استاناداعى كوكتال-1 تۇرعىن الابىندا ءورت سالدارىنان زارداپ شەككەن وتباسى باسپانا كەزەگىندە تۇرماعان. بۇل تۋرالى ەلوردا اكىمدىگىنىڭ باسپا ءسوز حاتشىسى ەلۆيرا جۇرگەنبايەۆا ءمالىم ەتتى، دەپ حابارلايدى Qamshy.kz اقپارات اگەنتتىگى قازاقپاراتتىڭ دەرەگىن نەگىزگە الىپ. 

«وسى كۇنگە دەيىن بۇل وتباسى پاتەر الۋ نەمەسە باسپانامەن قامتاماسىز ەتۋ بويىنشا كەزەككە تۇرۋعا قاتىستى ەشقانداي ءوتىنىش بىلدىرمەگەن. ولار جەرگىلىكتى اتقارۋشى ورگاندارىنان دا كومەك سۇراماعان. كوپ بالالى وتباسى رەتىندە جاردەماقى الىپ وتىرعان»، - دەدى باسپا ءسوز حاتشىسى.

بەلگىلى بولعانداي، اتالعان وتباسى «كوكتال-1» تۇرعىن الابىنداعى جەكە تۇرعىن ءۇيدىڭ اۋلاسىنداعى ۋاقىتشا تۇرعىن ءۇي قۇرىلىسىندا تۇرعان.

«ءبىزدىڭ اقپارات بويىنشا ول تۋىسقاندارىنىڭ ءۇيى بولعان. ولار ۇيلەرىنىڭ جانىنداعى ۋاقىتشا قۇرىلىس نىسانىن اتالعان وتباسىعا بەرگەن. بۇل وتباسى — استانانىڭ تۇرعىندارى.  ناقتى ءوز باسپانالارى بولماعان جانە اكىمدىكتەن پاتەر سۇراماعان»، — دەدى ەلبۆيرا جۇرگەنبايەۆا.

ەسكە سالا كەتەيىك، 4 اقپاننىڭ تۇنىندە ەلوردانىڭ سارىارقا اۋدانىنداعى كوكتال-1 تۇرعىن الابىندا ءورت شىقتى. ءورتتى ءسوندىرۋ بارىسىندا 2006، 2008، 2014، 2016، 2018 جىلى دۇنيەگە كەلگەن 5 بالانىڭ دەنەسى تابىلدى. ەڭ كىشىسى نەبارى ءۇش ايلىق ءسابي ەدى. 

سونىمەن قاتار، بۇگىن استانا اكىمى باقىت سۇلتانوۆ بەس بالانىڭ ورتتەن كوز جۇمۋىنىڭ سەبەپ-سالدارىن انىقتاۋدى تالاپ ەتتى.