جاسۋر ءاميروۆتىڭ سوزىنە قاراعاندا، ەكى جىل بۇرىن ونىڭ اتا-اناسى اجىراسقان، جاسۋر اكەسىمەن بىرگە تەرمەزدە تۇرعان، ال ەكىنشى مارتە تۇرمىسقا شىققان اناسى ەكى قىزىمەن گيسسارعا كوشىپ كەتكەن. وتكەن جىلى قازان ايىندا جاس جىگىت تاجىك ۆيزاسىن الىپ، اناسىمەن كورىسۋ ءۇشىن تاجىكستانعا بارعان.
ءبىراق جاسۋر اناسىمەن بىرگە ۇزاق تۇرا المادى. بىرنەشە كۇننەن سوڭ ونىڭ اناسى ديلفۋزا اليكۋلوۆا تۇركياعا جۇمىسقا كەتكەن، از ۋاقىتتان سوڭ وگەي اكەسى بالانى ۇيدەن قۋىپ شىققان. جاسۋردىڭ ۇيىنە قايتاتىن اقشاسى بولماعان، سول سەبەپتى ول قارا جۇمىس ىستەۋگە شىققان. جولدا جەرگىلىكتى ءبىر تۇرعىنمەن كەزدەسىپ، ول جاسۋردى گيسسار اۋدانى ءسايود قىشلاعىنا الىپ بارعان.
"ۇيگە كەلگەن سوڭ ول مەنىڭ ءتولقۇجاتىمدى الىپ قويدى. ماعان بولمەنىڭ ءبىر بۇرىشىنان ورىن بەرىپ، اۋلانى تارتىپكە كەلتىرۋدى جانە ءۇيدىڭ قابىرعالارىن تۇزۋلەۋدى تاپسىردى"، - دەدى ول.
ول ءسايود قىشلاعىنىڭ تۇرعىنى نۋمون ميرزويەۆتىڭ ۇيىندە وتكىزگەن سەگىز ايدى "وتە اۋىر" دەپ اتادى. وعان جۇمىسى ءۇشىن اقشا تولەمەدى، دۇرىس تاماقتاندىرمادى، ول ءوز ءتولقۇجاتىن سول كۇيى كورمەگەن. دەگەنمەن نۋمون ميرزويەۆ جاس جىگىتتىڭ سوزدەرىن جوققا شىعارىپ وتىر. ول جاسۋر ءاميروۆتىڭ ۇيىندە تۇرعانىن، وعان تاپسىرمالار بەرگەنىن راستادى. "ءبىراق مەن ونى كۇشپەن ۇستاعان جوقپىن، ءتولقۇجاتىن تارتىپ المادىم"، – دەگەن ميرزويەۆ.
ءىستى تاجىكستان ىشكى ىستەر مينيسترلىگى تەرگەپ جاتىر. ازىرگە قىلمىستىق ءىس قوزعالماعان. اميروۆ وزبەكستان ەلشىلىگىنەن كومەك سۇراۋدى كوزدەپ وتىر.
