الماتىدا فۋتزالدان ستۋدەنتتەر اراسىندا وتكەن الەم چەمپيوناتى مارەسىنە جەتتى. ءبىر اپتا ارالىعىندا 17 مەملەكەتتەن كەلگەن سپورتشىلار ب ا ق سىنادى. اتالمىش الەمدىك جارىس تاريحىندا 500-گە جۋىق سپورتشىنىڭ جينالۋى – رەكوردتىق كورسەتكىش بولىپ وتىر. سونداي-اق بايراقتى باسەكە تاريحىندا ءبىزدىڭ جىگىتتەر العاش رەت اقتىق سىنعا جەتتى.  

فينالدىق كەزدەسۋگە كەلگەن جانكۇيەرلەر وتە كوپ. كوپسالالى «Almaty Arena» كەشەنىندە كورەرمەننىڭ بارلىعى جەرلەستەرىمىزگە قولداۋ كورسەتۋگە جينالعان. فۋتزالدان ستۋدەنتتەر اراسىنداعى الەم چەمپيوناتىنىڭ تاريحىندا قازاقستان قۇراماسى العاش رەت اقتىق مارەگە جەتىپ وتىر.

جارىس بارىسىندا جينالعان كورەرمەندەردى سوزگە تارتىپ كورگەنىمىزدە، ءبىرى: «ويىن جالپى جاقسى ءجۇرىپ جاتىر. ءبىراق قارسىلاستىڭ ءبىزدىڭ كومانداعا قاراعاندا مىقتى ەكەنى كورىنىپ تۇر. دەگەنمەن، ءبىزدىڭ كوماندامىز جەڭەدى دەگەن ۇمىتتەمىز!»، – دەپ سپورتشىلارعا قولداۋ بىلدىرسە، ەندى ءبىرى: «ويىن وتە قىزىقتى. قازاقستان جەڭۋى كەرەك. العا، قازاقستان!»، – دەپ قازاقستان قۇراماسىنىڭ جەڭاسكە جەتەتىنە نىق سەنىم ءبىلدىرىپ جاتتى. 

ەكىنشى تايمدا كورەرمەندەر ءبىزدىڭ جىگىتتەرىمىزگە كوپ ءۇمىت ارتتى. قوس قۇراما وتە قىزىقتى ويىن كورسەتىپ، ءقاۋىپتى ساتتەرگە دە تاپ بولىپ جاتتى. دەسە دە، سوعىلعان گول كوپ بولا قويمادى. تەك ويىننىڭ 38ء-شى مينۋتىندا قازاقستاندىق قاقپاشى اسىلجان ءالىم وسى كەزدەسۋدەگى سوڭعى دوپتى سوقتى. وسىلايشا، ەسەپ 2:4 بولىپ، قازاقستان الەم چەمپيوناتىنىڭ كۇمىس جۇلدەگەرى اتاندى.

«ءبىز جەڭىلىپ قالدىق. كورەرمەن وتە كوپ جينالدى. وتە وكىنىشتى! بارلىعىنا ۇلكەن سىي جاساپ، العا شىققىمىز كەلىپ ەدى. اتتەڭ بولماي قالدى»، – دەدى فۋتزالدان قازاقستان ەرلەر قۇراماسىنىڭ ويىنشىسى ارنولد كناۋب.

«فينالدا ۇتىلعان سوڭ ءبارىبىر وكىنىش سەزىمى بولادى ەكەن. بارلىق جانكۇيەرلەرىمىزگە مىڭ العىس ايتامىز. قولداۋلارىڭىز كەرەمەت بولدى. كەلەسى چەمپيوناتتا جەڭەمىز دەگەن ۇمىتتەمىن»، – دەدى فۋتزالدان قازاقستان ەرلەر قۇراماسىنىڭ قاقپاشىسى اسىلجان ءالىم.

فۋتزالدان ستۋدەنتتەر اراسىندا الەم چەمپيوناتىندا رەسەي ءتورت دۇركىن الەم چەمپيونى اتانعان. ەندى كەزەكتى التىن مەدال الۋ ارقىلى الەمدەگى ەڭ تيتۋلدى قۇراما – برازيليامەن تەڭەستى. ال قولا جۇلدە ۋكراينا قۇراماسىنا بۇيىردى.

«ماعان بارلىعى ۇنادى. ءتۋرنيردىڭ دەڭگەيى وتە جوعارى بولدى. قولداۋ ەرەكشە سەزىلدى. بارلىق ماچ وتە قيىن ءوتتى. تورتتىككە ەنگەن بارلىق كوماندا چەمپيوناتتاعى مىقتىلاردىڭ مىقتىسى بولدى دەپ سانايمىن»، – دەدى فۋتزالدان رەسەي قۇراماسىنىڭ باس باپكەرى سەرگەي سكوروۆيچ.

قىزدار اراسىندا دا رەسەي قۇراماسى ءبىرىنشى ورىننان كورىنسە، كۇمىس مەدالدى ۋكراينا بۇرىمدىلارى قانجىعالادى. پورتۋگاليا ارۋلارى قولا جۇلدەگە قول جەتكىزدى.

«قىزىقتى سپورتتىڭ كۋاگەرى بولىپ وتىرمىز. بۇگىنگى باستى ويىن بولعان فينالدا قازاقتىڭ قۇراما كومانداسى فينالعا شىعىپ، وتە جوعارى دەڭگەيدەگى ويىندى كورسەتتى، بۇل ءبىزدىڭ تاريحىمىزدا بولماعان. رەسەي كومانداسىن الاتىن بولساق، ول 4 رەت الەمدىك چەمپيوناتتى جەڭگەن. سوندىقتان ءبىزدىڭ قۇراما كوماندامىز ءقازىر ۇلكەن دارەجەگە كوتەرىلىپ وتىر. وسىنداي ويىندار بىزگە ءجيى كەرەك-اق. سوندىقتان ءالى دە ءبىراز بيىكتى باعىندىرارمىز»، – دەدى ۇلتتىق ستۋدەنتتەر ليگاسىنىڭ پرەزيدەنتى دامير شىنىبەكوۆ.

«چەمپيونات العاش رەت جابىق سپورت كەشەنىندە وتكىزىلدى. بۇل ۋنيۆەرسيادا ويىندارىنان قالعان مۇرا. قازاقستان بيلىگى، الماتى قالاسىنىڭ باسشىلىعى سپورتتى دامىتۋعا ۇلكەن كوڭىل بولەدى. مۇنداي ءدۇبىرلى دودا ستۋدەنتتەر، جاستار اراسىندا ءجيى بولىپ تۇرادى جانە جالپى بۇقارالىق سپورتتى دامىتۋعا ۇلكەن سەرپىن بەرەدى دەگەن سەنىمدەمىن»، – دەدى حالىقارالىق ستۋدەنتتىك سپورت فەدەراسياسىنىڭ پرەزيدەنتى ولەگ ماتىسين.

ايتا كەتەرلىگى، الەم چەمپيوناتى 19 جانە 26 تامىز ارالىعىندا Almaty Arena جانە Halyk Arena مۇز سارايىندا ءوتتى. وعان 17 ەلدەن 25 كوماندا – 454 ستۋدەنت قاتىسىپ وتىر. 16 جىلدان بەرى ءوتىپ كەلە جاتقان باسەكە تاريحىندا بيىلعى قاتىسۋشىلاردىڭ سانى رەكوردتىق مەجەگە جەتتى. كەلەسى الەم چەمپيوناتى ەكى جىلدان سوڭ پولشانىڭ پوزنان قالاسىندا وتەتىن بولادى.