«اق جول» فراكسياسى قازاق ەلىنىڭ ادامزات وركەنيەتىنە («پروگرەسسيۆتى قازاقستان») قوسقان ۇلەسى مەن وراسان جەتىستىكتەرىن زەردەلەۋگە ارنالعان جىل سايىنعى جاس عالىمداردىڭ جالپىۇلتتىق بايقاۋىن ۇيىمداستىرۋدى ۇسىنادى. ءتيىستى دەپۋتاتتىق ساۋالدى ءماجىلىستىڭ پلەنارلىق وتىرىسىندا بەرىك دۇيسەمبينوۆ مالىمدەدى (ساۋالدىڭ تولىق ءماتىنى تومەندە كورسەتىلگەن).

مادەنيەت جانە سپورت مينيسترىنە

ءبىلىم جانە عىلىم مينيسترىنە

دەپۋتاتتىق ساۋال

ۇلتتىق ۇستانىمى بار كوپتەگەن ادامدار ءۇشىن نۇرسۇلتان ءابىش ۇلىنىڭ «ۇلى دالانىڭ جەتى قىرى» اتتى ماقالاسى ناعىز جاڭالىق بولدى.

بىرنەشە بۋىن ۇرپاقتارىنىڭ ۇعىمىندا ۇلتتىق تاريحىمىز قازاق حالقىنىڭ باستان كەشكەن بىتپەيتىن قاسىرەتى مەن تراگەديالىق وقيعالارى دەپ قابىلدانىپ ءجۇر.

بۇل قايعى-قاسىرەت قازاقتىڭ باسىنا تۇسكەن شاراسىز تاعدىرى دەگەن جالپى پىكىردى قالىپتاستىردى.

مۇنداي كوزقاراسقا تۇرتكى بولعان تاريحي نەگىزدەر جەتكىلىكتى: بۇل اقتابان-شۇبىرىندى زامانى، الاپات اشارشىلىق، 30-شى جىلدارداعى ساياسي قۋعىن-سۇرگىن، «الاش» قوزعالىسى كوشباسشىلارىنىڭ قۇربان بولۋى، جەلتوقسان وقيعاسى جانە 80ء-شى جىلدارداعى قازاق جاستارىن قۋدالاۋ...

مۇمكىن، سول سەبەپتەن بولار، ءبىز ءالى كۇنگە دەيىن ۇلتتىق تاريحىمىزدى ازاپ شەگۋدىڭ تاريحي كونسەپسياسى اياسىندا امان قالۋ ءۇشىن بىتىسپەيتىن كۇرەس دەپ تۇسىنەمىز.

الايدا، مەملەكەت باسشىسى تاريحي پوزيتيۆيزم تۇرعىسىنان وتكەننىڭ جاڭا تۇسىن كورسەتىپ بەردى.

ونىڭ ۇستىنە، پرەزيدەنت ءاربىر ءسوزدى مىسالدارمەن دالەلدەپ، ناقتى دەرەكتەرگە سۇيەنە وتىرىپ، تولىق اشىلماعان دۇنيەلەردى عىلىمي تۇرعىدان زەرتتەۋگە شاقىرىپ وتىر.

كەيبiر كەلتىرىلگەن مىسالدار بۇرىننان بەلگiلi، الايدا تەك نۇرسۇلتان ءابىش ۇلى عانا بiر جۇيەگە بىرىكتىرىپ، ءبىرتۇتاس تەتىكتە قاراستىردى.

اتقا مiنۋ مادەنيەتى مەن جىلقى شارۋاشىلىعى، كونە مەتتاللۋرگيا مەن زەرگەرلىك ونەر، ەگىنشىلىك شارۋاشىلىعى مەن قالا قۇرىلىسى ءداستۇرى، ۇلى جىبەك جولىندا وركەنيەت پەن تەحنولوگيالاردىڭ ءتۇيىسۋى....

العان اسەرىمىزگە سۇيەنسەك، پرەزيدەنتتىڭ ماقالاسى ارقىلى ءبىز بۇرىن كوزگە ىلمەي، ءمان بەرمەگەن، ال ەلباسى اۋەلدەن نازار اۋدارعان دۇنيەگە قايتا قاراپ، سارالاۋعا تۋرا كەلدى.

جانە بۇل وتكەندى سارالاۋ، سالىستىرۋ ۇلتتىق رۋح پەن ابىرويىمىزدى اسقاقتاتتى. سويتسە، ءبىزدىڭ تاريح تەك قاندى شايقاسپەن كەلگەن جەڭىستەرىمەن عانا ەمەس، اشىقتىعىمەن، اقىل-پاراساتىنىڭ، ءوي-ورىسىنىڭ بيىكتىگىمەن، جالپى ادامزاتتىق سيۆيليزاسيانىڭ قارىشتاۋىنا ىقپال ەتكەن جاڭالىقتارىمەن، شارۋاشىلىق سالتى جانە تۇرمىس ساپاسىمەن دە داڭقتى ەكەنىن تۇسىندىك.

