بۇگىن رەسپۋبليكالىق مەدياسيا كۇنى. وسىعان وراي الماتىدا دوستىق ۇيىندە «رەسپۋبليكالىق اشىق ەسىك كۇنى» ءوتتى. 

مەدياتورلار - داۋلاسۋشى تاراپتارعا جانجالدى بەيبىت جولمەن شەشۋگە كومەكتەسەتىن بىتىمگەر.

وسى ورايدا قالالىق قحا حاتشىلىعى  دا قوعامدىق ماسەلەلەردە ارا اعايىندىق تانىتۋدان تىس قالعان ەمەس.

«قورعاۋشى، سۋديا، پروكۋرور اتاۋلارىمەن قاتار مەدياتور دەگەن تەرمين بار. الماتىنىڭ وزىندە 500-دەن استام مەدياتور قىزمەت اتقارادى. ولار بيىلدىڭ وزىندە ءىستىڭ 45 %-ىن سوتقا جەتكىزبەي شەشكەن. سوتتىڭ شارۋاسى ونسىز دا شاش ەتەكتەن. ال ۇساق داۋلاردى مەدياتورلار قۇزىرىنا قالدىرعان دۇرىس. ەڭ العاش مەدياسيا كابينەتى الماتى دا اشىلعان بولاتىن. مەدياتور سۋديا ەمەس، ول ەشكىمگە باعىنبايتىن بەيتاراپ تۇلعا»،-دەدى قحا ءتوراعاسىنىڭ ورىنباسارى قازبەك مامسۋروۆ.

ونىڭ سوزىنشە، ق ر «مەديتاسيا تۋرالى» زاڭى قابىلدانعان كەزدەن باستاپ ازاماتتار اراسىنداعى شيەلەنىستەر سوتقا دەيىن شەشىمىن تابا باستاعان. ءۇي داۋى، مۇلىككە تالاس، وتباسىلىق كيكىلجىڭدەردە ەكى تاراپتى تاتۋلاستىرۋدا بۇگىنگىنىڭ بي-شەشەندەرى سانالاتىن مودەراتورلاردىڭ ءرولى زور.

ايتا كەتۋ كەرەك، «مەدياسيا تۋرالى» ق ر زاڭى 2011 جىلى 5 تامىزدا كۇشىنە ەنگەن بولاتىن.

ءىس-شاراعا رەسپۋبليكالىق جانە قالالىق ەتنومادەني بىرلەستىكتەردىڭ باسشىلارى مەن بەلسەندىلەرى، الماتى قالالىق جانە اۋداندىق سوتتارىنىڭ، كاسىپوداق وكىلدەرى، كاسىبي جانە كاسىبي ەمەس مەدياتورلار، قالالىق پروكۋراتۋرا ورگاندارىنىڭ قىزمەتكەرلەرى، مەدياسيا ورتالىقتارىنىڭ، قحا قۇرىلىمدارىنىڭ وكىلدەرى قاتىستى.