ەلباسىنىڭ «بولاشاققا باعدار: رۋحاني جاڭعىرۋ» مەملەكەتتىك باعدارلاماسى اياسىندا الماتى قالاسىنىڭ اكىمدىگى ىشكى ساياسات باسقارماسى ۇيىمداستىرعان «تۇلپار ءمىنىپ، تۋ العان» بايقاۋى شىن مانىندە ۇلتتىق رۋحانياتىمىز بەن قۇندىلىقتارىمىزدى ۇلىقتاعان، قوعامدىق سانانى وياتقان تىڭ ءۇردىس بولدى.

الماتى قالاسى اكىمدىگىنىڭ باستاماسىمەن بيىلعى جىلدىڭ مامىر-قىركۇيەك ايلارى ارالىعىندا جالپى ءبىلىم بەرەتىن مەكتەپتەردىڭ، ليسەيلەر مەن گيمنازيالاردىڭ وقۋشىلارى اراسىندا الپامىس باتىر جىرىن جاتقا ايتۋدان وتكەن ادەبي جانە تاريحي-تانىمدىق بۇل شارا ەڭ الدىمەن جالپىحالىقتىق سيپات الۋىمەن ەستە قالدى.

بايقاۋدىڭ ناتيجەلەرى كوز سۇيسىندىرەدى. وعان قاتىسۋ ءۇشىن قالا مەكتەپتەرىنىڭ 6-10 سىنىپ وقۋشىلارىنىڭ اراسىنان 1300 بالا ءوتىنىم بەرىپ، ونىڭ 1000-نان استامى ءدۇبىرلى دوداعا ءتۇسىپتى. ەرەكشە اتاپ وتەتىن جاعداي، الپامىس باتىر جىرىن جاتتاعان وقۋشىلاردىڭ 50-دەن استامى وزگە ۇلت وكىلدەرى ەكەن. بايگەگە قاتىسۋشىلار اراسىنان وڭتۇستىك مەگاپوليستىڭ 8 اۋدانىنان ۇش-ۇشتەن ىرىكتەلىپ شىققان 24 وقۋشى بايقاۋدىڭ قالالىق كەزەڭىندە ب ا ق سىناستى. 110 بەتتەن تۇراتىن «الپامىس باتىر» جىرىن جاتقا ايتقان وقۋشىلار اراسىندا ورىس تا، ۇيعىر مەن كورەي ەتنوستارىنىڭ وكىلدەرى دە بولعان ەكەن. ءتىپتى، ناۋرىزباي اۋدانىنان كەلگەن نيكولاي شۋت جىردى جاتقا ايتىپ، تىڭدارماندارىن ءتانتى ەتتى.

ايشىقتى شارانىڭ قورىتىندىسى بويىنشا بايقاۋدىڭ ءۇش جەڭىمپازى دا الماتى قالاسىنىڭ الاتاۋ اۋدانىنان شىقتى. جۇزدەن جۇيرىك، مىڭنان تۇلپار شىققان I oرىن يەگەرى ارۋجان ءابساتتارعا 1 500 000 تەڭگە، II oرىن يەگەرى ابىلاي بەرداشيەۆقا 1 000 000 تەڭگە جانە III oرىن يەلەنگەن بەكزات شارداربەككە 500 000تەڭگە قارجىلاي جۇلدە قورى تابىس ەتىلدى. ساراپشىلاردىڭ ايتۋىنشا، وسىنداي كولەمدەگى قوماقتى جۇلدە قورى بۇعان دەيىن ءبىلىم سالاسىنا قاتىستى بايقاۋلاردا بولعان ەمەس.

سونىمەن قاتار، شاكىرت دايىنداپ، وقۋشىلارى جۇلدەگەر اتانعان تالىمگەر-ۇستازدار مايرا ايىپحانقىزىنا، فاريدا سۇلەيمەنوۆاعا، ايجان وسپانبەكوۆاعا وكسفورد (انگليا) ۋنيۆەرسيتەتىندەگى ءتىل ءبىلىمىن جەتىلدىرۋ ورتالىعىندا 1-3 اي مەرزىمگە اعىلشىن ءتىلىن وقىپ ۇيرەنۋى ءۇشىن سەرتيفيكاتتار بەرىلدى.

