شىمكەنتتەگى «Rixos Khadisha Shymkent» قوناق ۇيىندە ايماقتىق VIII «ايەل جانە بيزنەس» كونفەرەنسياسى ءوتتى. بۇل تۋرالى bnews.kz اقپاراتتىق پورتالى جازادى. وڭتۇستىك قازاقستان وبلىسى اكىمدىگى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا مەن «KMF» شاعىن قارجى ۇيىمى، «KMF-دەمەۋ» كق، قازاقستان حالقى اسسامبلەياسى، قازاقستاننىڭ ىسكەر ايەلدەرى قاۋىمداستىعى ۇيىمداستىرعان كونفەرەنسياعا كاسىپكەر ايەلدەر، ميكروقارجىلاندىرۋ سالاسىنداعى ساراپشىلار، قازاقستان رەسپۋبليكاسىنىڭ مەملەكەتتىك جانە قارجى ينستيتۋتتارىنىڭ جانە كاسىپكەرلىكتى قولداۋدىڭ باسقا دا قۇرىلىمدارىندا جۇمىس ىستەيتىن قىز-كەلىنشەكتەر قاتىستى.
جيىنعا قاتىسقان 120-دان استام ىسكەر ايەلدەردى وبلىس اكىمىنىڭ ورىنباسارى ەربول سادىر شۋاقتى كوكتەمنىڭ العاشقى مەرەكەسى 8 ناۋرىز – حالىقارالىق ايەلدەر كۇنىمەن قۇتتىقتاپ، دەندەرىنە ساۋلىق، وتباسىلارىنا اماندىق تىلەدى. كونفەرەنسيانىڭ نەگىزگى ماقساتى — ايەلدەردىڭ قوعامداعى ءرولىن ارتتىرۋ. ايەلدەردىڭ ىسكەرلىك بەلسەندىلىگىن دامىتۋ، بيزنەستى جۇرگىزۋ بويىنشا تاجىريبەلىك ءبىلىم الماسۋ، ىسكەري بايلانىستاردى ورناتۋ جانە دامىتۋ بولاتىن.
«بيىل — قازاقستان حالقى اسسامبلەياسىنىڭ 20 جىلدىعى. بىزدىڭشە، تۇراقتىلىق تاتۋلىقتى تالاپ ەتەدى. ال ەلىمىزدەگى تاتۋلىق — بيزنەستىڭ دامۋىنىڭ ءبىر سەبەبى. ءبىر شاڭىراقتىڭ استىندا بارشامىزدىڭ ءتاتۋ-تاتتى ءومىر ءسۇرۋىمىزدىڭ ارقاسىندا ەلىمىزدەگى بيزنەس قارقىنمەن دامىپ كەلە جاتقانىن نىق سەنىممەن ايتامىز.»
«بۇگىندە مەملەكەت كاسىپكەرلىكتى قولداپ، قۋاتتاپ وتىر. سۋبسيديا بەرىپ جاتىر. وڭتۇستىك قازاقستان وبلىسىندا كاسىپكەرلىك دامىعان. كوبى وتباسىلىق بيزنەسپەن اينالىسادى. ايماقتا كوپبالالى وتباسىلار كوپ. بۇل دا وتباسىلىق بيزنەستىڭ دامۋىنا سەپ بولۋدا. مەنىڭشە، وتباسىلىق كاسىپتىڭ بولاشاعى بار. بۇل تەك قانا بيزنەس ەمەس، جاستاردى جۇمىسپەن قامتۋ ەكەنىنە دە كوڭىل بولگەنمىز ابزال» دەيدى «KMF» شاعىن قارجى ۇيىمىنىڭ شىمكەنت قالاسىنداعى فيليال ديرەكتورى كۇلسارا ساپاربەكوۆا.
