بەلى قىلدىرىقتاي بولسا دا قۇمىرسقانىڭ ىلعي تاۋداي جۇك ارقالاپ جۇرگەنىن كورەمىز. بۇل ءبىر كەزدەيسوقتىق پا، الدە ءتاڭىردىڭ پەندەسىنە تاعىلىم السىن دەگەنى مە، ايتەۋىر، قۇمىرسقا دا، ايەل زاتى دا ءبىر ىسپەتتى. تولستويدىڭ «اننا كارەنيناسى» جازىلعاننان باستاپ كۇنى بۇگىنگە دەيىن قانشاما تىلدە، قانشا ەلدە، قانشاما تۋىندى تۇرىندە الەمدى شارلاعانىن ەسكەرسەك، ءبىزدىڭ دە سول ۋاقىتتان بەرى ءبىر عانا ايەل تاعدىرىن ارقاۋ ەتە وتىرىپ، كوپ نارسەنى جەتكىزبەگەنىمىزگە تاڭعالۋعا بولادى. تاريحىمىزعا ۇڭىلسەك، ەل باسىنا كۇن تۋعاندا ەتىگىمەن سۋ كەشىپ كەتكەن ەر اتاۋلىنىڭ ارتىندا قالىپ، وشاعىنىڭ وتىن، ازاماتىنىڭ اتىن وشىرمەي، اۋىر قيىندىق پەن قىلبۇراۋ قياناتتى قاسقايا قارسى العان قازاق ايەلدەرى جەتەرلىك، ال سولاردىڭ ىشىندە فاتيما عابيتوۆانىڭ ءجونى تىم بولەك. سەبەبى ول – ءبىر ەمەس، ءۇش بىردەي ۇلتىمىزدىڭ ۇلى تۇلعاسىنىڭ ۇرپاعىن ءوسىرىپ، مۇرالارىن ساقتاپ قالعان اسىلتەكتى ايەل، التىن قۇرساق انا. ۇشەۋدىڭ ءبىرى – الاشتىڭ ارداقتى ۇلى، كەزىندە ەلىمىزدىڭ ءبىلىم سالاسىنا بىلىكتى باسشىلىق جاساعان ءبىلال سۇلەيەۆ، ەكىنشىسى قازاقتىڭ قۇلاگەر اقىنى ءىلياس جانسۇگىروۆ بولسا، ەندى ءبىرى – ۇلى مۇقاڭ، مۇحتار اۋەزوۆ. ءبىلال سۇلەيەۆ، ءىلياس جانسۇگىروۆ، مۇحتار اۋەزوۆ جانە فا­تيما مەن بالالارى توڭىرەگىندە ءوربي وتىرىپ، قازاقتىڭ حح عاسىر بويىنا باستان كەشكەن زوبالاڭدارىن قامتىعان «فاتيما» قاسىرەتناماسىنىڭ ءبىر عانا ءتۇيىنى سونداعى كە­يىپكەردىڭ، جاڭىلىسپاساق، مۇحتار اۋەزوۆتىڭ اۋزىمەن ايتىلعان مىنا سوزگە سىيعانداي: «قازاقتاعى بۇل قايعى: جىلقىداعى – جامانات، سيىرداعى – قوراسان، قويعا تيگەن جۇت بولدى». الايدا اۆتور مەنەن رەجيسسەردىڭ شەشىمى بىزگە ۇنادى، ياعني قىس ارتىنان كوكتەم كەلەتىن تىرشىلىك زاڭىنا سايكەس، سونداي زۇلماتتىڭ سوڭىندا فاتيما بولاشاقتىڭ يەسى – با­لالارىمەن گۇلگە كومكەرىلەدى.. اۆتور: ءماريام ءابساتتار http://alashainasy.kz