ەل ىشىندە ەرەكشە قولداۋعا يە بولعان جوبانىڭ ءادىلقازىلار القاسىنا اكادەميكتەر ءومىرزاق ايتبايەۆ پەن ءۋاليحان قاليجاننىڭ، ادەبيەتشى-عالىمدار تىنىسبەك قوڭىراتبايەۆتىڭ، تەمىرحان تەبەگەنوۆتىڭ، سەرىك قوراباي ۇلىنىڭ، بەلگىلى قالامگەر قالي سارسەنبايدىڭ تورەلىك ەتۋىنەن-اق بۇل شارانىڭ بيىك دەڭگەيىن باعامداۋعا، مازمۇن-ماعىناسىن سارالاپ-سالماقتاۋعا بولار.

«رۋحاني جاڭعىرۋ» مەملەكەتتىك باعدارلاماسىمەن ۇندەسە، ۇيلەسە، قوعامدىق سانانى سەلت ەتكىزگەن بۇل ۇلتتىق جوبا راسىندا دا رۋحاني سالاعا جاڭا لەپ، ۇلكەن سەرپىلىس اكەلگەن شارا بولدى. وقۋشىلار اراسىندا كىتاپ

وقۋدى، ونىڭ ىشىندە قازاق حالقىنىڭ باتىرلىق ەپوستارىن ناسيحاتتاي وتىرىپ، ولاردىڭ كوركەم ادەبيەتكە دەگەن قىزىعۋشىلىعىن وياتۋدى، ءجاسوسپىرىم بۋىندى حالىق پوەزياسىنا دەگەن ىڭكارلىككە جانە پاتريوتيزمگە تاربيەلەۋدى ماقسات ەتكەن جوبا رەسپۋبليكا جۇرتشىلىعىنىڭ دا كوڭىلىنەن شىققانىن باعامدادىق. بايقاۋدىڭ جانە ءبىر ەرەكشەلىگى، سىناق بارىسىندا «الپامىس باتىر» جىرىن بالالارمەن بىرگە ولاردىڭ اتا-انالارى دا جاتقا ايتىپ، كوزگە ءتۇستى. لەزدەمدە رەسپۋبليكا وڭىرلەرىنە تارالىپ كەتكەن بۇل رۋحاني بايگەگە زيالى قاۋىم وكىلدەرى، ونەر جۇلدىزدارى قولداۋ كورسەتىپ، الەۋمەتتىك جەلىلەردە ەل-جۇرتتىڭ كوڭىلىنەن شىققان جىر جارىسىن ۇيىمداستىردى.

تانىمال تۇلعالار «تۇلپار ءمىنىپ، تۋ العان» ۇلتتىق جوباسى بويىنشا كۇللى تۇركى حالىقتارىنا ورتاق «الپامىس باتىر» جىرىنان ۇزىندىلەر وقىپ، ونى بىر-بىرىنە جولداپ، ەستافەتاعا ءتىپتى مينيسترلەر مەن وبلىس اكىمدەرى، دەپۋتاتتار، مەملەكەتتىك قىزمەتشىلەر جانە قوعامنىڭ وزگە دە سالالارىنىڭ وكىلدەرى، جالپى سانى 270-تەن استام ادام قاتىستى.

توقسان اۋىز ءسوزدىڭ توبىقتاي ءتۇيىنى - «تۇلپار ءمىنىپ تۋ العان» جوباسى بالالاردى حالىق پوەزياسىنا، جالپى كىتاپ وقۋعا باۋلۋدىڭ، قازاق حالقىنىڭ ۇلتتىق قۇندىلىقتارى مەن اسىل مۇرالارىن،باتىرلىق ەپوستارىن ناسيحاتتاۋ ارقىلى قايسارلىق قاسيەتتەردى، ۇلتتىق كودقا نەگىزدەلگەن نامىسشىلدىقتى، ۇلتتىق سەزىمدى وياتۋدىڭ، وقۋشىلاردىڭ شىعارماشىلىق قابىلەتىن دامىتۋدىڭ، جاس ۇرپاقتى مەملەكەتشىلدىككە، پاتريوتيزمگە تاربيەلەۋدىڭ ونەگەلى مەكتەبىن قالىپتاستىردى دەپ باتىل ايتا الامىز.

بايقاۋدىڭ تاعى ءبىر تاعىلىمدىق قىرى بار، ەگەر قالا اكىمدىگى ونى وتكىزۋدى داستۇرگە اينالدىرسا، حالقىمىزدىڭ مادەني ۇراسىن جاڭعىرتىپ، ۇلتتىق كودىمىزدى ساقتاۋدىڭ، ۇلتتىق قۇندىلىقتارىمىزدى ۇلىقتاۋدىڭ جاڭا بيىگىنە كوتەرىلەرىمىز حاق.

«تۇلپار ءمىنىپ، تۋ العان» ۇلتتىق جوباسىنىڭ باستى قۇرمەت- قۇندىلىعى دا وسى بولماق.