ماسكەۋدە  جەڭىستىڭ 70 جىلدىعىن مەرەكەلەۋ قارساڭىندا تمد مەملەكەتتەرى باسشىلارىنىڭ بەيرەسمي ءسامميتى ءوتتى. سامميت بارىسىندا تاراپتار  مەرەكە جايىن تالقىلاپ، كەڭەس وداعىنىڭ ەۋروپا مەن بۇكىل الەمدى فاشيزمنەن قۇتقارۋداعى شەشۋشى ۇلەسىن اتاپ ءوتتى. سونىمەن قاتار، تمد مەملەكەتتەرى باسشىلارى كەڭەسىنىڭ كەزەكتى وتىرىسىن بيىلعى قازان ايىندا استانادا وتكىزۋ مۇمكىندىگى قاراستىرىلدى. قازاقستان پرەزيدەنتى نۇرسۇلتان نازاربايەۆ بۇل جولعى كەزدەسۋ ارداگەرلەر مەن تىل ەڭبەككەرلەرىنە كورسەتىلگەن قۇرمەت ەكەنىن اتاپ ءوتتى. مەملەكەت باسشىسى قازىرگى كەزدە جەكەلەگەن ساياساتكەرلەر مەن مەملەكەتتەردىڭ سوعىس قورتىندىسىن تاريحي دەرەكتەردى بۇرمالاۋ ارقىلى قايتا قاراۋعا ۇمتىلىسى بايقالىپ وتىرعانىنا توقتالدى. "مۇنداي ارەكەت بىزگە جارامايدى. ءبىز جەڭىس تۋرالى اقيقاتتى بىرلەسىپ ساقتاۋعا، بولاشاقتا وسىنداي قاسىرەتتى بولدىرماس ءۇشىن كەلەسى ۇرپاققا ايتىپ جەتكىزۋگە ءتيىسپىز"،-دەدى نۇرسۇلتان ءابىش ۇلى. تمد مەملەكەتتەرى باسشىلارىنىڭ بۇل جولعى جيىنىندا ءبىرازدان رەسەيگە قىڭىر قارايتىن يسلام اكا كاريموۆ (وزبەكستان) پەن قىرعىزستان پرەزيدەنتى المازبەك اتامباۆ اراسىندا داۋ شىقتى. المازبەك اتامبيەۆ ءوز كەزەگىندە جەڭىستىڭ 70 جىلدىعىنا وراي ماسكەۋدە وتكەن مەرەكەلىك پارادقا قاتىسۋدان باس تارتقان تمد ەلدەرى پرەزيدەنتتەرىن قاتاڭ سىنعا الدى. اتامبايەۆتىڭ ايتۋىنشا، ولار ەكىنشى دۇنيەجۇزىلىك سوعىس ارداگەرلەرى مەن زۇلماتتى جىلداردا وپات بولعان مايدانگەرلەرگە، تىل ارداگەرلەرىنە قۇرمەتسىزدىك كورسەتكەن. "بۇگىن وتكەنىن ۇمىتقاندار، بولاشاقتىڭ الدىندا جاۋاپ بەرەدى"،-دەدى المازبەك اتامبايەۆ مىرزا. سونداي-اق، اتامبايەۆ مىرزا وتتى جىلدارى قىرعىز رەسپۋبليكاسىنان ۇرىس دالاسىنا اتتانعان ءار ءتورت جاۋىنگەردىڭ ۇشەۋى مايدان دالاسىنان ورالماعانىن ايتا كەلە، "ءبىز بۇگىن وتكەن تاريحىمىزدان بەزىپ كەتە المايمىز"،-دەدى. اتامبايەۆتىڭ ايتقان داتىنا وزبەك پرەزيدەنتى يسلام كاريموۆ ءوز جاۋابىن قايتارعان. "مەن اتامبايەۆ مىرزانىڭ بۇل مالىمدەمەسىن وتە ساۋاتسىز ءارى تاكتيكالىق مازمۇنعا جاتپايتىنىن ايتقىم كەلەدى. ءسىز ايتىپ وتىرعان، تاريحتى ءبىز جاقسى بىلەمىز"،-دەدى يسلام كاريموۆ. ۆلاديمير پۋتين ءوز كەزەگىندە مەملەكەتتەردىڭ باسشىلارى اتىنان نۇرسۇلتان نازاربايەۆتى وتكەن سايلاۋداعى جەڭىسىمەن قۇتتىقتادى. سونداي-اق، رەسەي پرەزيدەنتى قازاقستان بيىل تمد-عا ءتوراعالىق ەتەتىنىن اتاپ ءوتتى. ماسكەۋدەگى ەاەو-عا مۇشە ەلدەرى باسشىلارى جيىنىندا بەلورۋسيا پرەزيدەنتى الەكساندر لۋكاشەنكو جۇمىستى تەزىرەك اياقتاپ، جەڭىستىڭ 70 جىلدىعىنا ارنالعان مەرەكەلىك شارالارعا اۋىسۋدى ۇسىندى دەپ حابارلايدى news.mail.ru. لۋكاشەنكو قازاقستان پرەزيدەنتى نۇرسۇلتان نازاربايەۆتى جۋىرداعى پرەزيدەنت سايلاۋىنداعى كەزەكتى جەڭىسىن قاعىتپا قالجىڭمەن قۇتتىقتادى.   "ارينە،  نازاربايەۆ جاڭا سايلانعان پرەزيدەنت.  ءقازىر ونىڭ كۇش-قايراتى، ەنەرگياسى تاسىپ تۇر عوي. بۇل كىسىگە سالساق، جۇمىستان باس كوتەرە الماي قالامىز"،-دەپ ەاەو باسشىلارىن كۇلدىردى. ماسكەۋدە وتكەن ەاەو-نىڭ جوعارعى كەڭەسىنىڭ قورتىندى جيىنىندا ءسوز العان بەلورۋسيا پرەزيدەنتى لۋكاشەنكو مىرزا: "ءبىز مەرەكەگە جينالدىق. ال ءوزىمىز بولساق تۇنگە دەيىن جۇمىس ىستەپ وتىرمىز. شىن ايتام، بۇلاي بولمايدى عوي. وسى رەسەيگە كەلە قالساڭ بولدى، جۇمىس تابىلىپ تۇرادى"،-دەپ پرەزيدەنتتەردىڭ ەزۋىنە تاعى ءبىر قىسىر كۇلكى ءۇيىردى. ارى قاراي لۋكاشەنكو ءوز ءسوزىن "ءيا، ەڭ از دەگەندە سىندى دۇرىس قابىلدارسىزدار، ايتپەگەندە ماقتاي بەرەمىز، ماقتاي بەرەمىز. وسىنى توقتاتامىز-اۋ"،- دەپ جالعاستىردى.