ەلدىڭ دامۋىنا ەلەۋلى ۇلەس قوسىپ جۇرگەن نازىك جاندىلار كوپ ورتامىزدا. ولار تۋرالى اركەز ايتىلىپ ءجۇر. سولاردىڭ ءبىرى «ادەمى-اي» كومپانياسى مەن «ادەمى-اي» ونەر مۇراجايىنىڭ ديرەكتورى، تابىستى كاسىپكەر، ديزاينەر، توپتاماشى، ق ر مادەنيەت قايراتكەرى – باحارگۇل تولەگەن قىزى.  8 ناۋرىز حالىقارالىق ايەلدەر مەرەكەسى قارساڭىندا جۇرت الدىندا جۇرگەن اپكەمىزگە حابارلاسىپ از-كەم اڭگىمەلەسكەن ەدىك.

–    قۇرمەتتى باحارگۇل تولەگەن قىزى، ەڭ اۋەلى مەرەكەڭىزبەن قۇتتىقتايمىز! مەرەكەلىك كوڭىل-كۇيىڭىز قالاي؟

–    وتە جاقسى، وسى مەرەكەنىڭ الدىندا عانا 1 ناۋرىز كۇنى «ۇلت جاۋھارلارى» اتتى جاڭا كادەسىيلاردىڭ تۇساۋ كەسەر كورمەسىن وتكىزدىك، ولاردىڭ قاتارىندا ايەل زاتىنا سىيلار باعالى سىيلىقتار  بولدى.

–     ءسىز ءۇشىن وسى مەرەكەنىڭ ماڭىزى نەدە؟

–  ەر ازاماتتاردىڭ نازىك جاندىلارعا ايرىقشا ىقىلاس تانىتىپ، قۇتتىقتايتىندىعىندا، سىي ۇسىناتىندىعىندا. وسى 8 ناۋرىز قارساڭىندا ايەلدەر قاۋىمىنىڭ ەل ومىرىندەگى ورنى ءبىر ايقىندالىپ قالادى. ەلگە ولشەۋسىز ۇلەس قوسقان مىقتى قىزداردىڭ اتى اتالادى، گازەتتەر ءبىر سانىن ارناپ، تەلەديداردا ارنايى حابارلار ۇسىنىپ جاتادى. ءبىزدىڭ ەڭ قۋانىشقى كەنەلەتىن كۇنىمىز وسى مەرەكە عوي دەپ ويلايمىن. 

–    بايقايسىز با، مەرەكە قارساڭىندا بولماسا، نازىك جاندىلار تۋرالى از ايتىلاتىن سياقتى؟

–   تۋرا ولاي ايتۋعا بولماس، ايتىلىپ ءجۇر، ماسەلە كىمدەردىڭ كوپ ايتىلىپ، كىمدەردىڭ نازاردان تىس قالاتىندىعىندا. ادەتتە ءانشى، ساساتكەر، كاسىپكەر ايەلدەر تۋرالى ءجيى ايتىلادى. ال، ەل ىشىندە ءتۇرلى سالادا جەمىستى ەڭبەك ەتىپ جۇرگەن قىزدارىمىز بار، ولار تۋرالى از ايتىلادى. ماسەلەن، ءوندىرىس سالاسىندا، عىلىمدا، سپورتتا،  ۇستازدىق جولدا، كوپ بالالى انالار تۋرالى ەڭ كوپ ايتىلاتىن ورايلى تۇس وسى ناۋرىز بولىپ تۇر. وسى ءبىر اپتا ۋاقىتتا بۇرىن اتىن ەستىمەگەن تالاي قازاقتىڭ مىقتى قىزدارى تۋرالى ءبىلىپ جاتىرمىز.

–    بۇگىنگى قازاق قىزى قانداي بولۋ كەرەك؟

–   ەڭ اۋەلى ۇلتتىق قۇندىلىقتاردى بويىنا ءسىڭرۋ كەرەك، قوسىمشا بۇگىنگى كۇن تالاپ ەتىپ وتىعان ماسەلەلەر بار، جوعارى ءبىلىمى، تەحنيكانى مەڭگەرۋى، شەت ءتىلىن ءبىلۋى، ت.ت  ىسكەرلىك قابلەتتەرىن دە جەتىلدىرسە ارتىقتىق ەتپەيدى.

–    بۇگىنگى سىڭىلىلەرىڭىزگە كوڭىلىڭىز تولا ما؟

–  تولادى، تولمايدى دەپ كەسىپ ايتقانىمىز ورىنىز. ادەپتى، يبالى، ۇياتى تۇنىپ تۇرعان، ءبىلىمدى، ەر ادامنىڭ جۇمىسىن اتقارىپ جۇرگەن  قىزدار كوپ، ولار تۇرعاندا، قالاي تولمايدى دەپ ايتاسىڭ؟! ال ەندى ەلىكتەۋشىلىكتىڭ جەتەگىندە جۇرگەن قىزداردى دا كورىپ ءجۇرمىز، اشىق-شاشىق كيىنگەن، شاشتارىن جايعان قىزدارعا قاراپ قارنىڭ اشادى ارينە. ول جاستاردىڭ بارلىعى تەمىر قازىعىن تاۋىپ قازاقىلىقتى بويىنا سىڭىرسە قازاقتىڭ قىزدارى ەشكىمنەن كەم ەمەس.   

–    گەندەرلىك ساياسات تۋرالى كوزقاراسىڭىز؟

–   وسى ماسەلەنى داۋعا اينالدىرۋدىڭ قاجەتى شامالى، قازاق ايەلىنىڭ ورنى ەجەلدەن ايقىن، ولاردى ەر ادامنىڭ جۇمىسىن ىستەۋگە جاپپاي ۇگىتتەپ، ناۋقان جاساۋدىڭ كەرەگى شامالى. ەر مەن ايەلدىڭ قۇقى تەڭەستىرىلگەن زامان بۇل. ال، ءبىلىمى جەتىپ، قابلەتى بار بولسا ءتۇرلى جۇمىستارمەن ايەلدەر اينالىسا بەرسىن، وعان ەشكىم توسقاۋىل قويا المايدى.

–   نازىك جاندىلارعا دەگەن مەرەكەلىك تىلەگىڭىزدى قانداي؟

–   ءبىزدىڭ انالار، ارۋلار، قىزدار قانداي قۇرمەتكە بولسىن لايىق. بارشاسىن ءتول مەرەكەسىمەن قۇتتىقتايمىن. وسى ورايدى پايدالانىپ ەر ازاماتتارعا دا ايتقىم كەلەدى، سىزدەر نازىك جاندى جاقىندارىڭىزدىڭ قادىرىنە جەتىپ ايالاي بىلىڭىزدەر! تەك وسى مەرەكە قارساڭىندا ەمەس، بارلىق ساتتە قۋانىش سىيلاڭىزدار! 

سۇحباتتاسقان زاكەن مەيرام