الماتىدا تەستىلىك تارتىپتە جۇمىسىن باستاعان قوقىس سۇرىپتايتىن كەشەننىڭ تاۋلىكتىك ونىمدىلىك قۋاتى – 250 توننا. بۇگىنگى كۇنى تۇرمىستىق قالدىقتار مەدەۋ جانە تۇركسىب اۋداندارىنان قابىلدانىپ جاتىر.

بۇگىن پارلامەنت ءماجىلىسى ءتوراعاسىنىڭ ورىنباسارى گۇلميرا يسيمبايەۆا كەشەندى ارالاپ، كەشەن جۇمىسىمەن تانىستى. ءقازىر زاۋىتتا ەكى جەلى ىسكە قوسىلعان. وسى اپتانىڭ اياعىنا قاراي تاعى ەكى جەلى قىزمەتىن باستاماق. تۇرمىستىق قالدىقتاردان شيكىزات الۋ ءۇشىن قوقىس سۇرىپتالادى. ودان كەيىن وڭدەۋگە جىبەرىلەدى.  

«زاۋىت قىركۇيەك ايىندا تولىق جۇمىس ىستەيدى. قازىرگى كەزدە مەگاپوليستە جىلىنا 600 مىڭ تونناعا جۋىق قوقىس جينالادى، ءبىز تۇرمىستىق قاتقىل قالدىقتاردى سۇرىپتاۋدا قالانى تولىق قامتىماق ويدامىز. كەشەن اۋماعىندا قوقىس وڭدەۋ زاۋىتىن سالماقپىز. قازىرگى تاڭدا ونىڭ ءوندىرىس قۋاتى قانشا بولۋى كەرەك ەكەنىن ەسەپتەپ جاتىرمىز»، – دەدى ينۆەستيسيالىق كومپانيا ديرەكتورى دميتريي دانيلچەنكو.

كەشەننىڭ جىلدىق ونىمدىلىك قۋاتى 550 مىڭ توننا. قالانىڭ ەكولوگيالىق احۋالىن جاقسارتۋعا ارنالعان جوبا قۇنى 5 جارىم ميلليارد تەڭگە. زاۋىت تولىق ىسكە قوسىلعان سوڭ، 500-دەن استام ادام جۇمىسپەن قامتىلاتىن بولادى.