجەت بولاتىن. ال، ەگەر ءسىز قاراعاندى وبلىسى قارقارالى اۋدانىندا تۋىپ، استانادا تۇرساڭىز، دايىن قۇجاتتى 50 كۇنگە دەيىن كۇتۋىڭىزگە تۋرا كەلگەن»، - دەپ جازدى ابىلايحان وسپانوۆ Facebook-تەگى پاراقشاسىندا.

ونىڭ ايتۋىنشا، ەندى دايىن قۇجاتتى 15 جۇمىس كۇنى ىشىندە الۋعا بولادى.

«ءبىز ادىلەت مينيسترلىگى مەن «ۇلتتىق اقپاراتتىق تەحنولوگيالار» اق-داعى ارىپتەستەرىمىزبەن بىرلەسىپ، حقو ينتەگراسيالانعان اقپارتتىق جۇيەسى مەن ازاماتتىق حال اكتىلەرىن تىركەۋ (احات) اقپاراتتىق جۇيەلەرىن بىرىكتىردىك. وسىنىڭ ارقاسىندا كۋالىكتەردى نەمەسە انىقتامالاردى قايتا دايىنداۋعا بەرىلگەن ءوتىنىش حقو-دان تۋۋى تىركەلگەن احات بولىمىنە بىردەن تۇسەدى. ەندى دايىن قۇجاتتى 15 جۇمىس كۇنى ىشىندە الۋعا بولادى. ءبىز بۇل مەرزىمدى 5 جۇمىس كۇنىنە قىسقارتقىمىز كەلىپ وتىر. بۇل جاڭاشىلدىق قازاقستاننىڭ بارلىق اۋماعىندا ەنگىزىلەدى»، - دەپ ءتۇسىندىردى مەملەكەتتىك كورپوراسيا باسشىسى.

بىلتىر قازاقستاندىقتار ازاماتتىق حال اكتىلەرى تۋرالى انىقتامالار مەن كۋالىكتەردى قايتا الۋعا  328 239 ءوتىنىش بەرگەن.