«باس جارىلسا – بورىك ىشىندە» دەيدى،
بورىكتىمنىڭ نامىسىن تۇقىرتىپ...
«ءتىس سىنسا – اۋىز ىشىندە» دەيدى،
اۋىزىمنان اششى زاپىران تۇكىرتىپ...
«قول سىنسا – جەڭ ىشىندە» دەيدى،
جەڭ ۇشىنان جالعاسقان پاراقورلاردى قۇتىرتىپ...
ءبىزدى باسىنباعان كىم قالدى؟!
*
ءمايحانالار – جاتتىكى،
ءمايىتحانالار – بىزدىكى.
ويىنحانالار – جاتتىكى،
ويناسحانالار – بىزدىكى.
ءدارىحانالار – جاتتىكى،
دارەتحانالار – بىزدىكى.
ءبىزدى باسىنباعان كىم قالدى؟!
*
كوشەدە كيكىلجىڭ توبەلەس،
كەڭسەدە ميپىلجىڭ جينالىس!
ءتىلىم كەسىلگەن...
تىلەرسەگىم قيىلعان...
پىشاقتاپ جاتسا دا،
قۇشاقتاپ بولمايمىز!
جاراقاتتاپ جاتسا دا،
ماراپاتتاپ بولمايمىز!
كەلىمسەك – توردە،
كوڭىلشەك – تومەندە،
ۇلتارالىق ماسەلەنى – ۇلتابارلىق ماسەلە دەيدى،
ءبىزدى باسىنباعان كىم قالدى؟!
ميراس اسان