بۇرىن ءبىز ۇلتتىق ۇستانىمى بار ادامداردىڭ اتىنا ايتىلعان كسەنوفوبيا، قازاقتىڭ تراگەدياسىنىڭ زارلاۋشىسى دەگەن سىندى ءجيى ەستيتىنبىز. الايدا پرەزيدەنتتىڭ ماقالاسى كۇن تارتىبىندەگى ۇلتتىق تاقىرىپتى تۇبەگەيلى وزگەرتەدى: بۇدان بىلاي ۇلتتىق مۇددەنى كوزدەۋشىلەر پروگرەسشىل جانە نوۆاتورلىققا قابىلەتتى تۇلعا ەكەنىن دالەلدەيدى.

نۇرسۇلتان ءابىش ۇلى ءوزىنىڭ تەڭدەسسىز زەرتتەۋى ارقىلى تاريحي عىلىمنىڭ جاڭا باعىتىن اشىپ بەردى، اتاپ ايتساق: كۇللى ادامزاتتىڭ دامۋىنا ىقپال ەتكەن جانە قازىرگى قازاقستاننىڭ اۋماعىندا بولىپ وتكەن قاسىرەتتى عانا ەمەس، ءپوزيتيۆتى ەرلىكتەردى زەردەلەۋگە جول اشتى.

بۇل كوپ جۇمىس پەن كاسىبيلىكتى تالاپ ەتەدى، ويتكەنى شايقاستار مەن قايعى-قاسىرەتكە قاراعاندا جاعىمدى جاڭالىقتار ۇرپاقتان ۇرپاققا جالعاسىن تاۋىپ، بەينە ءبىر مىندەتتى سياقتى بولىپ قالادى. سوندىقتان بولار، زامانداستاردىڭ جادىندا جارقىن تۇردە ەستە ساقتالىپ قالا بەرمەيدى.

پرەزيدەنتتىڭ اتقارعان ەڭبەگى نەعۇرلىم قۇندى بولعان سايىن، سوعۇرلىم ونى كوپشىلىكتىڭ كۇش-جىگەرمەن جالعاستىرۋ لايىقتى بولماق.

وسىعان وراي، «اق جول» فراكسياسى قازاقستاندىقتاردىڭ كەلەشەك ۇرپاعى ءۇشىن تاريحي ءپوزيتيۆيزمنىڭ ماڭىزدىلىعىن ەسكەرە وتىرىپ، قازاق ەلىنىڭ ادامزات وركەنيەتىنە («پروگرەسسيۆتى قازاقستان») قوسقان ۇلەسى مەن وراسان جەتىستىكتەرىن زەردەلەۋگە ارنالعان جىل سايىنعى جاس عالىمداردىڭ جالپىۇلتتىق بايقاۋىن ۇيىمداستىرۋدى ۇسىنادى.

بايقاۋ بارىسىندا ستۋدەنتتەر مەن جاس ماماندار زەرتتەۋ ناتيجەلەرى تۋرالى بايانداما جاساپ، وزدەرىنىڭ تۇجىرىمدارىن اشىق عىلىمي تالقىلاۋدا قورعاپ، تاريحي شىندىق پەن ويدان شىعارىلعان قيالدىڭ ارا جىگىن اجىراتىپ، ءوزىنىڭ كاسىبيلىگى مەن قازاقستاننىڭ تاريحىن ءپوزيتيۆتى، ياعني جاعىمدى جاعىنان تانىتۋعا قوسقان ۇلەسىنە ساي مەملەكەتتىڭ قولداۋىنا يە بولار ەدى. بايقاۋ نوميناسيالارى «ۇلى دالانىڭ جەتى قىرى» ماقالاسىنا سايكەس بەلگىلەنسە: مۇراعات-2025، ۇلى ەسىمدەر، تۇركى الەمى، ونەر جانە تەحنولوگيالار.

«اق جول» فراكسياسى ءوز ارىپتەستەرىن الدا كەلە جاتقان تۇڭعىش پرەزيدەنت كۇنىمەن قۇتتىقتاي وتىرىپ، قازاقستان حالقىنا ب ا ق پەن بەرەكە جانە تولاعاي تابىستار تىلەيدى!

قۇرمەتپەن، «اق جول» فراكسياسىنىڭ دەپۋتاتتارى