فۋتزالدان ستۋدەنتتەر اراسىنداعى دودادا 500-گە جۋىق سپورتشى ب ا ق سىنايدى. شاعىن فۋتبول تاريحىندا مۇنداي كورسەتكىش بۇرىن-سوڭدى بولماعان ەكەن.

ايتا كەتسەك، ستۋدەنتتەر اراسىندا اياق دوپتان العاشقى چەمپيونات 1984 جىلى برازيليادا وتكەن. كەيىننەن پورتۋگاليا، يسپانيا، يتاليا سىندى الەمنىڭ الپاۋىت ەلدەرىندە جالعاسىن تاۋىپ، كەڭىنەن تانىلا باستادى. ال قازاقستان ستۋدەنتتەر قۇراماسى چەمپيوناتقا 2006 جىلدان باستاپ قاتىسا باستادى. ەندى بۇل حالىقارالىق جارىستىڭ ءبىزدىڭ ەلدە عانا ەمەس، جالپى تمد اۋماعىندا تۇڭعىش رەت وتكەنى –  ۇلكەن جەتىستىك دەيدى سالا ماماندارى.

«قىسقى ۋنيۆەرسيادا ويىندارىنان سوڭ سىزدەردە كەرەمەت مۇرا قالدى. ول بىرىنەن-بىرى اساتىن، وتە ساپالى سپورت نىساندارى. جالپى، الماتى وتە ىڭعايلى جەردە ورنالاسقان. سايىسقا ەۋروپا مەن ازيا ەلدەرىنىڭ كوماندالارى دا كەدەرگىسىز كەلە الادى. سوندىقتان بيىلعى جارىسقا قاتىسۋشىلار سانى رەكوردتىق كورسەتكىشكە جەتىپ وتىر. مەنىڭشە، الماتىنىڭ وسى چەمپيونات سىندى بايراقتى باسەكەلەردى وتە جوعارعى دەڭگەيدە وتكىزۋىنە بارلىق مۇمكىندىگى بار»، – دەدى «FISU» باقىلاۋ كوميسسياسىنىڭ جەتەكشىسى دميتريي كيسيليەۆ.

«الماتى بىلتىر قىسقى ستۋدەنتتەر ويىنىن وتكىزىپ، مول تاجىريبە جينادى. مەديسينالىق ينفراقۇرىلىمدى دامىتىپ، دوپينگكە قارسى جۇيە قۇردى. قالاداعى سپورت نىساندارى، دوپينگ بەكەتتەر، مەديسينالىق پۋنكتتەر چەمپيوناتتى جوعارى دەڭگەيدە وتكىزۋگە ابدەن لايىق. ەڭ باستىسى، مۇندا تاجىريبەلى، مىقتى مەديسينا سالاسىنىڭ قىزمەتكەرلەرى بار»، – دەدى «FISU» حالىقارالىق مەديسينالىق كوميسسياسىنىڭ جەتەكشىسى مارات گاتاۋلين.

بايراقتى باسەكەگە 17 ەلدىڭ ستۋدەنتتەر قۇراماسى قاتىسىپ وتىر. ولاردىڭ ىشىندە، ارگەنتينا، چەحيا، پورتۋگاليا جانە گەرمانيا سىندى مىقتى كوماندالار بار. الەمنىڭ ءار تۇكپىرىنەن كەلگەن سپورتشىلاردىڭ بارلىعى «قازاقستان» قوناقۇيىنە جايعاستى. قازاق جەرىن العاش كورگەن شەتەلدىك قوناقتار ءوز اسەرلەرىمەن بىلاي ءبولىستى.

«الماتىعا العاش رەت كەلدىم، قالا وتە ۇنادى. اسىرەسە، ادامدارى قوناقجاي، مەيىرىمدى ەكەن. قازاقستان تۋرالى بۇرىن پاۆەل تاكۋ ەسىمدى دوسىمنان ەستىدىم. ول وسىندا تۋىپ وسكەن، ءقازىر فرانسيانىڭ ءبىر فۋتبول كومانداسىندا وينايدى. ال سىزدەردىڭ چەمپيوناتتى وتكىزۋ دەڭگەيلەرىڭىز كوڭىلىمنەن شىقتى. بۇل جارىسقا 3ء-شى رەت قاتىسۋىم. ءبىراق مۇنداي دەڭگەيدەگى سايىستى كورمەدىم. اسىرەسە، بارلىق قاتىسۋشىلاردى ءبىر قوناقۇيگە ورنالاستىرعانى وتە جاقسى بولدى. بىر-بىرىمىزبەن جاقىن تانىسىپ، دوستاسىپ جاتىرمىز»، – دەدى فۋتزالدان فرانسيا قۇراماسىنىڭ ويىنشىسى مۋحيدين سۋحەل.

«بۇل مەنىڭ قازاقستانعا العاش كەلۋىم. بۇل ەلدەن العان اسەرىمدى سوزبەن جەتكىزۋ مۇمكىن ەمەس. قالا ەرەكشە، جاسىل ەكەن. تابيعاتى دا كەرەمەت. اسىرەسە، كوز تارتار تاۋلارىڭىز ۇنادى. بۇرىن قىمىز تۋرالى كوپ ەستيتىنمىن، تاۋدان قىمىز ءدامىن تاتىپ كوردىم»، – دەدى فۋتزالدان جاڭا زەلانديا قۇراماسىنىڭ ويىنشىسى دەينا مەنەك.

«مەن بۇل چەمپيوناتقا ءبىرىنشى رەت قاتىسىپ وتىرمىن جانە سونىڭ ارقاسىندا ءبىرىنشى رەت الماتىنى كوردىم. قالا وتە ۇنادى، تۇرعىندارى قوناقجاي ەكەن. كومەك سۇراساڭ قول ۇشىن سوزۋعا دايىن تۇرادى. اسىرەسە، ءبىزدىڭ جانىمىزدا جۇرگەن ۆولونتەرلەرگە راحمەت! وسىنشاما كوپ ۆولونتەردى بۇرىن-سوڭدى كورمەپپىن»، – دەدى فۋتزالدان كانادا قۇراماسىنىڭ ويىنشىسى لاريسا ۋايت.