الماتى قالاسى پەدياتريا جانە بالالار حيرۋرگياسى عىلىمي ورتالىعىندا «دەنساۋلىق ساقتاۋ سالاسىنداعى كلينيكالىق زەرتتەۋلەردىڭ ءرولى» اتتى بريفينگ ءوتتى، دەپ حابارلايدى Qamshy.kz اقپارات اگەنتتىگى.

جيىن ق ر پارلامەنتى سەناتىنىڭ 25 جەلتوقساندا قابىلداعان گەموفيليا جانە وزگە دە سيرەك كەزدەسەتىن اۋرۋلارمەن اۋىراتىن ناۋقاستارعا كلينيكالىق زەرتتەۋ جۇرگىزۋ تۋرالى ق ر دەنساۋلىق ساقتاۋ مينيسترلىگىنىڭ زاڭ جوباسىن ءتالقىلاۋ-تۇسىندىرۋ ماقساتىندا ۇيىمداستىرىلدى. اتالعان زاڭ جوباسى ەلىمىزدەگى مەديسينانىڭ دامۋىمەن قوسا، فارماسيەۆتيكا، دياگنوستيكالىق زەرتتەۋلەر مەن سيرەك كەزدەسەتىن اۋرۋلاردى تۇبەگەيلى ەمدەۋدە ماڭىزدى ءرول اتقارادى- دەيدى بريفينگ سپيكەرى س.د. اسفەندياروۆ اتىنداعى ءقازۇمۋ-نىڭ عىلىمي زەرتتەۋ جۇمىستارى بويىنشا پرورەكتورى ءجۇسىپوۆ باۋىرجان ءسابيت ۇلى.

«وتاندىق فارمكومپانيالار شەتەلدە زەرتتەلگەن جانە تەكسەرىلگەن پرەپاراتتاردى وندىرۋمەن اينالىسادى. دەگەنمەن، شەتەلدىكتەرگە وڭ اسەر ەتكەن دارى-دارمەكتەردىڭ بارلىعى قازاقستاندىقتارعا دا ءدال سولاي اسەر ەتەدى دەگەن ءسوز ەمەس. ساپالى مەديسينالىق قىزمەت كورسەتۋ مەن ناۋقاستاردىڭ جاعدايىن باقىلاۋدا كلينيكالىق زەرتتەۋ جۇرگىزۋدىڭ ماڭىزى زور...»-دەپ ءتۇسىندىردى باۋىرجان ءسابيت ۇلى.

باسپا ءسوز بريفينگىنە سيرەك كەزدەسەتىن دەرتكە شالدىققان بالالاردى قولداۋ ۇيىمدارىنىڭ وكىلدەرى ارنايى شاقىرتىلعان. قازاقستاندىق مۇمكىندىگى شەكتەۋلى جاندار مەن گەموفيلياعا شالدىققان ناۋقاستار اسسوسياسياسىنىڭ پرەزيدەنتى تامارا رىبالوۆا كلينيكالىق زەرتتەۋ جۇرگىزۋ ناۋقاس بالالاردىڭ ءومىرىن ساقتاپ قالۋدا ماڭىزدى ەكەندىگىن اتاپ ءوتتى: «ەلىمىزدە گەموفيليانىڭ اۋىر تۇرىنە شالدىققان 40-تان اسا بالالار مەن 15-كە جۋىق ەرەسەكتەر بار. مۇنداي تۇرىمەن اۋىراتىن بالالار تەك ءبىزدىڭ ەلدە عانا تۋىلادى. وعان باستى سەبەپ، ەكولوگيالىق ماسەلەلەر بولۋى مۇمكىن. ماسەلەن، التى جاسار رادامير شاگابۋدينوۆ تۋعانىنان باستاپ ءار كۇن سايىن وتە اۋقىمدى دوزادا ەم قابىلداپ كەلدى. ءبىراق، بالا دەنساۋلىعى وڭالمادى. اتا-اناسى رەسەيدە ەمدەتۋگە شەشىم قابىلداعان بولاتىن. رەسەيدە گەموفيلياعا شالدىققان 84 مىڭ ناۋقاستىڭ ىشىندە ءدال ءراداميردىڭ سيمپتومدارى مۇلدە كەزدەسپەدى. كلينيكالىق زەرتتەۋگە قاتىسىپ، جاڭا پرەپاراتتى سىناقتان وتكىزدى. رادامير ءۇشىن شىعارىلعان دارىلەر ونىڭ دەنساۋلىعىنا وڭ اسەر ەتىپ، بۇگىندە باسقا بالالارمەن قاتار مەكتەپكە باردى. ونىڭ ەمىنە جىل سايىن ميلليونداعان قارجى كەتىپ، كۇن سايىن وتە كوپ مولشەردە ءدارى قابىلداۋ ءتيىمسىز بولعانى انىق. ال، ءقازىر كلينيكالىق زەرتتەۋدەن ءساتتى وتكەن پرەپاراتتىڭ ارقاسىندا تەك اپتاسىنا 3 رەت قانا دوزا قابىلدايدى. كلينيكالىق زەرتتەۋ جۇرگىزۋ ادىستەرى ەلىمىزدە ەكونوميكالىق جاعىنان دا اسا ءتيىمدى بولماق»،-دەيدى تامارا رىبالوۆا.

جيىن بارىسىندا ماماندار وتاندىق فارماسيەۆتيكانى دامىتۋ مەن پرەپاراتتار ويلاپ تابۋ قاجەتتىلىگى  دە ءسوز بولدى. سەبەبى، كەز كەلگەن پرەپاراتتىڭ كەرى اسەرى بولۋى مۇمكىن. اسىرەسە شەتەلدە شىعارىلاتىن نەمەسە باسقا مەملەكەتتەردە سىناقتان وڭ ناتيجە كورسەتكەن دارىلەردىڭ وزگە ايماقتاردا كەرى اسەر ەتۋى عاجاپ ەمەس. قازاقستان ەكولوگيالىق، گەوگرافيالىق تۇرعىدان العاندا دەنساۋلىق كورسەتكىشى تومەن ەلگە جاتادى. گەنەتيكالىق نىساندا دا الدەقايدا ايرىقشا بەلگىلەر بار. سوندىقتان وتاندىق ءدارى ءوندىرىسى مەن ونى قازاقستاندىقتار اعزاسىنا اسەرىن ءبىلۋ ءۇشىن كلينيكالىق زەرتتەۋلەر جۇرگىزۋ مەديسينانى دامىتۋدا، ساپالى مەديسينالىق قىزمەت كورسەتۋدە ماڭىزدى ەكەنىن اتاپ ءوتتى. قوعامدا ءار الۋان پىكىر تۋدىرعان زاڭ جوباسىن حالىققا دۇرىس جاعىنان ءتۇسىندىرۋ كەرەكتىگىن، ازاماتتاردىڭ كلينيكالىق زەرتتەۋگە قاتىسۋشىلار سىناما وبەكتىسى بولادى دەگەن جاڭساق پىكىرىنىڭ ورىنسىز ەكەنىن دە ەسكەرتتى.